.jpg)
ម៉ន សាម៉េត បានតាមម៉ាត់ទៅលើសិស្សប្អូន រឿន សុខលី កាលពីថ្ងៃសៅរ៍។ រូប យឺន ពន្លក
ភ្នំពេញ: អ្នកប្រដាល់មាឌល្អិតចិត្តធំ ម៉ន សាម៉េត បានសម្រេចចិត្តវ៉ៃសិស្សប្អូនរួមគ្រូគឺកីឡាករ រឿន សុខលី មកពីក្លិបការិយាល័យទី ៥ កងទ័ពជើងគោក ដែលជាក្លិបរបស់ឱពុកបង្កើតឲ្យសន្លប់ ដើម្បីឡើងទៅជួប យុគ យក្សផ្លែ នៅវគ្គពាក់កណ្តាលផ្តាច់ព្រ័ត្រក្នុងព្រឹត្តិការណ៍ TV5 Boxing KnockOut Serie (K-Cement) រដូវកាលទី ៤ ទម្ងន់ ៥៧ គីឡូក្រាម។
តាមរយៈការប្រកួតនៅសង្វៀនប៉ុស្តិ៍លេខ ៥ ស្ថិតនៅស្រុកកណ្តាលស្ទឹង ខេត្តកណ្តាលកាលពីយប់ថ្ងៃសៅរ៍នោះគឺជំនួបរវាង ម៉ន សាម៉េត និង រឿន សុខលី ពិតជាជក់អារម្មណ៍ខ្លាំង ព្រោះ ម៉ន សាម៉េត គ្មានបន្ធូរដៃឲ្យសិស្សប្អូន សុខលី នោះទេ ដោយគេបានខំវាយសម្រុកតាំងពីទឹកទី ១ ។ សុខលី មិនសូវហ៊ានវាយប្រហារទៅលើសិស្សច្បងនោះទេ តែការស៊ូទ្រាំរបស់គេបានត្រឹមតែ ២ ទឹកក៏ត្រូវបាន ម៉ន សាម៉េត ម៉ាត់ និងជង្គង់បណ្តាលឲ្យសន្លប់។
យ៉ាងណាក៏ដោយក្រោយផ្តួល រឿន សុខលី ដែលជាសិស្សរួមគ្រូធ្លាប់រស់នៅហ្វឹកហាត់ជាមួយគ្នាដូចបងប្អូននោះ ម៉ន សាម៉េត បាននិយាយថា៖ «អាណិតសិស្សប្អូនណាស់ ប៉ុន្តែខ្ញុំមិនអាចបន្ធូរដៃឲ្យគេបានទេ ព្រោះការប្រកួតទាមទារកក់កៅអីនៅវគ្គទី ៣ ពាក់កណ្តាលផ្តាច់ព្រ័ត្រ គឺថាបើចាញ់ ធ្លាក់»។
រឿងរ៉ាវអ្នកប្រដាល់លើសង្វៀនពិតជាលំបាកពណ៌នាណាស់ពេលខ្លះមិត្តភក្តិ បងប្អូន រួមអាជីពត្រូវវិលមកប្រកួតគ្នាក្នុងលក្ខណៈមួយមិនអាចបន្ធូរដៃបាន។ ម៉ន សាម៉េត បញ្ជាក់ថា៖ «ខ្ញុំត្រូវការឈ្នះឡើងទៅប៉ះជាមួយ យុគ យក្សផ្លែ ហើយបន្តទៅវគ្គផ្តាច់បព្រ័ត្រ ដើម្បីដណ្តើមយកទឹកប្រាក់ ៤០០០ ដុល្លារ។ ប៉ុន្តែខ្ញុំមានចិត្តអាណិត សុខលី ណាស់ គេគ្រាំគ្រាដោយកណ្តាប់ដៃរបស់ខ្ញុំ»។
ម៉ន សាម៉េត បានបន្តថា៖ «តាមរូបមន្តប្រកួត ខ្ញុំត្រូវជួបជាមួយ ម៉ន រដ្ឋា ជាបងប្អូនដែរ ប៉ុន្តែដោយសារគេជួយគ្រោះថ្នាក់ចរាចរណ៍រងរបួសធ្ងន់ចូលពេទ្យសង្គ្រោះបន្ទាន់នោះ ខ្ញុំត្រូវប៉ះ រឿន សុខលី វិញ ដែលជាសិស្សប្អូនខ្ញុំដូចគ្នា»។
សម្រាប់ការប្រកួតជម្រុះកាលពីយប់ថ្ងៃសៅរ៍នោះដែរអ្នកប្រដាល់ យុគ យក្សផ្លែ របស់ក្លិបបូរីរាជសីហ៍មានរិទ្ធបានយកឈ្នះ សេន កុសល មកពីក្លិបមោងឫស្សីមរតកគុនខ្មែរដោយពិន្ទុទាំងលំបាកលំបិន ហើយលទ្ធផលនេះបានធ្វើឲ្យ យក្សផ្លែ ត្រូវជួប ម៉ន សាម៉េត នៅវគ្គពាក់កណ្តាលផ្តាច់ព្រ័ត្រ។
ការប្រកួតដែលមានលក្ខណៈតឹងតែងនេះបានធ្វើឲ្យសង្វៀនប្រដាល់ប៉ុស្តិ៍លេខ ៥ ហាក់ដូចជាងើបមុខមាត់មានប្រជាប្រិយវិញខ្លះ ខណៈអាជ្ញាកណ្ដាលចៅក្រមហាក់ដូចជាធ្វើការល្អជាងមុន ព្រោះមន្ត្រីចាស់មួយចំនួនដែលមានឈ្មោះអាក្រក់នោះគេទុកឲ្យនៅស្ងៀមមិនធ្វើការឲ្យចាំតែបើកលុយ។ ចំណែកគូអន្តរជាតិកំដរឆាកគឺកីឡាករ ម៉ន ព្រហ្មម៉ាញ បានចុះចាញ់អ្នកប្រដាល់ថៃ Kong Bory នៅទឹកទី ២ បន្ទាប់ពីថៃរូបនេះប្រើជើងធាក់លើពោះខ្លាំងៗបណ្តាលឲ្យចុកឆ្អល់៕
