ភ្នំពេញ៖ ព្រឹត្តិការណ៍ «រត់ដើម្បីសប្បុរសធម៌ជាមួយសាយ» ដែលបានចាប់ផ្តើមតាំងពីថ្ងៃទី ៦ ខែ តុលា ឆ្នាំ ២០២០ នោះ គឺគិតត្រឹមព្រឹកថ្ងៃទី ១០ ខែមករា បានបន្តរត់ពីក្រុងតាខ្មៅ ខេត្តកណ្តាល មកដល់សាកលវិទ្យាល័យភូមិន្ទភ្នំពេញវិញហើយ ហើយតាមរយៈការរត់ចំនួន ៩៧ ថ្ងៃ មានចម្ងាយផ្លូវសរុប ២ ៤០៨ គីឡូម៉ែត្រនេះ សាយ ទទួលបានប្រាក់ឧបត្ថម្ភពីសប្បុរសជន ៤៧ ម៉ឺនដុល្លារហើយ សម្រាប់យកទៅជួយដល់មន្ទីរពេទ្យកុមារអង្គរ។
យុវវ័យជាតារាចម្រៀង និងសម្ដែង អ៊ួន បឋម ហៅ សាយ (Sai) ដែលជាអ្នកបង្កើតឱ្យមានព្រឹត្តិការណ៍នេះឡើងបានប្រាប់ថា៖ «កម្មវិធីរត់នេះ មានឧបសគ្គធំជាច្រើន ដោយបញ្ហាកូវីដ ១៩ ប៉ុន្តែខ្ញុំសម្រេចបានល្អ ដោយមានយុវជន និងមហាជនចូលរួមគាំទ្រច្រើន ព្រោះនេះជាកម្មវិធីមនុស្សធម៌សម្រាប់កុមារ ហើយកត្តាសំខាន់ ជំរុញឱ្យខ្ញុំបង្កើតព្រឹត្តិការណ៍នេះឡើង គឺក្រោយពីបានឃើញព័ត៌មានផ្សព្វផ្សាយពីបញ្ហាប្រឈមផ្នែកថវិការបស់មន្ទីរពេទ្យកុមារអង្គរ ដោយសារខ្ញុំធ្លាប់បាននាំសាច់ញាតិទៅព្យាបាលនៅមន្ទីរពេទ្យ ដោយឥតគិតថ្លៃនាពេលកន្លងមក»។
លោក សាយ បន្តថា៖ «ក្មេងៗរស់នៅភូមិជាមួយខ្ញុំជាច្រើន បានទៅព្យាបាលនៅមន្ទីរពេទ្យនេះ ដោយមុនដំបូង ពេលខ្ញុំយកក្មេងទៅព្យាបាល ខ្ញុំគិតថា នឹងត្រូវចំណាយថវិកា ប៉ុន្ដែក្រោយព្យាបាលជាសះស្បើយ មន្ទីរពេទ្យមិនបានយកកម្រៃឡើយ ហើយក្នុងពេលព្យាបាលមន្ទីរពេទ្យមិនមានការរើសអើងចំពោះប្រជាពលរដ្ឋអ្នកមាន ឬក្រទេ»។
ជាមួយនឹងការតាំងចិត្តរកថវិកាជួយដល់កុមារកម្ពុជានេះ លោក សាយ បានដាក់ផែនការរត់តែម្នាក់ឯង តាមបណ្តោយផ្លូវជុំវិញព្រំដែនប្រទេសកម្ពុជា រយៈពេល ៩៩ ថ្ងៃ ហើយត្រឹមថ្ងៃទី ១០ ខែ មករា ឆ្នាំ ២០២១ បាន ៩៧ ថ្ងៃហើយ ដោយចាប់ពីរាជធានីភ្នំពេញទៅកាន់ខេត្តចំនួន ២០ ដើម្បីរៃអង្គាសថវិកាឧបត្ថម្ភ ដល់មន្ទីរពេទ្យកុមារអង្គរ។
លោក សាយ បានបញ្ជាក់ថា៖ «យុទ្ធនាការនេះ មានគោលបំណងជំរុញ និងបំផុសស្មារតីរបស់ប្រជាពលរដ្ឋខ្មែរទាំងអស់ ឱ្យចូលរួមទាំងអស់គ្នា ក្នុងចំនួនទឹកប្រាក់ ១ ដុល្លារ បរិច្ចាគមកកាន់មន្ទីរពេទ្យអង្គរ ដើម្បីបន្តដំណើរការប្រតិបត្តិក្នុងការផ្តល់សេវាពិនិត្យព្យាបាល និងថែទាំសុខភាពដល់កុមារកម្ពុជាតទៅមុខទៀត ខណៈពេលដែលមន្ទីរពេទ្យកំពុងតែជួបការលំបាកក្នុងការស្វែងរកមូលនិធិពីសប្បុរសជនទាំងក្នុង និងក្រៅប្រទេស»។
លោកស្រី ស៊ិនកេត អរុន ប្រធានការិយាល័យទំនាក់ទំនងសាធារណៈប្រចាំប្រទេសកម្ពុជានៃមន្ទីរពេទ្យកុមារអង្គរបានថ្លែងថា៖ «មន្ទីរពេទ្យកុមារអង្គរ ព្រមទាំងមាតាបិតាអាណាព្យាបាលកុមារទាំងអស់នៅមន្ទីរពេទ្យនេះ ពិតជាមានកិត្តិយស និងសោមនស្សរីករាយណាស់ ចំពោះទឹកចិត្តដ៏សប្បុរសរបស់បងប្អូនប្រជាជនខ្មែរ ដែលបានចូលរួមបរិច្ចាគថវិកា មកកាន់មន្ទីរពេទ្យជាបន្តបន្ទាប់ តាមរយៈគណនីធនាគាររបស់មន្ទីរពេទ្យផ្ទាល់»។
យោងតាមលិខិតថ្លែងអំណរគុណរបស់មន្ទីរពេទ្យកុមារអង្គរបានឱ្យដឹងថា យុទ្ធនាការ «តោះលេងហ្គេម ១ ដុល្លារ សម្រាប់កុមារកម្ពុជា» បានបង្កើតឡើងក្នុងពេលធ្វើព្រឹត្តិការណ៍រត់ ដើម្បីសប្បុរសធម៌ជាមួយសាយ ដោយយុទ្ធនាការនេះ បានក្លាយទៅជាចលនាយ៉ាងផុសផុល និងទទួលការគាំទ្រពីប្រជាពលរដ្ឋខ្មែរនៅក្នុងបណ្តាញសង្គមហ្វេសប៊ុក។
លោកស្រី អរុន បញ្ជាក់ថា មន្ទីរពេទ្យកុមារអង្គរបានបង្កើតឡើងក្នុងឆ្នាំ ១៩៩៩ ហើយបច្ចុប្បន្នមន្ទីរពេទ្យនេះមានគ្រូពេទ្យ និងបុគ្គលិកជិត ៥០០ នាក់។ មន្ទីរពេទ្យបានទទួលពិនិត្យ និងព្យាបាលកុមារនៅខេត្ដសៀមរាប និងកុមារមកពីបណ្ដាខេត្ដផ្សេងៗក្នុង ១ ឆ្នាំ មានជាង ១៨ ម៉ឺនករណី ដោយមន្ទីរពេទ្យទទួលព្យាបាលកុមារជំងឺទូទៅសម្រាប់កុមារមានអាយុក្រោម ១៦ ឆ្នាំ ដោយឥតគិតកម្រៃ៕