ភ្នំពេញ៖ កីឡាករកម្ពុជា រិន សារដ្ឋ របស់ក្លិបកងទ័ពជើងទឹក នឹងវិលទៅជួបគូសត្រូវចាស់មកពីប្រទេស ថៃ Loom Leng នៅក្នុងការប្រកួតជម្រុះដណ្តើមខ្សែក្រវាត់ខារ៉ាបាវរដូវកាលទី ១០ ក្នុងទម្ងន់ ៦៣,៥ គីឡូក្រាម នៅលើសង្វៀន SEATV នារសៀលថ្ងៃសៅរ៍ខាងមុខនេះ ហើយវាក៏ជាពេលដែល រិន សារដ្ឋ ត្រូវជម្រះបញ្ជីចាស់ជាមួយ Loom Leng សម្រាប់ការបរាជ័យ ២ លើកកន្លងមកផងដែរ។
យ៉ាងណាក៏ដោយ ការវិលមកជួបគ្នាលើកនេះ គេសង្កេតឃើញថា រិន សារដ្ឋ លំបាកក្នុងការយកឈ្នះ Loom Leng ណាស់ ព្រោះ សារដ្ឋ ធ្លាប់វាយចាញ់ពិន្ទុចំនួន ២ ដងរួចទៅហើយនោះ គឺគ្មានស្នៀតអ្វីធ្វើឲ្យ Loom Leng ខ្លាច ឬស្រុតកម្លាំងនោះទេ។ Loom Leng ជាបេក្ខភាពដែលធ្លាប់ឈ្នះម្ចាស់ខ្សែក្រវាត់ខារ៉ាបាវ ទម្ងន់ ៦៣,៥ គីឡូក្រាមនេះ កាលពីរដូវកាលចាស់ ហើយគេល្អលើការទាត់ និងជង្គង់។
បន្ថែមលើនេះ Loom Leng ជាអ្នកប្រដាល់ជើងចាស់ ដែលធ្លាប់មកប្រកួតនៅកម្ពុជាជាង ២០ ដង ហើយទទួលបានលទ្ធផលឈ្នះច្រើនជាងប្រកួតចាញ់។ Loom Leng មានកំណត់ត្រាប្រកួតបាន ៨៣ ដង ឈ្នះ ៦៨ ចាញ់ ១៣ និងស្មើ ២ ដង គឺច្រើនជាងកីឡាករ រិន សារដ្ឋ ដែលធ្លាប់ប្រកួតបាន ៥២ ដង ឈ្នះ ៣៦ លើក ចាញ់ ១១ លើក និងស្មើ ៥ ដង។
លោក ថាញ់ វ៉ាឡេក គ្រូបង្វឹកថៃ ប្រាប់ថា៖ «Loom Leng ធានាឈ្នះ រិន សារដ្ឋ ១០០ ភាគរយ គឺខ្លាចចូលតែស្នៀតកែងដោយចៃដន្យប៉ុណ្ណោះ»។ ចំណែកអ្នកគ្រប់គ្រងកីឡាករ រិន សារដ្ឋ គឺលោកស្រី ឆានុន បានអះអាងថា៖ «សារដ្ឋ ហាត់ត្រៀមបានល្អ និងសង្ឃឹមឈ្នះ ៨០ ភាគរយ ហើយការចាញ់ ២ លើកកន្លងមក គឺត្រឹមពិន្ទុប្រផិតប្រផើយប៉ុណ្ណោះ»។
ជាមួយគ្នានេះ អ្នកប្រដាល់កម្ពុជា យ៉េន ឌីណា របស់សមាគមកីឡាប្រដាល់ក្រសួងកសិកម្ម ក៏ត្រូវប្រកួតដណ្តើមយក ៣ ពិន្ទុ ជាមួយថៃ Chhang Soek នៅរសៀលថ្ងៃសៅរ៍នោះផងដែរ ខណៈអ្នកទាំង ២ មិនធ្លាប់ជួបគ្នាពីមុនមកនោះទេ។
យ៉េន ឌីណា មួយរយៈនេះ ទទួលបានលទ្ធផលល្អ និងអាចស្តារមុខមាត់ឡើងវិញ តាមរយៈការប្រកួតទទួលបានជ័យជម្នះ ពិសេសធ្លាប់បានឈ្នះ Loom Leng ចំនួន ២ លើកមកហើយ។ ចំណែក Chhang Soek នេះ ធ្លាប់មកប្រកួតនៅកម្ពុជា ២ លើកដែរ តែទទួលបានបរាជ័យ ខណៈការប៉ះ យ៉េន ឌីណា ក្នុងជុំទី ២ ត្រូវបានគេទស្សន៍ទាយថា មិនអាចឈ្នះ ឌីណា បានឡើយហើយការប្រកួតរបស់គូនេះ ក៏គ្មានរំពឹងទាក់ទាញនោះដែរ។
កីឡាករ Chhang Soek ធ្លាប់ប្រកួត ៧០ ដង ឈ្នះ ៦១ ចាញ់ ៨ លើក និងស្មើ ១ ដង ហើយកាលប្រកួតជម្រុះជុំទី ១ គេបានចាញ់ រិន សារដ្ឋ ស្វ័យប្រវត្តិ ដោយសារលើសទម្ងន់។ ដូច្នេះ គេមានពិន្ទុសូន្យនៅឡើយ ខណៈដែល យ៉េន ឌីណា បាន ៣ ពិន្ទុ ក្នុងដៃ ដោយវាយឈ្នះLoom Leng ទាំងវេទនាភ្នែក។
គួរបញ្ជាក់ថា សម្រាប់ការប្រកួតដណ្តើមខ្សែក្រវាត់ខារ៉ាបាវ ក្នុងទម្ងន់ ៦៣,៥ គីឡូក្រាម រដូវកាលទី ១០ នេះ មានអ្នកប្រដាល់ខ្លាំងៗចំនួន ៨ រូប ក្នុងនោះមានកម្ពុជា ៤ នាក់ គឺ រិន សារដ្ឋ, យ៉េន ឌីណា, ពុយ វណ្ណៈ និង សេង ស្រឿន ព្រមទាំងអ្នកប្រដាល់ថៃ ៤ នាក់ មាន Chhang Soek, Loom Leng, Kolap Dam) និង Far Nemith ហើយពូលកម្ពុជា និងថៃ ត្រូវប្រកួតជម្រុះវិលជុំ រួចយកចំណាត់ថ្នាក់លេខ ១ តាមពូលទាំង ២ ឡើងទៅវគ្គផ្តាច់ព្រ័ត្រដណ្តើមយកខ្សែក្រវាត់តែម្តង៕