ភ្នំពេញៈ កីឡាករកម្ពុជា សុខ សាវិន នឹងត្រូវប្រកួតដណ្តើម ៣ ពិន្ទុលើកចុងក្រោយជាមួយអ្នកប្រយុទ្ធរបស់ថៃ Phat Ngam នៅលើសង្វៀន SEATV នៅថ្ងៃសៅរ៍មុនពេលរូបគេឆ្លងទៅប្រកួតវគ្គពាក់កណ្តាលផ្តាច់ព្រ័ត្រនៃខ្សែក្រវាត់ខារ៉ាបាវ ទម្ងន់ ៦០ គីឡូក្រាម ចំណែកជំនួបបង្គ្រប់កិច្ចរបស់កីឡាករ វៀត ប៊ុនឌឿន និងថៃ Den Sayam អាចនឹងអត់ប្រាក់តម្លៃខ្លួន បើសិនជាពួកគេវ៉ៃគ្នាធ្វើលំៗយកតែរួចខ្លួននោះ។
សម្រាប់ការប្រកួតជម្រុះ ៣ លើកកន្លងមកនេះ វៀត ប៊ុនឌឿន និង Den Sayam ឈ្នះថៃ ១ លើក និងចាញ់ ២ លើកយ៉ាងផុយស្រួយ។ តាមការសង្កេតពីសមត្ថភាពរបស់ ប៊ុន ឌឿន នៅក្នុងព្រឹត្តិការណ៍នេះមានកម្រិតវិជ្ជាគុនវ៉ៃអន់មែនទែន គឺធ្លាក់ចុះជាងមុនឆ្ងាយណាស់។ ចំណែក Den Sayam ឈ្នះ ១ និងចាញ់ ២ ដង មាន ៥ ពិន្ទុដូចគ្នា។ ហេតុនេះទោះលទ្ធផលប្រកួតលើកនេះបែបណាក៏ពួកគេត្រូវធ្លាក់ចេញពីការប្រកួតខ្សែក្រវាត់នេះដូចគ្នា។
ជាមួយលក្ខខណ្ឌប្រកួតត្រឹមបង្គ្រប់កិច្ចនេះនាយកគ្រប់គ្រងកម្មវិធីប្រកួតប្រចាំនៅសង្វៀន SEATV លោក ញាន សុធី បាននិយាយបង្ការទុកមុនថា៖ «ទោះគូនេះប្រកួតបង្គ្រប់កិច្ចតាមរូបមន្ត ប៉ុន្តែបើកីឡាករណាវ៉ៃមិនអស់ពីសមត្ថភាព ឬប្រកួតលំៗ យើងមិនផ្តល់តម្លៃខ្លួនឲ្យទេ គឺប្រឈមទៅនឹងបណ្តេញចេញ មិនប្រកាសលទ្ធផល»។
ចំណែកការវិលមកជួបគ្នារបស់ សុខ សាវិន និង Phat Ngam បានក្លាយជាការប្រកួតគួរឲ្យចាប់អារម្មណ៍ ព្រោះពួកគេឈរនៅលើកំពូលតារាងតាមពូលរៀងៗខ្លួននោះ ដោយក្នុងនោះ សុខ សាវិន ឈ្នះទាំង ៣ ប្រកួតមាន ៩ ពិន្ទុ ចំណែក Phat Ngam ៣ប្រកួតអវត្តមាន ១ ដង ឈ្នះ ២ ដងមាន ៦ ពិន្ទុ ឈរនៅកំពូលតារាងក្នុងពូល B។
ប៉ុន្តែ សាវិន នឹងប្រកួតដោយគ្មានការបារម្ភ ព្រោះគេមានកៅអីឡើងទៅវគ្គពាក់កណ្តាលផ្តាច់ព្រ័ត្រដោយស្វ័យប្រវត្តិទៅហើយ ចំណែក Phat Ngam ប្រសិនបើចាញ់ក៏ទំនងជាគ្មានបញ្ហាអ្វីដែរ ព្រោះក្នុងចំណោមថៃដូចគ្នាមានពិន្ទុតិចជាង ហើយរូបមន្តត្រូវជ្រើសយកឈរនៅលេខ ១ និងលេខ ២ ក្នុងពូលនីមួយៗ ឡើងទៅប្រកួតវគ្គពាក់កណ្តាលផ្តាច់ព្រ័ត្រ។
លោក ស៊ន អេលីត ជាគ្រូបង្វឹកបាននិយាយថា៖ «សុខ សាវិន ហ្វឹកហាត់ត្រៀមប្រកួតបានល្អ ដោយសង្ឃឹមឈ្នះ ៩០ ភាគរយ ហើយលើកនេះ បើ សាវិន មិនឈ្នះបានខ្សែក្រវាត់ទៀតគឺអស់ឱកាសហើយ»។ តាមរយៈការបូកពិន្ទុក្នុងវគ្គជម្រុះនេះជាបណ្តោះអាសន្នឃើញថា សុខ សាវិន និង ចាន់ សំអាត បានឈានទៅវគ្គពាក់កណ្តាលផ្តាច់ព្រ័ត្រតំណាងឲ្យពូល A។
ទោះជាយ៉ាងណាលោក ថាញ់ វ៉ាឡេក ជាគ្រូបង្វឹកថៃបានប្រាប់ថា៖ «កីឡាករ Phat Ngam មិនងាយនឹងចុះចាញ់ងាយៗទេ។ ការប្រកួតនេះសុទ្ធតែរំពឹងឈ្នះដូចគ្នា ព្រោះខាង Phat Ngam មិនទាន់ច្បាស់ថា ទទួលបានកក់កៅអីនៅឡើយ ព្រោះរង់ចាំលទ្ធផលបូកសរុបជាមួយកីឡាករក្នុងពូលជាមួយគ្នាសិន អ៊ីចឹងគឺត្រូវប្រឹងប្រែងឲ្យអស់ពីសមត្ថភាពដូចគ្នា»៕