.jpg)
សិក្ខាកាមទាំង៣២នាក់ ថតជាមួយគណៈអធិបតី និងគ្រូឧទ្ទេស។ ពន្លក
ភ្នំពេញ៖ សហព័ន្ធកីឡាអុកចត្រង្គកម្ពុជា បានបើកវគ្គបណ្តុះបណ្តាលគ្រូបង្វឹកកីឡាអុកចត្រង្គកម្រិតជាតិ នៅសាលប្រជុំនាយកដ្ឋានអប់រំកាយ និងកីឡា ក្នុងពហុកីឡដ្ឋានជាតិ ដោយមានសិក្ខាកាមចូលរួម ៣២ នាក់ មកពីទាំង ២៤ ខេត្ត និងរាជធានី ហើយវគ្គនេះ មានរយៈពេល ៥ ថ្ងៃ ដោយបានផ្តើមតាំងពីថ្ងៃទី ៥ រហូតដល់ថ្ងៃទី ៩ ខែ តុលា ឆ្នាំ ២០២០។
វគ្គបណ្តុះបណ្តាលនេះ ស្ថិតក្នុងគម្រោងចំណាយរបស់ក្រសួងអប់រំ យុវជន និងកីឡា ដែលសហព័ន្ធកីឡាអុកចត្រង្គកម្ពុជាទទួលបាន ៦០ លានរៀល ដើម្បីធ្វើសកម្មភាពហ្វឹកហាត់បណ្តុះបណ្តាល និងទំនាក់ទំនងរដ្ឋបាលដូចសហព័ន្ធចំនួន ៤១ ទៀត ក្នុងគោលបំណងត្រៀមស៊ីហ្គេមលើកទី៣២ ឆ្នាំ ២០២៣ ដែលកម្ពុជាធ្វើម្ចាស់ផ្ទះ។
លោក គុជ គឹមឡុង ប្រធានសហព័ន្ធកីឡាអុកចត្រង្គកម្ពុជាបានថ្លែងថា៖ «សកម្មភាពកីឡានេះ គឺជាការរួមចំណែក និងឆ្លៀតពេលលះបង់ ដើម្បីឱ្យមានសកម្មភាពទៅតាមផែនការរបស់ក្រសួងអប់រំ ក៏ដូចជា NOCC។ គ្រប់ការងារនេះ ខ្ញុំបានឯកភាពទាំងស្រុង ជាមួយគណៈកម្មាធិការប្រតិបត្តិសហព័ន្ធ ដែលធ្វើសកម្មភាពសហការជាមួយមន្ត្រីជំនាញរបស់ក្រសួង និងគ្រូបង្វឹកជម្រើសជាតិរបស់យើង ដើម្បីឱ្យល្អប្រសើរក្នុងទិសដៅផលិតគ្រូបង្វឹកឱ្យបាន និងបញ្ជូនទៅបង្វឹក និងបង្រៀនតាមប្រទេសក្នុងអាស៊ាន ហើយយើងត្រៀមដាក់បញ្ជូលប្រភេទកីឡាយើងនេះ ចូលក្នុងស៊ីហ្គេម ២០២៣ ឱ្យទទួលបានលទ្ធផលល្អ»។
លោក ហូយ សូណា អតីតស្តេចអុកដែលបច្ចុប្បន្នជាគ្រូជម្រើសជាតិ និងជាគ្រូឧទ្ទេស ជាមួយលោក ប៊ិន គាសេង ជាគ្រូជំនួយបានប្រាប់ថា៖ «វគ្គបណ្តុះបណ្តាលរយៈពេល ៥ ថ្ងៃនេះ មានសិក្សាអំពីបុគ្គលលក្ខណៈជាគ្រូបង្វឹកលក្ខខណ្ឌនៃការលេងអុកចំនួន ៣ ក្បួន និងយុទ្ធសាស្រ្តការលេងអុក។ លើសពីនេះ មានបន្ថែមនូវបទពិសោធនៃការលេងអុក ការគ្រប់គ្រង ព្រមទាំងបច្ចេកទេសការចល័តកូនអុក វិន័យការទទួលខុសត្រូវរបស់គ្រូ គរុកោសល្យ គ្រូការស្រាវជ្រាវ និងការអភិវឌ្ឍ ការលើកទឹកចិត្ត ផែនការបង្រៀន ការពិនិត្យតាមដាន និងការលេងដោយពិនិត្យលើលទ្ធផលផងដែរ»។
ចំណែកលោក ប៊ិន គាសេង និយាយថា៖ «វគ្គបណ្តុះបណ្តាលនេះ មានគោលបំណងឱ្យគ្រូបង្វឹក មានជាប្រចាំនៅតាមបណ្តាក្លិបកីឡាអុកចត្រង្គទូទំាងប្រទេស និងជាជំហានឆ្ពោះទៅរកភាពជោគជ័យក្នុងការជួយបណ្តុះបណ្តាលធនធានមនុស្សលើវិស័យអប់រំកាយ និងកីឡា ហើយក្លាយជាធនធានប្រកបដោយទេពកោសល្យ ស្របគ្នាជាមួយនឹងគោលនយោបាយកីឡាជាតិ គឺផែនការយុទ្ធសាស្រ្តអភិវឌ្ឍន៍វិស័យអប់រំកាយ និងកីឡា ត្រៀមស៊ីហ្គេម ឆ្នាំ ២០២៣»។
លោក គ្រួច ចន្ថារិទ្ធ គ្រូជំនួយជម្រើសជាតិបានប្រាប់ថា ទោះជាសហព័ន្ធជាប់រវល់វគ្គបណ្តុះបណ្តាលសម្រាប់គ្រូបង្វឹកក្លិប ឬតំណាងខេត្ត ប៉ុន្តែក្រុមជម្រើសជាតិនៅតែដំណើរការហ្វឹកហាត់ជាធម្មតា ក្នុង ១ ថ្ងៃ ៦ ម៉ោងជានិច្ច។ ចំពោះសិក្ខាកាមទាំង ៣២ នាក់ក្នុងវគ្គនេះ ភាគច្រើនមកពីបណ្តាក្លិបក្នុងរាជធានីភ្នំពេញ និងតំណាងមកពីខេត្តសឹងតែគ្រប់ទាំងអស់៕
