.jpg)
គ្រូឧទ្ទេសលោក Wong Sam ពេលបង្ហាញពីការអនុវត្តអុំទូករ៉ូអីុង នៅលើឧបករណ៍ទំនើប ។ រូបថត សហការី
ភ្នំពេញ៖ វគ្គបណ្តុះបណ្តាលសាមគ្គីអូឡាំពិក ស្តីពីគ្រូបង្វឹកបច្ចេកទេសកីឡាទូករ៉ូអ៊ីង ត្រូវបានផ្តល់ជូនជាលើកដំបូង ដល់សិក្ខាកាមចំនួន ២៥ នាក់ មកពីស្ថាប័នចំនួន ៥ ក្នុងសហព័ន្ធកីឡាជាតិ ហើយវគ្គនេះគណៈកម្មាធិការជាតិអូឡាំពិកកម្ពុជា (NOCC) សហការជាមួយអង្គការសាមគ្គីអូឡាំពិក (OS) ដែលជាស្ថាប័នជំនាញផ្នែកបណ្តុះបណ្តាលកីឡារបស់គណៈកម្មាធិការអូឡាំពិកអន្តរជាតិ (IOC) ក្នុងការរៀបចំឡើងរយៈពេល ១ សប្តាហ៍ពេញ នៅទីលានព្រែកកំពត លើផ្ទៃសមុទ្ររបស់មណ្ឌលកីឡាលើទឹកកម្ពុជាក្រុងកំពត ខេត្តកំពត។
លោក តុប បញ្ញា មន្ត្រីនៃគណៈកម្មាធិការជាតិអូឡាំពិកកម្ពុជា និងជាប្រធានគ្រប់គ្រងវគ្គបណ្តុះបណ្តាលនេះ បានប្រាប់ភ្នំពេញប៉ុស្តិ៍ថា៖ «នេះជាវគ្គលើកដំបូងនៃប្រភេទកីឡាលើទឹក គឺទូករ៉ូអ៊ីងរបស់កម្ពុជា ដែលទទួលបានវគ្គបណ្តុះបណ្តាលបែបនេះ ប៉ុន្តែសម្រាប់គម្រោងរបស់អង្គការសាមគ្គីអូឡាំពិក ក្នុងឆ្នាំ ២០១៩ មានចំនួន ៣ លើកនេះ បានផ្តល់ជូនប្រភេទកីឡាបាល់ទះ ១ លើក និងកីឡាយូដូ ១ លើករួចហើយ ខណៈកីឡាទូករ៉ូអ៊ីងនេះ ជាគម្រោងទី ៣ ចុងក្រោយប្រចាំឆ្នាំ ២០១៩»។
លោក តុប បញ្ញា បានបន្ថែមថា គម្រោងរបស់អង្គការសាមគ្គីអូឡាំពិក ដែលជាស្ថាប័នជំនាញផ្នែកបណ្តុះបណ្តាលកីឡាក្នុងគណៈកម្មាធិការអូឡាំពិកអន្តរជាតិ ដោយសហការជាមួយ NOCC នេះ ក្នុង ១ ឆ្នាំមានត្រឹមខ្ទង់ ៣ លើកប៉ុណ្ណោះ ខណៈដែលគ្រូឧទ្ទេស និងអ្នកជំនាញ ព្រមទាំងជំនួយការ ដែលបញ្ជូនមក ត្រូវបានទទួលស្គាល់លំដាប់កម្រិតគ្រូអូឡាំពិកអន្តរជាតិ។
លោក ស៊្រុន លាង គ្រូបង្វឹកកីឡាទូកជម្រើសជាតិកម្ពុជា ដែលដឹកនាំសិក្ខាកាមចំនួន ២៥ នាក់នោះ បានប្រាប់ឲ្យដឹងថា សិក្ខាកាមមានមកពីសមាគមកីឡាទូករ៉ូអ៊ីងក្រសួងមហាផ្ទៃ មានមកពីកងទ័ពជើងទឹកនៃក្រសួងការពារជាតិ មកពីរាជធានីភ្នំពេញ មកពីខេត្តកណ្តាល និងម្ចាស់ផ្ទះខេត្តកំពត ដែលសិក្សារយៈពេលពេញ ១ សប្តាហ៍ គឺចាប់ផ្តើមតាំងពីថ្ងៃ ១៨ ហើយនឹងត្រូវបញ្ចប់នៅថ្ងៃទី ២៤ ខែ វិច្ឆិកា ឆ្នាំ ២០១៩។
លោក ស៊្រុន លាង បានបន្ថែមថា៖ «ខ្លឹមសារនៃការ-បង្វឹកនេះ គឺមានគោលបំណងបង្ហាត់ឲ្យសិក្ខាកាមចេះអុំទូករ៉ូអ៊ីង ទៅតាមបច្ចេកទេសជាបឋម និងបង្វឹកពីទេពកោសល្យនៃការអុំ ដើម្បីទទួលបានជំនាញនេះ ទៅបង្វឹកដល់អត្តពលិក ព្រោះវគ្គនេះគេឲ្យឈ្មោះថា កម្រិតមូលដ្ឋានប៉ុណ្ណោះ»។
ទោះជាយ៉ាងណា លោក ស្រ៊ុន លាង បានចាត់ទុកវគ្គសាមគ្គីអូឡាំពិក ស្តីពីគ្រូបង្វឹកបច្ចេកទេសកីឡាទូករ៉ូអ៊ីងនេះថា ជាវគ្គសំខាន់ដែលមានគ្រូឧទ្ទេស គឺលោក WONG SAM ជាគ្រូជំនាញមកពីក្រុងហុងកុង និងសហការី ២ នាក់ទៀត។
លោកបញ្ជាក់ថា៖ «សិក្ខាកាមទាំងអស់ គឺភាគច្រើនត្រូវអនុវត្តជាក់ស្តែង ក្នុងទីលានផ្ទាល់ ព្រោះលោកឧត្តមសេនីយ៍ឯក ជា ប៊ុនហេង ជំនួយការរបស់សម្តេចក្រឡាហោម ស ខេង និងជាអគ្គលេខាធិការសហព័ន្ធកីឡាទូកកម្ពុជា បានទិញទូកចំនួន ៤ គ្រឿង មកពីក្រៅប្រទេសសម្រាប់បង្វឹកក្នុងលក្ខណៈស្តង់ដាអន្តរជាតិ នៅក្នុងវគ្គនេះផងដែរ»៕
