ភ្នំពេញៈ វគ្គបណ្តុះបណ្តាលគ្រូបង្វឹកកីឡាប្រដាល់គុនខ្មែរ កម្រិតបឋមដែលផ្តោតទៅលើការថ្វាយបង្គំគ្រូគរុកោសល្យនៃការបង្វឹកព្រមទាំងច្បាប់ និងលក្ខខ័ណ្ឌមួយចំនួនទាក់ទងទៅនឹងពេលកំពុងប្រកួត និងស្វែងយល់ពីវិទ្យាសាស្ត្រកីឡា សុខភាព និងសង្គ្រោះបឋមនោះបានបញ្ចប់នៅពហុកីឡដ្ឋានជាតិអូឡាំពិកកម្ពុជាកាលពីល្ងាចថ្ងៃព្រហស្បតិ៍។
លោក អ៊ុក សិទ្ធិជាតិ អគ្គនាយកកីឡានៃក្រសួងអប់រំ យុវជន និងកីឡា លោក ម៉ក់ សំអុល ទីប្រឹក្សាជាន់ខ្ពស់នៃគណៈកម្មាធិការជាតិអូឡាំពិកកម្ពុជា និងប្រធានសមាគមប្រដាល់ក្រសួងមហាផ្ទៃ និងលោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ និងមន្ត្រីជំនាញកីឡាជាច្រើនទៀត សុទ្ធតែបានចូលរួមនៅក្នុងពិធីបិទវគ្គនេះ ខណៈវគ្គបណ្តុះបណ្តាលនេះបានចាប់ផ្តើមកាលពីថ្ងៃចន្ទ ហើយមានសិក្ខាកាមចូលរួមចំនួន ២៦ ដែលបង្ហាត់បង្ហាញដោយគ្រូឧទ្ទេសចំនួន ១០ នាក់។
លោក រាជ្យ សុផែន អគ្គលេខាធិការរងនៃសហព័ន្ធកីឡាប្រដាល់គុនខ្មែរ និងជាគ្រូឧទ្ទេសម្នាក់ក្នុងវគ្គនេះបានប្រាប់ថា៖ «វគ្គបឋមនេះបានរៀបចំឡើងរយៈពេល ៤ ថ្ងៃមកហើយ គឺជាវគ្គបណ្តុះបណ្តាលដែលជ្រើសរើសសិក្ខាកាមមកពីក្លិប សមាគម ហើយអ្នកទាំងនោះភាគច្រើនជាកីឡាករឆ្នើមៗមានវ័យចំណាស់បន្តិច និងអតីតអ្នកប្រដាល់ឆ្នើមដែលបច្ចុប្បន្នកំពុងជាអ្នកបង្វឹកក្មេងៗជំនាន់ក្រោយនៅក្នុងរាជធានីភ្នំពេញ»។
លោកបន្ថែមថា៖ «តាមការវាយតម្លៃសិក្ខាកាមរយៈពេល ៤ ថ្ងៃពីលោក និន ភារម្យ អគ្គលេខាធិការ និងជាប្រធានគ្រប់គ្រងវគ្គនេះគឺសិក្ខាកាមចំនួន ១០ នាក់បានទទួលនិទ្ទេសល្អ ១១ នាក់ និទ្ទេសល្អបង្គួរ និង ៥ នាក់បាននិទ្ទេសមធ្យម ហើយលទ្ធផលនេះ គឺសមស្រប ដោយសារតែសិក្ខាមភាគច្រើនមានបទពិសោធជាកីឡាករ និងមានបទពិសោធជាគ្រូជំនួយ ដែលធ្លាប់បង្វឹកសិស្សកន្លងមក រីឯការសិក្សានេះជាការបំពេញបន្ថែមប៉ុណ្ណោះ»។
ចំណែកលោក តែម ម៉ឺន បានថ្លែងថា៖ «វគ្គបណ្តុះបណ្តាលគ្រូបង្វឹកកីឡាប្រដាល់គុនខ្មែរ កម្រិតបឋមនេះមានតែ ១ លើកគត់ក្នុងឆ្នាំ ២០២០ នេះ អ៊ីចឹងវាសំខាន់ណាស់ ដែលផ្តល់ឱកាសឲ្យប្អូនៗ ទទួលបានជំនាញពីគ្រូឧទ្ទេសចំនួនដល់ទៅ ១០ នាក់ ហេតុនេះយើងគប្បីខិតខំយកចំណេះដឹង ដែលទទួលបានពីវគ្គនេះទៅអនុវត្តឲ្យចំគោលដៅ និងជាគំរូល្អ ដើម្បីបង្វឹកទៅតាមបច្ចេកទេសត្រឹមត្រូវដូចជាការថ្វាយបង្គំគ្រូ តាមរបៀបខ្មែរបុរាណជាដើម»។
លោកបន្ថែមថា៖ «អ្វីដែលខ្ញុំ ចង់លើកឡើងនៅពេលនេះគឺផ្តើមចេញពីការគោរពវិន័យជាបញ្ហាចម្បង បន្ទាប់មកហ្វឹកហាត់បច្ចេកទេស គឺជាភារកិច្ច ជាកាតព្វកិច្ច ហើយគុណភាពកម្លាំង និងបច្ចេកទេសត្រូវប្រឹង ដើម្បីយើងក្លាយជាកីឡាករល្អ ជាគ្រូល្អ មានវិន័យល្អ ឆ្ពោះទៅចូលរួមក្នុងព្រឹត្តិការណ៍ជាតិដ៏ធំគឺស៊ីហ្គេម ឆ្នាំ ២០២៣។ ចំណែកសិក្ខាកាមទាំង ២៦ នាក់នេះត្រូវទទួលបាននូវលិខិតបញ្ជាក់ពីការសិក្សារយៈពេល ៤ ថ្ងៃ ដើម្បីជាប្រយោជន៍ទៅបំពេញភារកិច្ច តាមក្លិបសមាគមរៀងៗខ្លួនឲ្យទទួលបានលទ្ធផលល្អ ស្របតាមក្បួនខ្នាតប្រពៃណី ដែលជាមរតកពីដូនតា ជាពិសេសរបៀបថ្វាយបង្គំគ្រូ កុំឲ្យវាក្លាយ»៕