.jpg)
កីឡាករ សាំង សីហា (មុខ) និង ហួត លយរស្មី បានជិះកង់ប្រជែងគ្នាក្នុងការប្រកួតកង់ភ្នំ ជុំទី ៤ នៅភ្នំប្រសិទ្ធិ៍។ រូបថត ឈន ណន
ភ្នំពេញ៖ ការទទួលបានសិទ្ធផលល្អ របស់កីឡាករជម្រើសជាតិកម្ពុជា សាំង សីហា និង ហួត លយរស្មី ក្នុងព្រឹត្តិការណ៍ប្រកួតកង់ភ្នំ Cambodia MTB Series 2019 ជាមួយស្ថានភាពផ្លូវលំបាក ដែលពោរពេញដោយឧបសគ្គនៅលើភ្នំប្រសិទ្ធិ៍កាលពីថ្ងៃអាទិត្យ បានធ្វើឲ្យថ្នាក់ដឹកនាំសហព័ន្ធខ្មែរកីឡាទោចក្រយាន កើតមាននូវក្តីរំពឹងចំពោះអ្នកទាំង ២ នេះ សម្រាប់ការចេញទៅប្រកួតកង់ភ្នំ ក្នុងស៊ីហ្គេមលើកទី ៣០ នៅហ្វីលីពីន ពីថ្ងៃទី ៣០ ខែវិច្ឆិកា ដល់ថ្ងៃទី ១១ ខែ ធ្នូ ឆ្នាំ ២០១៩ ខាងមុខ។
លោក នូ ចំរើន អគ្គលេខាធិការសហព័ន្ធខ្មែរកីឡាទោចក្រយាន ដែលបានចុះទៅពិនិត្យមើលការប្រកួតនោះ ដោយផ្ទាល់បាននិយាយថា៖ «ឆ្លងកាត់ការហ្វឹកហាត់ជម្រើសជាតិ និងការបោះជំរំហ្វឹកហាត់នៅខេត្តកន្លងមកនេះ គឺបានជួយឲ្យកីឡាករកង់ភ្នំ សាំង សីហា និង ហួត លយរស្មី ធ្វើបានកាន់តែល្អក្នុងជុំទី ៤ នេះ ហើយការប្រកួតនេះ វាក៏ជាឱកាសដែលពួកគេ បានបញ្ចេញសមត្ថភាព ដើម្បីត្រៀមទៅស៊ីហ្គេម នៅហ្វីលីពីន ផងដែរ»។
លោកបានបន្ថែមថា៖ «សិទ្ធផល ដែលពួកគាត់ធ្វើបានក្នុងការប្រកួតជុំទី ៤ នេះ គឺល្អ។ មានន័យថា ថិរវេលា ដែលគាត់ធ្វើបាន គឺមានរយៈពេលខ្លីជាងការប្រកួតកន្លងមក បើទោះបីជាការប្រកួតជុំទី ៤ នេះ វាមានស្ថានភាពផ្លូវបត់បែន ឡើងចំណោត ចុះចំណោត និងមានឧបសគ្គច្រើនជាងការប្រកួត ៣ ជុំកន្លងមកក៏ដោយ ហើយការប្រកួតនៅលើស្ថានផ្លូវលំបាកបែបនេះ បានធ្វើឲ្យកីឡាករយើង ទទួលបានបទពិសោធថ្មីៗបន្ថែមទៀត ដែលនាំឲ្យពួកគាត់ មានលក្ខណសម្បត្តិគ្រប់គ្រាន់ សម្រាប់ត្រៀមទៅប្រកួតនៅស៊ីហ្គេមលើកនេះ»។
តាមរយៈការប្រកួតយ៉ាងស្វិតស្វាញ ដែលមានអ្នកចូលរួមប្រមាណ ១៥០ នាក់ កាលពីថ្ងៃអាទិត្យនោះ សាំង សីហា និង ហួត លយរស្មី បានបង្ហាញភាពលេចធ្លោខ្លាំងក្នុងការប្រកួតលើវិញ្ញាសា ក្រុមជំនាញខ្លាំងបំផុត (A1) ដើម្បីបន្តរក្សាតំណែងជើងឯក និងជើងរង ប្រចាំការប្រកួតជុំទី ៤ នេះ។
នៅក្នុងការប្រកួតនេះ សាំង សីហា បានប្រឹងប្រែងយ៉ាងខ្លាំង ក្នុងការជិះកង់ឆ្លងកាត់ឧបសគ្គ ពីផ្លូវមួយទៅផ្លូវមួយទៀត ដើម្បីទទួលបានលេខ ១ ជាមួយថិរវេលា ៥៨:១៦.៨ នាទី ខណៈ ហួត លយរស្មី ដែលជាមិត្តរួមនៅក្លិបកង់ហោះ (Flying Bikes) ជាមួយគ្នានោះ បានប្រើថិរវេលា ៥៩:១៦.៨ នាទី ដើម្បីទទួលបានលេខ ២។
យោងតាមលទ្ធផលការប្រកួតនេះ បានបង្ហាញឲ្យឃើញថា ហួត លយរស្មី នៅតែមិនទាន់អាចប្រជែងយកលេខ ១ ពីរៀមច្បង សាំង សីហា ព្រោះទាំងការប្រកួតជុំទី ១ នៅព្រែកលៀប ជុំទី ២ នៅខេត្តកែប និងជុំទី ៣ នៅភ្នំជាល ខេត្តកំពង់ស្ពឺ កន្លងមកនេះ គឺ សាំង សីហា ទទួលបានលេខ ១ រហូត ខណៈ ហួត លយរស្មី បានត្រឹមលេខ ២ រហូតផងដែរ។
យ៉ាងណាក៏ដោយអ្នកជំនាញខាងការប្រណាំងកង់ លោក Pierre Yves Catry ដែលជាអគ្គលេខាធិការរងសហព័ន្ធខ្មែរកីឡាទោចក្រយានផងនោះ នៅតែមើលឃើញថា សាំង សីហា និង ហួត លយរស្មី ហាក់មានសមត្ថភាព នៅទាបជាងអត្តពលិករបស់ប្រទេសមួយចំនួនសម្រាប់ការប្រកួតស៊ីហ្គេមនៅហ្វីលីពីនខាងមុខនេះ។
លោក Pierre Yves Catry បាននិយាយថា៖ «យើងបានធ្វើការហ្វឹកហាត់ខ្លាំង សម្រាប់ការត្រៀមប្រកួតស៊ីហ្គេមលើកនេះ ហើយតាមរយៈការប្រកួតថ្ងៃនេះ ខ្ញុំអាចវាយតម្លៃបានថា កីឡាករយើងទាំង ២ នាក់ ធ្វើបានល្អ។ ទោះយ៉ាងណា បើប្រៀបធៀបសមត្ថភាពរបស់ពួកគេ ទៅនឹងកម្រិតអាស៊ាន គឺយើងហាក់នៅក្រោមគេបន្តិច ដោយក្នុងនោះ ថៃ ហ្វីលីពីន និងឥណ្ឌូនេស៊ី ជាក្រុមខ្លាំង ដែលយើងពិបាកនឹងប្រជែង ប៉ុន្តែយើងអាចមានសមត្ថភាពប្រកួតប្រជែងជាមួយកីឡាករមីយ៉ាន់ម៉ា ឡាវ និងវៀតណាម ជាដើម»៕
