.jpg)
ក្រុមសីដក់កម្ពុជា បានបង្ហាញមេដាយប្រាក់ និងពានកិត្តិយស ដែលពួកគេដណ្តើមបាន នៅប្រទេស ថៃ។ សហការី
ភ្នំពេញ៖ ក្រុមសីដក់ និងឈិនឡូនរបស់កម្ពុជា ហាក់មានទំនុកចិត្តកាន់តែខ្លាំងក្នុងការឆ្ពោះទៅរក ការដណ្តើមមេដាយជូនប្រទេសជាតិឲ្យបាន ក្នុងការប្រកួត ស៊ីហ្គេម លើកទី៣០ នៅប្រទេស ហ្វីលីពីន ដែលនឹងត្រូវធ្វើចន្លោះពីថ្ងៃទី ៣០ ខែ វិច្ឆិកា ដល់ថ្ងៃទី ១១ ខែ ធ្នូ ឆ្នាំ ២០១៩ ខាងមុខនេះ។
ការកើនទំនុកចិត្តនេះក៏ព្រោះតែក្រុមសីដក់ និងឈិនឡូនកម្ពុជា ទើបតែដណ្តើមបានមេដាយប្រាក់ ២ ពីការប្រកួតកីឡាសីដក់ជ្រើសរើសជើងឯកពិភពលោក លើកទី៣៤ ក្នុងព្រឹត្តិការណ៍ King Cup 2019 នៅប្រទេស ថៃ ហើយប្រតិភូកីឡាកម្ពុជាមួយក្រុមនេះបានជិះឡានក្រុងនាំយកជ័យជម្នះមេដាយកម្រិតពិភពលោកនេះ មកដល់មាតុប្រទេសវិញកាលពីយប់ថ្ងៃចន្ទ។
ទាក់ទងទៅនឹងការប្រកួតនេះ កញ្ញា សួង ចាន់តួរ៉ាទី អគ្គលេខាធិការរងសហព័ន្ធកីឡាសីដក់ និងឈិនឡូនកម្ពុជា បាននិយាយពេលធ្វើដំណើរមកដល់ភ្នំពេញវិញថា៖ «ទម្រាំតែដណ្តើមបានមេដាយ ប្រាក់ទាំង ២ នេះ យើងបានឆ្លងកាត់ការប្រកួតយ៉ាងស្វិតស្វាញ ព្រោះជួនកាលយើងលេងដល់យប់ ហើយពេលខ្លះទៀត យើងលេងចប់ ១ ប្រកួតហើយ គឺយើងត្រូវបន្តលេង ១ ប្រកួតទៀតភ្លាមៗតែម្តង គឺមានការពិបាកច្រើន»។
សម្រាប់ការប្រកួតកីឡាសីដក់ជ្រើសរើសជើងឯកពិភពលោក លើកទី ៣៤ ឆ្នាំ ២០១៩ នៅប្រទេស ថៃ នេះ កម្ពុជាបានបញ្ជូនអត្តពលិក និងប្រតិភូសរុប ៣៥ នាក់ ទៅចូលរួមប្រកួតលើ ៣ វិញ្ញាសា ហើយតាមរយៈការប្រកួតតាំងពីថ្ងៃទី ២៣ ខែ សីហា ដល់ថ្ងៃទី ២ ខែ កញ្ញា នោះ គឺកម្ពុជា បានឈ្នះមេដាយប្រាក់ នៅលើវិញ្ញាសា ៣ នាក់ ទល់ ៣ នាក់ និងវិញ្ញាសា ២ នាក់ ទល់ ២ នាក់ ប៉ុន្តែវិញ្ញាសាហ៊ូប គឺទាត់សីចូលកន្រ្តក នោះ កីឡាករយើងមិនដណ្តើមបានមេដាយទេ។
យ៉ាងណាក៏ដោយ កញ្ញា សួង ចាន់តួរ៉ាទី បាននិយាយថា៖ «ការទៅចូលរួមលើកមុន យើងដណ្តើមបានតែមេដាយ ១ ទេ ប៉ុន្តែលើកនេះ យើងអាចដណ្តើមបានដល់ ២ មេដាយ អ៊ីចឹងសមត្ថភាពរបស់អត្តពលិកយើងមានការកើនឡើងជាងមុន ហើយការប្រកួតនៅថៃលើកនេះ ក៏ជាការត្រៀមលក្ខណសម្បត្តិ ចូលរួមការប្រកួត ស៊ីហ្គេម នៅហ្វីលីពីនផងដែរ ព្រោះនៅហ្វីលីពីន ក៏យើងត្រូវលេងនៅលើវិញ្ញាសាហ៊ូប និងប្រកួត ២ នាក់ ទល់ ២ នាក់ ដូចការប្រកួតនៅថៃលើកនេះដែរ»។
អគ្គលេខាធិការរងរូបនេះ បានបញ្ជាក់ថា៖ «ការប្រកួតវិញ្ញាសា ហ៊ូប នេះ គឺយើងធ្វើបានជិត ៣០០ ពិន្ទុដែរ គឺអាចស្មើហ្វីលីពីន និង ប្រ៊ុយណេដែរ អ៊ីចឹងពេលត្រឡប់មកវិញនេះ យើងនឹងព្យាយាមពង្រឹងបន្ថែម ទៅលើចំណុចខ្វះខាត ទាំងវិញ្ញាសាហ៊ូប និងវិញ្ញាសា ២ នាក់ ទល់ ២ នាក់ ដោយយើង សង្ឃឹមថា ការប្រកួតស៊ីហ្គេមនៅហ្វីលីពីនលើកនេះ យើងនឹងដណ្តើមបានមេដាយ»៕
