ភ្នំពេញ: កីឡាករជើងខ្លាំង សុខ ធី បានប្រកាសពីការវិលត្រឡប់ទៅកាន់ប្រទេសថៃ ហើយរូបគេក៏អាចនឹងឈប់មកប្រកួតនៅកម្ពុជាផងដែរ បន្ទាប់ពីសហព័ន្ធកីឡាប្រដាល់គុនខ្មែរបានដាក់ពិន័យដល់រូបគេមិនឲ្យឡើងប្រកួតទាំងក្នុង និងក្រៅស្រុកចំនួន ៦ ខែ ហើយលោក សាន សៅយ៉ាន់ ជាគ្រូបង្វឹក ត្រូវបានពិន័យផ្អាកការងារជាមន្ត្រីអាជ្ញាកណ្តាល ចៅក្រមចំនួន ៦ ខែដូចគ្នា ខណៈអ្នកទាំង ២ មិនព្រមទទួលយកលទ្ធផល ការសម្រេចឲ្យចាញ់កីឡាករថៃ Thnou Soeklek ក្នុងការប្រកួតជម្រុះវិលជុំដណ្តើមពានអន្តរជាតិ ISI Palm ទម្ងន់ ៥៧ គីឡូក្រាម នៅសង្វៀន CNC។
បើទោះបីជា ការសម្រេចដាក់ពិន័យរបស់សហព័ន្ធកីឡាប្រដាល់គុនខ្មែរ ត្រូវបានធ្វើឡើងទៅតាមការសម្រេចរបស់ក្រុមប្រឹក្សាបច្ចេកទេស ដោយមានការចុះហត្ថលេខាទទួលស្គាល់ដោយលោក តែម ម៉ឺន ជាប្រធានសហព័ន្ធ ប៉ុន្តែលោក សាន សៅយ៉ាន់ បានចាត់ទុកការដាក់ពិន័យថា ជាការធ្វើឡើងដោយគំនុំ មិនបានគោរពទៅតាមគោលការណ៍ច្បាប់កីឡាត្រឹមត្រូវ។
លោក សាន សៅយ៉ាន់ បានប្រាប់ភ្នំពេញប៉ុស្តិ៍ថា៖ «ការដាក់ពិន័យរបស់សហព័ន្ធមកលើពួកខ្ញុំ ដូចជាមិនមែនធ្វើតាមច្បាប់ទេ គឺធ្វើដោយគំនុំ ដោយបញ្ឈរជើងដល់ ៦ ខែ និងមិនឲ្យប្រកួតនៅក្រៅស្រុកទៀត។ ពួកខ្ញុំអត់ខុសនោះទេ ព្រោះខ្ញុំតវ៉ាតាមច្បាប់ហើយ តែមិនដោះស្រាយតាមច្បាប់ឲ្យពួកខ្ញុំ បែរជាយកការពិន័យមកទម្លាក់កំហុសលើពួកខ្ញុំទៀត គឺវាធ្ងន់ធ្ងរពេក»។
ជាមួយការពិន័យរបស់សហព័ន្ធនេះដែរ សុខ ធី មានការបាក់ទឹកចិត្តខ្លាំង ហើយរូបគេក៏បានព្រលយពីការឈប់មកប្រកួតនៅកម្ពុជាផងដែរ។ សុខ ធី ដែលមានឪពុកម្តាយធ្វើជាជាងសំណង និងរស់នៅប្រទេសថៃ តាំងពីតូចនោះ បានសរសរនៅលើហ្វេសប៊ុករបស់ខ្លួនថា៖ «ថ្ងៃទី ១៤ ខ្ញុំត្រឡប់ទៅប្រទេសថៃវិញហើយ ហើយក៏ឈប់ប្រកួតនៅប្រទេសកម្ពុជាទៀតដែរដោយសារធុញនឹងបញ្ហាច្រើនពេក»។
ជុំវិញការបង្ហោះសាររបស់ សុខ ធី នេះ លោក សាន សៅយ៉ាន់ បានលើកឡើងថា អាចមកពី សុខ ធី គាត់មានការបាក់ទឹកចិត្តខ្លាំងពេក ទៅលើការដាក់ពិន័យនេះ ព្រោះទម្រាំអូសទាញ សុខ ធី បានមកប្រកួតនៅកម្ពុជា លោកបានទៅនិយាយអង្វរដល់ឪពុកម្តាយរបស់គេ ទើបគេព្រមមក។
លោកបាននិយាយថា៖ «ការដាក់ពិន័យនេះ វាបានជះឥទ្ធិពលខ្លាំងដល់ សុខ ធី ហើយអាចនឹងធ្វើឲ្យគាត់ឈប់មកប្រកួតនៅកម្ពុជា គឺគាត់អាចប្រកួតនៅក្រៅប្រទេសវិញ ព្រោះគាត់បានទទួលរងភាពអយុត្តិធម៌ពីសហព័ន្ធពេក ហើយបើសហព័ន្ធ នៅតែធ្វើបែបនេះ គឺក្រោយពីបញ្ចប់ការទទួលពិន័យនេះ ខ្ញុំក៏គាំទ្រឲ្យគាត់ទៅប្រកួតនៅថៃដែរ ព្រោះគាត់មកប្រកួត ដើម្បីមុខមាត់គុនខ្មែរ គួរណាស់នាំគ្នាលើកតម្កើងគាត់ តែបែរជានាំគ្នាជាន់ពន្លិចគ្នា»។
ជុំវិញការចោទប្រកាន់ពីលោក សាន សៅយ៉ាន់ ថា សហព័ន្ធកីឡាប្រដាល់គុនខ្មែរ បានដាក់ពិន័យដោយគំនុំនេះ លោក តែម ម៉ឺន បានឆ្លើយបដិសេធថា៖ «គ្មាននរណាទៅគុំកួន កូនចៅខ្លួនឯងនោះទេ គឺយើងមានតែអាណិតព្រោះយើងចាស់ទុំ យើងជាស្ថានប័នមួយ មានច្បាប់គ្រប់គ្រងត្រឹមត្រូវ ហើយសួរគ្រូ សាន សៅយ៉ាន់ និងកីឡាករ សុខ ធី ទៅ ថាតើខ្ញុំបានហៅមកជួបណែនាំ និងលើកទឹកចិត្តយ៉ាងម៉េចខ្លះ ប៉ុន្តែត្រូវដឹងថា យើងធ្វើការច្រើនស្ថាប័ន ជាមួយគ្នា យើងមានលក្ខន្តិកៈនៃការប្រកួត អ៊ីចឹងការដាក់ពិន័យនេះ មកពីពួកគាត់ មិនព្រមមកប្រកួត វានាំឲ្យខូចកម្មវិធីគេ រឿងវាតែប៉ុណ្ណឹងទេ គឺគ្មានការគុំកួនអ្វីនោះទេ»។
ចំពោះការប្រកាសឈប់មកប្រកួតនៅកម្ពុជារបស់ សុខ ធី លោក តែម ម៉ឺន បានបញ្ជាក់ថា៖ «យើងមិនត្រូវធ្វើអ្វីដែលអាក្រក់ជាមួយកូនចៅយើងនោះទេ ប៉ុន្តែសំខាន់សិទ្ធិសម្រេចរបស់គាត់ វាយ៉ាងម៉េច? គាត់ជាខ្មែរ ជាកីឡាកររបស់យើង អ៊ីចឹងយើងនៅតែខិតខំណែនាំ លើកទឹកចិត្តឲ្យគាត់ហាត់ ដើម្បីប្រកួតនៅកម្ពុជា តែបើគាត់សម្រេចថា គាត់ត្រូវតែទៅប្រកួតប្រទេសគេ យើងទៅឃាត់គេយ៉ាងម៉េច? ប៉ុន្តែត្រូវដឹងពីច្បាប់ ព្រោះសហព័ន្ធយើង ក៏ដូចជាប្រទេសជាតិ សុទ្ធតែមានច្បាប់ត្រឹមត្រូវ»។
យ៉ាងណាក៏ដោយ លោក សាន សៅយ៉ាន់ និយាយថា សហព័ន្ធកីឡាប្រដាល់គុនខ្មែរ មិនទាន់មានគោលការណ៍ច្បាប់ច្បាស់លាស់ នៅឡើយទេ។ លោកបានលើកយករឿង ២ មកបញ្ជាក់ថា ច្បាប់កីឡាកំណត់ថា ពេលប្រកាសលទ្ធផលហើយ មិនអាចកែប្រែវិញបានទេ ចុះកីឡាករ សុខ រិទ្ធ ដែលប្រកាសឲ្យចាញ់ ហ៊ឹម សេរី ក្នុងការប្រកួតជើងឯកថ្នាក់ជាតិ កន្លងមក ហេតុអ្វីសហព័ន្ធ សម្រេចកែប្រែឲ្យ សុខ រិទ្ធ ឈ្នះការប្រកួតវិញ តាមការតវ៉ាពួកលោក៕