ភ្នំពេញ៖ កីឡាករវ័យក្មេង សុខ លឹមហេង បានក្លាយជាម្ចាស់ជើងឯក ការប្រកួតកីឡាអុក ក្នុងព្រឹត្តិការណ៍អបអរសាទរព្រះរាជពិធីបុណ្យអុំទូកបណ្តែតប្រទីប និងសំពះព្រះខែអកអំបុក ឆ្នាំ ២០១៩ កាលពីថ្ងៃទី ១២ ខែវិច្ឆិកា ហើយជ័យជម្នះរបស់គេ ទទួលបានការកោតសរសើរខ្លាំងពីពិភពអ្នកលេងអុកនៅកម្ពុជា។
អ្នកលេងអុកវ័យក្មេង មកពីក្លិបសេះខៀវ និងជានិស្សិតសាកលវិទ្យាល័យវ៉ាន់ដា សុខ លឹមហេង បានឈ្នះជើងចាស់ជាច្រើនរូប ដើម្បីទទួលបានចំណាត់ថ្នាក់លេខ ១ ហើយនេះជាជ័យជម្នះមួយទៀតរបស់គេ បន្ថែមទៅលើការឈ្នះតំណែងស្តេចអុក នៅអង្គរសង្រ្កាន្ដខេត្តសៀមរាប កាលពីឆ្នាំ ២០១៨ និងឈ្នះពានរង្វាន់អុកចត្រង្គរបស់សហព័ន្ធអុកចត្រង្គកម្ពុជា កាលពីចុងខែ តុលា ឆ្នាំ ២០១៩ នេះ។
លោក គ្រួច ចន្ថារិទ្ធ ហៅត្រេន ជាគណៈកម្មការរៀបចំការប្រកួតបានប្រាប់ថា ការប្រកួតដែលធ្វើនៅភោជនីយដ្ឋានស្រីអូននោះ គឺមានបេក្ខជនលំដាប់ជើងខ្លាំងៗចំនួន ៧០ នាក់ មកពីក្លិប ចំនួន ១០ បានចូលរួម ប៉ុន្តែដោយបញ្ហាពេលវេលាតែមួយថ្ងៃ ហើយបេក្ខជនចូលប្រកួតច្រើននោះ គណៈកម្មការបានធ្វើការសម្រេចចាប់ឆ្នោតជ្រើសអ្នកចូលប្រកួតតែ ១៦ នាក់ទេ ដោយប្រកួតតាមរូបមន្តចាញ់ធ្លាក់ រហូតរកឃើញអ្នកបានលេខ ១ តែម្តង។
នៅក្នុងការប្រកួតនោះកីឡាករ សុខ លឹមហេង បានយកឈ្នះជាប់ៗគ្នាចំនួន ៤ ប្រកួត គឺឈ្នះកីឡាករ ហ៊ុយ សាមុត មកពីខេត្តកំពត រួចបន្តឈ្នះ ហេង គឹមតួ មកពីក្លិបបារាំងប៊ុលឌិង និងឈ្នះកីឡាករវ័យក្មេងម្នាក់ទៀត មកពីរាជធានីភ្នំពេញ នៅវគ្គផ្តាច់ព្រ័ត្រ ដើម្បីគ្រងតំណែងម្ចាស់ជើងឯកសម្រាប់ការប្រកួត ក្នុងបុណ្យអុំទូកតែម្តង។
លោក គុជ គឹមឡុង ប្រធានសហព័ន្ធកីឡាអុកចត្រង្គកម្ពុជា បានថ្លែងប្រាប់ភ្នំពេញប៉ុស្តិ៍ថា៖ «សហព័ន្ធ បានប្រឹងប្រែងស្វែងរកការប្រកួតឲ្យបានញឹកញាប់ក្នុងមួយឆ្នាំៗ ដើម្បីជំរុញឲ្យកីឡាករមានសមត្ថភាព និងស្វែងរកអ្នកលេងអុក ដែលមានសមត្ថភាពខ្លាំងពិតៗ។ ជាមួយគ្នានេះបញ្ហាប្រាក់រង្វាន់គ្រាន់តែជាការលើកទឹកចិត្តប៉ុណ្ណោះ គឺមិនចាត់ទុកថា ជារឿងសំខាន់នោះទេគឺលេខ ១ បាន ៥០ ម៉ឺនរៀល លេខ ២ បាន ២០ ម៉ឺន លេខ ៣ បាន ១៥ ម៉ឺន និងលេខ ៤ បាន ១០ ម៉ឺនរៀល ព្រមទាំងមានចាប់ឆ្នោតយកទូរស័ព្ទដៃផងដែរ»។
តាមគោលការណ៍ជាយុទ្ធសាស្រ្ត គឺសហព័ន្ធអុកចត្រង្គកម្ពុជា នឹងបញ្ជូនគ្រូបង្វឹក ទៅជួយបណ្តុះបណ្តាលដល់បណ្តាប្រទេសក្នុងតំបន់អាស៊ីអាគ្នេយ៍ ក្នុងគោលបំណងឲ្យគេបានចូលប្រកួតលើប្រភេទកីឡាអុកនេះ ក្នុងព្រឹត្តិការណ៍ស៊ីហ្គេម លើកទី ៣២ ឆ្នាំ ២០២៣ ដែលកម្ពុជា ត្រូវធ្វើជាម្ចាស់ផ្ទះ៕