.jpg)
ចាន់ សំអាត សង្ឃឹមអាចយកឈ្នះ Phat Ngam នៅថ្ងៃសៅរ៍។ សហការី
ភ្នំពេញៈ កីឡាករកម្ពុជា សុខ សាវិន និង ចាន់ សំអាត សុទ្ធតែមានរំពឹងខ្ពស់ ក្នុងការយកឈ្នះអ្នកប្រដាល់ថៃ សម្រាប់ការប្រកួតវគ្គពាក់កណ្តាលផ្តាច់ព្រ័ត្រ ដណ្តើមខ្សែក្រវាត់ខារ៉ាបាវទម្ងន់ ៦០ គីឡូក្រាមនៅលើសង្វៀន SEATV នារសៀលថ្ងៃសៅរ៍ចុងសប្តាហ៍នេះ ដើម្បីឡើងទៅជួបគ្នានៅវគ្គផ្តាច់ព្រ័ត្រ។
នៅក្នុងការប្រកួតវគ្គពាក់កណ្ដាលផ្ដាច់ព្រ័ត្រនេះ ចាន់ សំអាត មកពីក្លិបអន្លង់វែងត្រូវវិលទៅជួបជាមួយអ្នកប្រដាល់ថៃ Phat Ngam ខណៈអ្នកទាំង ២ នេះបានឈ្នះ ៣ និងចាញ់ ១ ប្រកួតមាន ១០ ពិន្ទុនៅក្នុងការប្រកួតជម្រុះវិលជុំសន្សំពិន្ទុ ប៉ុន្តែចំណុចគួរឲ្យកត់សម្គាល់នោះគឺ Phat Ngam ត្រូវបានគណៈកម្មការពិន័យឲ្យចាញ់កីឡាករ ចាន់ សំអាត ដោយស្វ័យប្រវត្តិ ដោយសារតែពេលថ្លឹងទម្ងន់មុនពេលប្រកួតគឺអ្នកប្រដាល់ថៃរូបនេះរក្សាទម្ងន់ត្រឹម ៦០ គីឡូក្រាមមិនបាន។
កីឡាករ ចាន់ សំអាត ធ្លាប់ប្រកួតបាន ៨១ ដងឈ្នះ ៦១ ចាញ់ ១៧ និងស្មើ ៣ ដង ហើយក្នុងនោះធ្លាប់វាយដៃគូប្រកួតឲ្យសន្លប់បាន ១៧ ដង។ រីឯ Phat Ngam មានប្រវត្តិប្រកួតចំនួន ៨៨ ដង ឈ្នះ ៧១ ចាញ់ ១៥ និងស្មើ ២ ដង ហើយទាក់ទងការប្រកួតនេះ ចាន់ សំអាត បានអះអាងថារូបគេមានសង្ឃឹមឈ្នះ ៩០ ភាគរយ ដើម្បីបានឡើងទៅផ្តាច់ព្រ័ត្រ ព្រោះកន្លងមករូបគេធ្លាប់ឈ្នះកីឡាករម្នាក់នេះ។
សុខ សាវិន រំពឹងឈ្នះថៃ Den Sayam ឡើងទៅវគ្គផ្តាច់ព្រ័ត្រ។ សហការី
ចំណែក សុខ សាវិន របស់ក្លិបឆ្មាសសែនសុខគុនខ្មែរ ដែលទទួលបានចំណាត់ថ្នាក់លេខ ១ ក្នុងពូលកីឡាករកម្ពុជាក្នុងការប្រកួតជម្រុះវិលជុំសន្សំពិន្ទុនោះត្រូវប្រកួតជាមួយអ្នកប្រដាល់ថៃ Den Sayam ដែលឈ្នះបានត្រឹម ២ ដង និងចាញ់ ២ ដងក្នុងវគ្គជម្រុះគឺខុសពី សាវិន ដែលឈ្នះ ៣ ដង និងចាញ់តែម្តងគត់។
បន្ថែមលើនេះសម្រាប់ការជួបគ្នាក្នុងវគ្គជម្រុះសន្សំ សុខ សាវិន ដែលធ្លាប់ប្រកួតបាន ១០៨ ដង ឈ្នះ ៧៤ ចាញ់ ២៨ និងស្មើ ៦ ដងនោះបានប្រើកែងវាយឲ្យ Den Sayam សន្លប់ត្រឹមទឹកទី ២ ប៉ុណ្ណោះ ខណៈថៃម្នាក់នេះមានប្រវត្តិប្រកួត ៨៦ ដង ឈ្នះ ៦៧ ចាញ់ ១៧ និងស្មើពិន្ទុ ២ ដង។
ទាក់ទងការប្រកួតនេះលោក សន អេលីត គ្រូបង្វឹក សុខ សាវិន បានអះអាងថា៖ «តាមរយៈការហ្វឹកហាត់ និងតាំងចិត្តប្រកួតខ្ពស់ ខ្ញុំហ៊ាននិយាយថា សុខ សាវិន នឹងឈ្នះ ដើម្បីទទួលបានកៅអីទៅវគ្គផ្តាច់ព្រ័ត្រ ហើយតាមខ្ញុំមើលគឺការប្រកួតនេះអាចថា ខ្មែរនឹងឈ្នះទាំង ២ នាក់ដើម្បីឈានទៅវគ្គផ្តាច់ព្រ័ត្រជាមួយគ្នា»។
ចំណែកលោក ថាញ់ វ៉ាឡេក គ្រូបង្វឹកកីឡាករថៃបានប្រាប់ថាលោកមិនទាន់ហ៊ានថា អ្នកណានឹងមានប្រៀបជាងទេ ព្រោះវគ្គនេះសំខាន់ណាស់ អ៊ីចឹងអាចនឹងមានយុទ្ធសាស្ត្រពិសេសរៀងៗខ្លួនដែលមិនអាចប្រាប់មុនបាន។ គួរបញ្ជាក់ថាការប្រកួតខ្សែក្រវាត់នេះអ្នកបានលេខ ១ ជាម្ចាស់ខ្សែក្រវាត់នឹងទទួលបានប្រាក់រង្វាន់ ៤០០០ ដុល្លារ ឯអ្នកចាញ់លេខ ២ ទទួលបាន ២០០០ ដុល្លារ៕
