.jpg)
សុខ សាវិន បានសម្រេចយកសង្វៀនប៉ុស្តិ៍កលេខ ៥ ដើម្បីប្រកួតសងសឹកជាមួយអ្នកប្រដាល់ថៃ Phat Ngam នៅថ្ងៃសៅរ៍។ សហការី
ភ្នំពេញ៖ ការកាត់សេចក្តីឲ្យ សុខ សាវិន ចាញ់ពិន្ទុកីឡាករថៃ Phat Ngam ដើម្បីបានឈ្នះខ្សែក្រវាត់ទាំងភាពចម្រូងចម្រាស់ នៅលើសង្វៀន SEATV កាលពីខែមុននេះ វានៅតែធ្វើឲ្យ សុខ សាវិន មកពីក្លិប ឆ្មាសសែនសុខ មានការមិនអស់ចិត្ត រហូតរូបគេបានឈានដល់ការសុំសងសឹក ជាមួយថៃរូបនេះឡើងវិញ ប៉ុន្តែបានប្តូរសង្វៀនទៅប្រកួតនៅប៉ុស្តិ៍លេខ ៥ វិញម្តង នាយប់ថ្ងៃសៅរ៍ អមជាមួយព្រឹត្តិការណ៍ TV5 Boxing Knock Out Serir (K-Cement)។
ការសុំប្រកួតសងសឹក និងប្តូរសង្វៀននេះត្រូវបានប្រភពអ្នកតាមដានការប្រកួតប្រដាល់ប្រចាំសប្តាហ៍នេះ មានការចាប់អារម្មណ៍ និងមានជំនឿខ្លាំងទៅលើកីឡាករ សុខ សាវិន មានប្រៀបជាងអ្នកប្រដាល់ថៃ Phat Ngam។ ក្នុងមួយរយៈចុងក្រោយនេះ ពិសេសក្នុងអំឡុងការប្រកួតដណ្តើមខ្សែក្រវាត់ សុខ សាវិន បានចាញ់ពិន្ទុកីឡាករថៃរូបនេះ ចំនួន ២ លើក សុទ្ធតែមិនអស់ចិត្ត។
ជាមួយការសម្រេចឲ្យចាញ់ ទាំងមានភាពចម្រូងចម្រាស បានធ្វើឲ្យសហព័ន្ធកីឡាប្រដាល់គុនខ្មែរ ឈានដល់ការកោះប្រជុំ និងស្តីបន្ទោសដល់ចៅក្រមរបស់ខ្លួនផងដែរ ដែលផ្តល់ឲ្យកីឡាករថៃឈ្នះក្នុង ភាពមិនប្រក្រតី។ ហេតុនេះជំនួបលើកនេះ វាជាការប្រកួតលើកទី៣ របស់អ្នកប្រដាល់ទាំង ២ រូបនេះ។
ការជួបគ្នាលើកនេះក៏អាចចាត់ទុកថា ជាឱកាសចុងក្រោយមួយរបស់ សុខ សាវិន ផងដែរ ក្នុងការសងសឹក Phat Ngam ព្រោះ ២ លើកកន្លងមក នៅលើសង្វៀន SEATV គឺចាញ់ដោយមិនអស់ចិត្ត ហើយកាលចាញ់លើកទី១ នៅថ្ងៃទី ២៩ ខែ មិថុនា និងចាញ់លើកទី២ នៅថ្ងៃទី ៣ ខែ សីហា ឆ្នាំ ២០១៩។ ការបរាជ័យនេះ បានធ្វើឲ្យ សាវិន ចិញ្ចឹមចិត្ត ដើម្បីសងសឹក ប៉ុន្តែពេលនេះសុំប្តូរសង្វៀនទៅប៉ុស្តិ៍លេខ ៥ វិញម្តង ដែលមតិភាគច្រើគិតថា ចៅក្រមមានភាពសុក្រឹត និងផ្តល់ភាពយុត្តិធម៌ជាងនៅសង្វៀន SEATV។
លោក សន អេលីត គ្រូបង្វឹកកីឡាករ សុខ សាវិន នៅតែអះអាងថា សុខ សាវិន បានចាញ់ Phat Ngam ទាំង ២ លើកនោះ ជារឿងអយុត្តិធម៌ ហើយការមកប្រកួតសងសឹកគ្នាលើកនេះ គឺសង្ឃឹមថា ចៅក្រម និងប្រធានវិនិច្ឆ័យនៅសង្វៀននេះ នឹងផ្តល់យុត្តិធម៌ល្អប្រសើរជាងមុនៗ គឺចាញ់ ឬឈ្នះ ដោយអស់ពីចិត្ត។
ចំណែក លោក ថាញ់់ វ៉ាឡេក គ្រូបង្វឹក Phat Ngam បាននិយាយថា៖ «សម្រាប់គូនេះប្រកួតគ្នាតឹងតែង ហើយចាញ់ ឬឈ្នះ គឺលំបាកទស្សន៍ទាយណាស់ គឺអាស្រ័យលើពេលប្រកួតជាក់ស្តែងតែម្តង»។
កីឡាករ សុខ សាវិន ធ្លាប់ប្រកួតបានចំនួន ១១០ ដង ឈ្នះ ៧៤ ដង ចាញ់ ៣០ និងស្មើពិន្ទុ ៦ ដង។ ចំណែកថៃ Phat Ngam វិញគេមានប្រវត្តិប្រកួតបានចំនួន ៩០ ដង ឈ្នះ ៧៣ ចាញ់ ១៥ និងស្មើពិន្ទុ ២ ដង ហើយការប្រកួតចុងក្រោយឈ្នះ សុខ សាវិន បានខ្សែក្រវាត់ និងប្រាក់ ៥ ពាន់ដុល្លារ ធ្វើឲ្យ សាវិន ខូចចិត្ត។
ជាមួយគ្នានេះដែរ ការប្រកួតជម្រុះបញ្ចប់ជុំទី១ នៃព្រឹត្តិការណ៍ TV5 Boxing Knock Out Serir វិញនោះ កីឡាករជើងចាស់ ទិត្យ សុវណ្ណគីរី របស់ក្លិបអេភូថងកីឡា ដែលបាត់មុខពីសង្វៀនយូរហើយនោះ បានវិលជួបប្រកួតអ្នកប្រដាល់ជើងថ្មី ពិល រ័ត្ន ក្លិបពន្លឺសាមគ្គីខេត្តបាត់ដំបង។
ពិល រ័ត្ន មិនមាននរណាស្គាល់ច្រើននោះទេ ហើយការមកជួប សុវណ្ណគិរី ដូចឡើងមកផ្សងសំណាង ព្រោះការប្រកួតនេះ គេមិនសូវគិតពីកម្រិតចាស់ ឬថ្មី សមត្ថភាពខ្លាំង ឬខ្សោយទេ ឲ្យតែមានទម្ងន់ តាមការកំណត់ ៦០ គីឡូក្រាមដូចគ្នា គឺអូខេតែម្តង។
ចំពោះ សុវណ្ណគិរី ធ្លាប់ជាជើងខ្លាំង តែក្រោយមកបាត់មុខមួយរយៈនោះ ត្រូវបានគេរំពឹងថា នៅតែខ្លាំង គឺយ៉ាងហោចណាស់បទបិសោធរបស់គេ គឺលំដាប់ជួរមុខ។ សុវណ្ណគិរី និង ពិល រ័ត្ន ត្រូវបានអ្នកតាមដានប្រដាល់នាំគ្នានិយាយថា មិនចំបាច់ទស្សនា ក៏គេដឹងថា ៩៩ ភាគរយ គឺ សុវណ្ណគិរី ជាអ្នកឈ្នះដែរ។
ចំណែកគូជម្រុះ ១ គូទៀត កីឡាករ ទូច ដេវីត ក្លិបអារុណរះកីឡា ត្រូវជួប កុយ ចាន់តូ របស់ក្លិបគីសែមានរិទ្ធ។ អ្នកទាំង ២ នេះ ជាអ្នកប្រដាល់មិនសូវមានឈ្មោះបោះសំឡេងអ្វីឡើយ ប៉ុន្តែយ៉ាងណាពួកគេមានឱកាសបានឡើងប្រជែង ដើម្បីទទួលបានតម្លៃខ្លួនប្រកួត និងបទពិសោធផងដែរ ទោះជាគ្មានសង្ឃឹមថា បានឆ្លងទៅវគ្គបន្តបន្ទាប់ក៏ដោយ៕
