.jpg)
បេក្ខភាពទាំង ៤ នាក់ ដែលត្រូវប្រកួតដណ្តើមប្រាក់លាន នៅលើសង្វៀនថោន ថ្ងៃអាទិត្យនេះ។ រូប សហការី
ភ្នំពេញ៖ ជាកីឡាករ សុខ សាវិន បានធ្វើការប្តេជ្ញាចិត្តប្រជែងឱ្យបានតំណែងជើងឯក ដើម្បីយកប្រាក់រង្វាន់ ៤ លានរៀល សម្រាប់ការបង្ហាញវត្តមានលើកទី៤ ក្នុងព្រឹត្តិការណ៍ប្រកួតម៉ារ៉ាតុងដណ្តើមប្រាក់លានទម្ងន់ ៦០ គីឡូក្រាម នៅលើសង្វៀនថោន នាថ្ងៃអាទិត្យនេះ ខណៈការប្រកួតនេះ មានថ្នាក់ដឹកនាំជាន់ខ្ពស់នៅអគ្គស្នងការនគរបាលជាតិ ចំនួន ៣ នាក់ បានត្រៀមថវិកាលើកទឹកចិត្តបន្ថែមដល់ សុខ សាវិន បើសិនជាគេប្រកួតឈ្នះ។
សម្រាប់ការប្រកួតលើកនេះ សុខ សាវិន ដែលទើបប្តូរពីក្លិបប៉ែនកាក់គុនខ្មែរមកនៅក្លិបនាយកដ្ឋានអង្គរក្សនោះ នឹងត្រូវប្រកួតប្រជែងជាមួយបេក្ខភាព ៣ នាក់ផ្សេងទៀត មានអតីតមិត្តរួមក្លិប ជ័រ ពៅ ព្រមទាំង ឡុង ជិន និង បាង កាយ៉ាក ខណៈអ្នកទាំង ៣ នេះ សុទ្ធតែធ្លាប់បានឈ្នះប្រាក់លានពីកម្មវិធីនេះ គឺផ្ទុយពី សុខ សាវិន ដែលបានចូលរួមរហូត ៣ លើក តែមិនទាន់ដណ្តើមបានប្រាក់លាននោះទេ។
ទោះជាយ៉ាងណា សម្រាប់ការមកប្រកួតជាលើកទី៤ នេះ សុខ សាវិន និងគ្រូបង្វឹករបស់គេបានអះអាងថា ហ្វឹកហាត់ត្រៀមកម្លាំង និងបច្ចេកទេសបានល្អ ដោយមានទំនុកចិត្តខ្ពស់ក្នុងការដណ្តើមយកប្រាក់ចំនួន ៤ លានរៀល ពីកម្មវិធីនេះឱ្យបាន។ សុខ សាវិន បាននិយាយថា៖ « ខ្ញុំធ្លាប់ចូលរួមប្រកួតចំនួន ៣ លើកមែន ក្នុងកម្មវិធីនេះ ប៉ុន្តែលក្ខណៈប្រកួតកាលនោះ គឺវ៉ៃមិនសន្លប់ត្រូវសម្រេចឱ្យស្មើគ្នា មិនមែនខ្ញុំចាញ់នោះទេ»។
សុខ សាវិន បានបញ្ជាក់ថា៖ «សម្រាប់ការប្រកួតលើកនេះ គឺប្រកួត ៣ ទឹក ទាំងវគ្គជម្រុះ និងវគ្គផ្តាច់ព្រ័ត្រ ហើយការឈ្នះចាញ់អាស្រ័យទៅលើការដាក់ពិន្ទុ មិនមែនតម្រូវឱ្យវ៉ៃទាល់តែសន្លប់ ទើបឈ្នះដូចមុននោះទេ ហេតុនេះ ខ្ញុំតាំងចិត្តយកឈ្នះឱ្យបានសម្រាប់ការប្រកួតលើកនេះ គឺសង្ឃឹមឈ្នះ ៨០ ភាគរយ ទោះជួបកីឡាករមួយណាក៏បាន»។
ចំណែក លោក ស៊ន អេលីត គ្រូបង្វឹក សុខ សាវិន បាននិយាយថា៖ «ក្រៅពីហ្វឹកហាត់ល្អ ថែទាំសុខភាពល្អ គឺ សុខ សាវិន មានទឹកចិត្តប្រកួតពុះកញ្ជ្រោល ព្រោះក្លិបនាយកដ្ឋានអង្គរក្សដែលមានថ្នាក់ដឹកនាំជាន់ខ្ពស់ចំនួន ៣ នាក់ មានឯកឧត្តមនាយឧត្តមសេនីយ៍ ឆៃ ស៊ីណារិទ្ធ ឯកឧត្តម ឧត្តមសេនីយ៍ឯក ឌី វិជ្ជា និងឧត្តមសេនីយ៍ឯក យឹម លាង នៅចាំលើកទឹកចិត្ត ដោយបានសម្រេចផ្តល់ប្រាក់ ៣០០ ដុល្លារ ដល់កីឡាករលំដាប់ឆ្នើម ដែលប្រកួតឈ្នះ ក្នុង ១ ប្រកួត និង ១៥០ ដុល្លារ ជូនកីឡាករលំដាប់ស៊េរី B ដែលប្រកួតឈ្នះក្នុង ១ ប្រកួត។ ប្រាក់រង្វាន់បន្ថែមនេះហើយ ដែលជាកត្តាជំរុញឱ្យកីឡាករក្នុងក្លិបអង្គរក្ស សប្បាយចិត្ត ខិតខំហាត់យ៉ាងខ្លាំង ដើម្បីប្រកួត»។
លោក ស៊ន អេលីត បានបន្ថែមថា៖ «ចំពោះគូប្រកួត ៣ នាក់ ដែលត្រូវចាប់ឆ្នោតប្រកួតលើកនេះ សុទ្ធតែធ្លាប់ចាញ់ និងឈ្នះគ្នាទៅវិញទៅមក ប៉ុន្តែបើគិតពីឧបសគ្គធំវិញ គឺមាន ឡុង ជិន ដែលអាចថា លំបាកជាងគេក្នុងការយកឈ្នះ ព្រោះ ឡុង ជិន ល្អទាត់ និងជង្គង់ ខណៈ សុខ សាវិន មានប្រៀបផ្នែកកណ្តាប់ដៃ»។
ចំណែក ឡុង ជិន បានបញ្ជាក់ថា៖ «ខ្ញុំសង្ឃឹមឈ្នះ ៧០ ភាគរយ ហើយ ៣ នាក់នេះ ជួប ១ ណាក៏បានដែរ ព្រោះសុទ្ធតែខ្ញុំធ្លាប់ឈ្នះកន្លងមក»។ យ៉ាងណាក៏ប្រកួតនេះ គេផ្តោតអារម្មណ៍ខ្លាំងទៅលើវត្តមានរបស់ សុខ សាវិន និង ជ័រ ពៅ ព្រោះជាមិត្តភក្តិ និងធ្លាប់ជាមិត្តរួមក្លិប ហេតុនេះបើចាប់ឆ្នោតប៉ះគ្នា មិនដឹងថា ពួកគេវ៉ៃគ្នាមែនទែន ឬប្រកួតបន្ធូរដៃ ដោយមានការយោគយល់គ្នានោះទេ។
ចំពោះបញ្ហា លោក ជួប វុត្ថា អ្នកគ្រប់គ្រងកីឡាករប្រកួតប្រចាំសង្វៀនថោននិយាយថា៖ «សង្វៀនយើងមានភាពល្បីល្បាញ និងមានការគាំទ្រ ដោយសារតែការប្រកួត មានតម្លាភាព ហើយកីឡាករឡើងវ៉ៃ មិនអាចបន្ធូរដៃឱ្យគ្នាបាននោះទេ។ បន្ថែមលើនេះ សង្វៀនយើងបានផ្តល់តម្លៃខ្លួនប្រកួតខ្ពស់សមរម្យ អ៊ីចឹងបើមើលឃើញមិនស្រួល ហើយដាស់តឿនទៅមិនស្តាប់ និងបណ្តេញចេញមិនឱ្យប្រាក់តម្លៃខ្លួនតែម្តង»៕
