ភ្នំពេញៈ គ្រូបង្វឹកនៃក្លិបប្រដាល់ឆ្មាសសែនជ័យគុនខ្មែរលោក ស៊ន អេលីត ហាក់នៅតែមានការបារម្ភទៅលើភាពមិនវៃឆ្លាតរបស់ សុខ សាវិន នៅពេលកីឡាករវ័យ ២៤ ឆ្នាំរូបនេះត្រូវវិលមកជួបជើងខ្លាំងវ័យក្មេងរបស់ថៃ Tounpe នៅក្នុងការប្រកួតជម្រុះសន្សំពិន្ទុដណ្តើមពានអន្តរជាតិកំពូលអ្នកប្រដាល់ដៃដែក ISI Palm រដូវកាលទី ៤ ក្នុងប្រភេទទម្ងន់ ៦០ គ.ក្រ នារសៀលថ្ងៃអាទិត្យខាងមុខ ហើយកីឡាករ លី ភា ក៏ត្រូវប្រជែងរកការឈ្នះពេលប៉ះ Vithakyayuth ផងដែរ។
អតីតកីឡាករមានជំនាញច្រើនប្រភេទ ស៊ន អេលីត បានប្រាប់ភ្នំពេញ-ប៉ុស្តិ៍ កាលពីម្សិលមិញថា៖ «បើនិយាយពីកម្លាំង សមត្ថភាព និងបច្ចេកទេសប្រកួត គឺ សុខ សាវិន មានគ្រប់អស់ហើយ ប៉ុន្តែចំពោះកលល្បិចនៃការប្រកួត យើងនៅស្ទើរជាង Tounpe បន្តិច ព្រោះ Tounpe ជាកីឡាករជើងចាស់មានបទពិសោធច្រើន»។
សម្រាប់ការប្រកួតបើកឆាកកាលពីថ្ងៃទី ៣ ខែកុម្ភៈកន្លងមកនេះ សុខ សាវិន បានចាញ់ពិន្ទុកីឡាករថៃ Vithakyayuth ប៉ុន្តែ Tounpe បានយកឈ្នះកីឡាករកម្ពុជា លី ភា ដោយពិន្ទុដាច់ ហើយនៅមុនការប្រកួតពាននេះកីឡាករថៃម្នាក់នេះធ្លាប់បានឈ្នះ និងផ្តួលកីឡាករកម្ពុជាជាមួយជំនាញវាយកែង និងបុកកែង ឲ្យសន្លប់ច្រើននាក់មកហើយ។
យ៉ាងណាក៏ដោយ Tounpe ក៏បានសរសើរពីក្បាច់ប្រកួតរបស់ សុខ សាវិន ផងដែរ ព្រោះថៃម្នាក់នេះបានប្រាប់ភ្នំពេញប៉ុស្តិ៍ ក្រោយយកឈ្នះ លី ភា ថា៖ « សុខ សាវិន ក៏ជាបេក្ខភាពម្នាក់ស្ថិតក្នុងការចាប់អារម្មណ៍របស់ខ្ញុំដែរ។ ខ្ញុំមិនធ្លាប់ជួបគេទេ ប៉ុន្តែខ្ញុំមើលឃើញថាក្បាច់ប្រកួតរបស់គេល្អ»។
ប៉ុន្តែ ស៊ន អេលីត បានបង្ហើបថា សុខ សាវិន មានភាគរយតិចក្នុងការយកឈ្នះ Tounpe បើសិនជាគេនៅតែវ៉ៃមិនឆ្លាត។ អេលីត បាននិយាយថា៖ «បើសិនជា សុខ សាវិន វ៉ៃឆ្លាត និងវ៉ៃបានល្អប្រហែលតែពេលជួប Vithakyayuth ក្នុងការប្រកួតជុំទី ១ គឺគេនឹងអាចយកឈ្នះ Tounpe ហើយថាមិនត្រូវអាចនឹងវ៉ៃកីឡាករថៃម្នាក់នេះឲ្យសន្លប់ទៀត ប៉ុន្តែ សាវិន នៅស្ទើរល្បិចកល»។
បងប្រុសរបស់វីរនារីម្ចាស់មេដាយអាស៊ី ស៊ន សៀវម៉ី រូបនេះបានបន្ថែមថា៖ «ក្នុងនាមជាគ្រូ ខ្ញុំតែងតែពង្រឹងបន្ថែម និងប្រាប់ពីល្បិចកលនៃការប្រកួតដល់សិស្ស ប៉ុន្តែវាក៏អាស្រ័យទៅលើភាពវៃឆ្លាតរបស់សិស្សផងដែរ។ សាវិន វ៉ៃចេញតែមួយច្រកដោយសារចូលវ៉ៃត្រង់ៗធ្វើឲ្យគូប្រកួតឆាប់មើលដឹងគឺគេមិនសូវចេះប្រើល្បិចកលដោយការវ៉ៃបញ្ឆោត ឬជន្លឆ្វេងស្តាំអីនោះទេ ដល់តែអ៊ីចឹងយើងពិបាកនឹងសង្ឃឹមដែរ ព្រោះការប្រកួតមើលមិនឃើញទេ គឺជួនកាលយើងភ្លាត់ និងជួនកាលគេភ្លាត់ក៏មាន»។
កីឡាករកម្ពុជា លី ភា នឹងត្រូវប្រកួតជាមួយអ្នកប្រដាល់ថៃ Vithakyayuth ហើយនេះជាការប្រកួតយ៉ាងសំខាន់ដែល លី ភា ត្រូវការឈ្នះជាដាច់ខាត ដើម្បីស្តារឱកាសឡើងវិញក្រោយពីចាញ់ Younpe កាលប្រកួតបើកឆាក។ ប៉ុន្តែតាមសមត្ថភាពប្រកួតរបស់ លី ភា ពិបាកក្នុងការរំពឹងយកឈ្នះ Vithakyayuth ណាស់ព្រោះថៃម្នាក់នេះមានបច្ចេកទេសល្អ និងមានភាពវៃឆ្លាតក្នុងការប្រកួតទៀតផង៕