.jpg)
វេង សុភ័ក្រ (ឆ្វេង) បានព្យាយាមទប់ការទាត់របស់ Aram Boy មុនពេលប្រកាសឲ្យចាញ់ពិន្ទុ។ យឺន ពន្លក
ភ្នំពេញៈ កីឡាករ វេង សុភ័ក្រ បានចាញ់ថៃ Aram Boy ដោយពិន្ទុដាច់ ក្នុងការប្រកួតអន្តរជាតិកម្តៅសាច់ដុំ នៅសង្វៀន SEATV កាលពីព្រឹកថ្ងៃអាទិត្យ មុនពេលរូបគេចូលលេងខ្សែក្រវាត់ Wurkz ទម្ងន់ ៦៣,៥ គ.ក្រ នៅសង្វៀននេះ។ ចំណែក យុគ យក្សផ្លែ និង ឡុង ជិន សុទ្ធតែបានឈ្នះ ៣ ពិន្ទុ ក្នុងការប្រកួតជម្រុះលើកទី ១ ដណ្តើមខ្សែក្រវាត់ខារ៉ាបាវ ទម្ងន់ ៥៧ គីឡូក្រាម កាលពីថ្ងៃសៅរ៍។
វេង សុភ័ក្រ ត្រូវបានគណៈកម្មការដាក់ឲ្យប្រកួតកម្តៅ សាច់ដុំ ជាមួយ Aram Boy ដើម្បីពង្រឹងសមត្ថភាព មុនឡើងប្រកួតខ្សែក្រវាត់ Wurkz នៅថ្ងៃទី ២៤ ខែមិថុនា ប៉ុន្តែត្រូវទទួលរងការបរាជ័យយ៉ាងគ្រាំគ្រាទៅវិញ។ ក្នុងការប្រកួត ៥ ទឹកពេញ Aram Boy មានប្រៀបលើស្នៀតចាប់ឱបឡើងជង្គង់សឹងតែគ្រប់ទឹក ប៉ុន្តែ សុភ័ក្រ នៅតែជម្នះវាយកែង និងកណ្តាប់ដៃបានល្អផងដែរ មុនប្រកាសឲ្យចាញ់ពិន្ទុ Aram Boy ដោយពិន្ទុ ជាឯកច្ឆន្ទ។
ជា សំនៀង ដែលជាសិស្សច្បង ហើយបានមកឲ្យទឹក វេង សុភ័ក្រ នោះ បាននិយាយថា៖ «វេង សុភ័ក្រ ហ្វឹកហាត់បានល្អ ប៉ុន្តែពេលប្រកួតជាមួយ Aram Boy នេះគឺចាញ់ក្បាច់ជង្គង់តែម្តង។ វេង សុភ័ក្រ បានប្រឹងអស់ពីសមត្ថភាពហើយ តែទៅមិនរួចទេ ព្រោះថៃនេះល្អណាស់ និងលំបាយកឈ្នះ»។
ដោយឡែក ការប្រកួតបើកឆាកជម្រុះសន្សំពិន្ទុ ខ្សែក្រវាត់ខារ៉ាបាវ រដូវកាលទី ៦ កាលពីថ្ងៃសៅរ៍ នៅលើសង្វៀន SEATV នោះដែរ កីឡាករ ឡុង ជិន របស់ក្លិបខ្លារខិននៃក្រសួងមហាផ្ទៃ បានចំណាយពេលតែមួយទឹក ប៉ុណ្ណោះ ក្នុងការផ្តួលថៃ Phat Thou ដោយប្រើកណ្តាប់ដៃឲ្យសន្លប់ឈឹងតែម្តង។
ចំណែកគូខ្សែក្រវាត់ ១ គូទៀត យុគ យក្សផ្លែ បានឈ្នះពិន្ទុកីឡាករថៃ Phat Sela ដោយពិន្ទុក្នុងការប្រកួតចំនួន ៥ ទឹក។ ស្ថានភាពប្រកួតរបស់យក្សផ្លែត្រូវបានគេមើលឃើញថា ចាញ់ប្រៀបថៃចំនួន ៤ ទឹកទៅហើយ ប៉ុន្តែនៅទឹកទី ៥ គេមានឱកាសប្រើដៃធ្វើឲ្យកីឡាករថៃវង្វេងវង្វាន់ អាជ្ញាកណ្តាលក៏ចាប់រាប់តែម្តងទៅ។ ចប់ការប្រកួតជ័យជម្នះបានទៅលើ យុគ យក្សផ្លែ តែម្តង ហើយលទ្ធផលនេះធ្វើឲ្យ យុគ យក្សផ្លែ និង ឡុង ជិន មាន ៣ ពិន្ទុដូចគ្នា។
ទាក់ទងទៅនឹងការសន្លប់របស់ថៃ ក្រោយរងកណ្តាប់ដៃមិនធ្ងន់នោះ លោក ថៃ អ៊ូ ប្រតិភូនាំកីឡាករថៃមកប្រកួត បានប្រាប់ថា៖ «កីឡាករ Phat Thou សន្លប់ក្រោមកណ្តាប់ដៃរបស់ ឡុង ជិន មិនធ្ងន់មែន ហើយការសន្លប់នោះអាចសង្ស័យវាធ្វើពុតបន្ថែមផង ខណៈដែលសមត្ថភាពរបស់វា មិនអាចទៅរួចជាមួយ ឡុង ជិននោះ»។
លោក ថៃ អ៊ូ បានបន្ថែមថា ជ័យជម្នះរបស់ យុគ យក្សផ្លែ លើកីឡាករថៃ Phat Sela នោះ ទំនងហេង និងសំណាងច្រើនជាង ព្រោះ ៤ ទឹកកន្លងមក យក្សផ្លែ បានចាញ់ថៃដាច់ ប៉ុន្តែទឹកទី ៥ ស្នៀតដៃរបស់គេ ធ្វើឲ្យឈ្នះថៃទាំងមិនគួរឲ្យជឿ។
គួរបញ្ជាក់ថា សមាសភាពអ្នកប្រដាល់កម្ពុជាចំនួន ៤ នាក់ ដែលត្រូវបានដាក់ឲ្យប្រកួត ជាមួយកីឡាករថៃ ក្នុងការប្រកួតដណ្តើមខ្សែក្រវាត់ខារ៉ាបាវ រដូវកាលទី ៦ នេះ មានកីឡាករឈុត សេរីវ៉ាន់ថន មកពីក្លិបរាហ៊ូខេត្តបាត់ដំបង យុគ យក្សផ្លែ មកពីក្លិបបុរីរាជសីហ៍ ឡុង ជិន និង ធន់ មករា របស់សមាគមកីឡាប្រដាល់ក្រសួងការពារជាតិ ដែលអ្នកទាំងនេះ មានទម្ងន់ ៥៧ គីឡូក្រាមដូចគ្នា៕
