.jpg)
កីឡាករចាន់ រតនា (ស្តាំ) វាយទៅលើកគីឡាករឥណ្ឌូនេស៊ី Abro Fernandes ក្នុងការប្រកួតកាលពីថ្ងៃសុក្រ។ រូបថត សហការី
ក្រុងគូឡាឡាំពួ: អ្នកប្រយុទ្ធគុនចម្រុះរបស់កម្ពុជា ឯម សុវណ្ណារី និងចាន់ រតនា សុទ្ធសឹងបានធ្វើឲ្យកម្ពុជា មានមុខមាត់នៅលើទឹកដីនៃទីក្រុងគូឡាឡាំពួ ក្រោយពីពួកគេដណ្តើមបានជ័យជម្នះតាមរយៈការផ្តួលឲ្យដៃគូសន្លប់ដូចគ្នាក្នុងការប្រកួតក្នុងព្រឹត្តិការណ៍ ONE: Destiny of Champions ប្រទេសម៉ាឡេស៊ី កាលពីថ្ងៃសុក្រ។
កីឡាការិនីកូនខ្មែរដើមអាមេរិកសុវណ្ណារី បានចំណាយពេលច្រើនជាង១,២០នាទីប៉ុណ្ណោះ ដើម្បីផ្តួលកីឡាការិនីអ៊ុយក្រែន Iryna Kyselova ក្នុងទម្ងន់៦៣,៥គីឡូក្រាម ឲ្យសន្លប់ក្នុងការប្រកួតបើកឆាកនៅរាត្រីដដែលនោះ។
កីឡាការិនីវ័យ២៦ឆ្នាំរូបនេះ អាចសង្គ្រោះពីការព្យាយាមក្លេរបស់ Iryna យ៉ាងល្អ មុននឹងដណ្តើមបានឱកាសក្នុងការអង្គុយលើដៃគូវិញ ហើយសុវណ្ណារី បានវាយយ៉ាងសន្ធាប់ទៅលើផ្ទៃមុខលើដៃគូដើម្បីបង្ខំឲ្យអាជ្ញាកណ្តាលបញ្ឈប់ការប្រកួតនៅដើមទឹកទី១តែម្តង។
ក្រោយពីដណ្តើមបានជ័យជម្នះក្នុងការបង្ហាញខ្លួនជាលើកទី១របស់នាងក្នុងកម្មវិធីប្រកួតដែលត្រូវបានរៀបចំឡើងដោយអង្គភាព ONE Championship (ONE) សុវណ្ណារី បានបញ្ជាក់ថា នាងពិតជារំភើបណាស់ក្នុងការដណ្តើមបានជ័យជម្នះនេះ ដើម្បីធ្វើឲ្យកម្ពុជាមានមោទនភាព។
កីឡាករចាន់ រតនា (ពីលើ) ព្យាយាមវាយទៅលើគូប្រកួតរបស់ខ្លួនក្នុងការប្រកួត ONE: Destiny of Champions កាលពីថ្ងៃសុក្រ។ រូបថត សហការី
កីឡាការិនីរូបនេះបានប្រាប់ភ្នំពេញ ប៉ុស្តិ៍ នៅឯសង្វៀន Axiata Arena ថា៖ «ខ្ញុំពិតជារីករាយណាស់។ ខ្ញុំបានត្រៀមការប្រកួតយ៉ាងល្អ ដោយយើងបានផ្តោតលើការរារាំងការប្រើប្រាស់ស្នៀតក្លេរបស់គូប្រកួត។ គម្រោងរបស់ខ្ញុំគឺប្រើប្រាស់កណ្តាប់ដៃ ប៉ុន្តែ ពេលដែលនាងចង់ប្រើប្រាស់ក្បាច់ក្លេ ខ្ញុំត្រូវតែមានការទទួលខុសត្រូវក្នុងការរារាំង»។
សុវណ្ណារី បានបន្ថែមទៀតថា៖ «ខ្ញុំពិតជាមានមោទនភាពក្នុងការប្រកួតតំណាងឲ្យកម្ពុជា។ ខ្ញុំពិតជារំភើបណាស់ក្នុងការធ្វើឲ្យកម្ពុជាមានមោទនភាពតាមរយៈការដណ្តើមបានជ័យជម្នះ»។
អ្នកប្រយុទ្ធរបស់កម្ពុជាម្នាក់ទៀតនៅរាត្រីដដែលនោះ ចាន់ រតនា បានគេចផុតពីការសន្លប់ក្នុងទឹកទី១ និងការចាញ់ដោយស្នៀតក្លេនៅដើមទឹកទី២ នៅពេលដែលប្រកួតជាមួយនឹងកីឡាករឥណ្ឌូនេស៊ី Abro Fernandes មុននឹងវាយឲ្យដៃគូរបស់ខ្លួនសន្លប់នៅរយៈពេល១នាទីចុងក្រោយ។
ចាន់ រតនា ហាក់ចាញ់ប្រៀបទាំងស្នៀតក្លេ និងការវាយដោយជំហររបស់កីឡាករ Fernandes ក្នុងទឹកទី១ និងត្រូវតែព្យាយាមគេចផុតពីស្នៀតក្លេរបស់ដៃគូខ្លួននៅដើមទឹកទី២ ខណៈដែលពួកគេបានសម្តែងនូវការធ្លាក់ចុះនូវថាមពលដូចគ្នាក្នុងទឹកនេះ។
ប៉ុន្តែ ការមានស្មារតីតស៊ូយ៉ាងខ្លាំង និងការស្រេកឃ្លានជ័យជម្នះ បានជំរុញឲ្យរតនា យកឈ្នះលើដៃគូទាំងត្រដាបត្រដួស តាមរយៈការប្រើប្រាស់ស្នៀតទាត់ ជង្គង់ និងកណ្តាប់ ដើម្បីបង្ខំឲ្យអាជ្ញាកណ្តាលបញ្ឈប់ការប្រកួតក្នុងទម្ងន់៦១,២គីឡូក្រាមនេះ នៅនាទី ទី៤:០៦នៃទឹកទី២តែម្តង។
កីឡាការិនីឯម សុវណ្ណារី (ពីលើ) បានវាយឲ្យកីឡាការិនីអ៊ុយក្រែន Iryna Kyselova នៅត្រឹមទឹកទី១ ក្នុងការប្រកួតកាលពីថ្ងៃសុក្រ។ រូបថត សហការី
ក្រោយពីការប្រកួត កីឡាករវ័យ៣២ឆ្នាំរូបនេះបានបញ្ជាក់ថា៖ «ពេលខ្ញុំត្រូវមួយដៃរបស់គាត់ក្នុងទឹកទី១ ខ្ញុំស្ទើរតែសន្លប់ទៅហើយ ព្រោះកណ្តាប់ដៃគាត់ធ្ងន់ ប៉ុន្តែ ខ្ញុំបានខាំធ្មេញព្យាយាមចូលវាយ ដើម្បីពង្រឹងកម្លាំងស្មារតី ដើម្បីរកឱកាសទាត់វិញ»។
រតនាបានបន្តថា៖ «ក្រោយមក ខ្ញុំបានព្យាយាមវាយសម្រុកលើដៃគូ ដើម្បីបម្រូលស្មារតី និងស្ទង់កម្លាំងរបស់គាត់។ ប៉ុន្តែ ក្រោយពីខ្ញុំបានគេចផុតពីការក្លេរបស់ខ្ញុំ ឃើញថា ទាំងខ្ញុំ និងគាត់ពិតជាធ្លាក់ចុះកម្លាំងដូចគ្នា ប៉ុន្តែ គាត់ហាក់ដូចជាអស់កម្លាំងសុះជាងខ្ញុំ ហេតុនេះ ខ្ញុំបានព្យាយាមវាយកម្លាំងចុងក្រោយរបស់ខ្ញុំ ដើម្បីដណ្តើមបានជ័យជម្នះនេះតែម្តង»។
ក្នុងការប្រកួតគូឯកនៃព្រឹត្តិការណ៍ ONE: Destiny of Champions នៅរាត្រី ដដែលនោះ កីឡាករជើងខ្លាំងថៃ Yodsanklai IWE Fairtex បានយកឈ្នះលើកីឡាករអូស្ត្រាលី Luis Regis យ៉ាងងាយ តាមរយៈការវាយឲ្យរូបគេដួលសន្លប់ ក្រោយពីចាប់ផ្តើមប្រកួតបានត្រឹមតែ២,០៨នាទីប៉ុណ្ណោះនៃទឹកទី១៕
