ភ្នំពេញ៖ កីឡាការិនីកូនខ្មែរ-អាមេរិក ដែលកំពុងដាក់ចិត្តកាន់តែជ្រៅទៅលើការប្រកួតគុនចម្រុះ MMA ឯម សុវណ្ណារី បានបង្ហាញភាពជឿជាក់ខ្លាំងទៅលើសមត្ថភាពរបស់ខ្លួនថា កញ្ញានឹងអាចយកឈ្នះលើអ្នកប្រយុទ្ធរបស់អាមេរិក Colbey Northcut ក្នុងភាគរយខ្ពស់បំផុត សម្រាប់ការប្រកួត ONE Championship ឬ ONE: TNT IV នៅលើទឹកដីសិង្ហបុរី នារាត្រីថ្ងៃទី ២៨ ខែ មេសា ឆ្នាំ ២០២១។
ការត្រៀមបង្ហាញខ្លួនជាថ្មី នៅ ONE នាពេលខាងមុខនេះ វាកើតឡើងតាមការចង់បានរបស់ ឯម សុវណ្ណារី ដែលបានស្នើសុំទៅអ្នកគ្រប់គ្រងអង្គភាពរៀបចំការប្រកួតក្បាច់គុនចម្រុះនេះដោយផ្ទាល់ បន្ទាប់ពីនាងបានផ្តួលកីឡាការិនីរបស់កូរ៉េខាងត្បូង Choi Jeong Yun កាលពីខែមករា ហើយនេះក៏ជាគោលដៅ ដែល ឯម សុវណ្ណារី ចង់បានតាំងពីកញ្ញាបានចូលប្រឡូកក្នុងអាជីពគុនចម្រុះនេះ តាំងឆ្នាំ ២០១៦ ផងដែរ ព្រោះកន្លងមក ឯម សុវណ្ណារី ប្រកួតបានត្រឹម ១ ដងប៉ុណ្ណោះ ក្នុង ១ ឆ្នាំ។
កីឡាការិនី ឯម សុវណ្ណារី បានប្រាប់ ភ្នំពេញ ប៉ុស្តិ៍ តាមហ្វេសប៊ុកថា៖ «បន្ទាប់ពីខ្ញុំបានផ្ដួលកីឡាការិនីកូរ៉េខាងត្បូង Choi Jeong Yun ឱ្យសន្លប់នៅក្នុងទឹកទី២ នៃការប្រកួត ONE Championship នៅប្រទេសសិង្ហបុរី កាលពីខែមករា ឆ្នាំ ២០២១ កន្លងទៅនោះ ម្ចាស់កម្មវិធីនៃសង្វៀន ONE បានលើកទឹកចិត្ត និងសម្រេចដាក់ឱ្យរូបខ្ញុំ បន្តប្រកួតជាមួយនឹងជើងខ្លាំងម្នាក់នៅប្រទេសអាមេរិក គឺ Colbey Northcut ក្នុងព្រឹត្តិការណ៍ ONE: TNT IV នាថ្ងៃទី ២៨ ខែ មេសា ឆ្នាំ ២០២១ នៅលើទឹកដីប្រទេសសិង្ហបុរី ដដែល»។
កីឡាការិនីដែលចង់វិវឌ្ឍខ្លួនឱ្យក្លាយជាអ្នកល្បីនៅសង្វៀន ONE Championship ហើយក៏មានបំណងចង់ក្លាយជាកីឡាការិនីជម្រើសជាតិកម្ពុជា ឯម សុវណ្ណារី បានប្រាប់បន្ថែមថា៖ «កីឡាការិនី Colbey Northcut ជាជើងខ្លាំងម្នាក់ ដែលមានបទពិសោធប្រកួតច្រើន ប៉ុន្តែខ្ញុំបានតាំងចិត្តយកឈ្នះឱ្យបាន គឺខ្ញុំមានសង្ឃឹមយកឈ្នះរហូតដល់ ៩០ ភាគរយ សម្រាប់ការប្រកួតលើកនេះ»។
កីឡាការិនីកូនខ្មែរ-អាមេរិក វ័យ ២៤ ឆ្នាំ ឯម សុវណ្ណារី មានឪពុកម្តាយជាខ្មែររស់នៅសហរដ្ឋអាមេរិក ហើយនាងបានកើតនៅទីនោះ។ សុវណ្ណារី ធ្លាប់ប្រកួតបាន ៥ លើក នៅសង្វៀន ONE ដោយឈ្នះ ៤ និងចាញ់ ១ ដង ហើយការប្រកួតនៅខែមេសា ឆ្នាំ ២០២១ ខាងមុខនេះ នឹងក្លាយជាការប្រកួតលើកទី៦ ក្នុងអាជីពរបស់នាង។ ចំពោះគោលបំណងធំ សម្រាប់ការចាប់យកអាជីពនេះ សុវណ្ណារី ធ្លាប់បានបញ្ជាក់ថា៖ «ខ្ញុំចង់ក្លាយជាអ្នកប្រដាល់ស្ត្រីដ៏ល្បីល្បាញម្នាក់ក្នុងការប្រកួតគុនចម្រុះ MMA នេះ ឱ្យកម្ពុជា ដោយសង្ឃឹមថា បងប្អូនខ្មែរស្រឡាញ់គាំទ្រខ្លាំង»។
ចំណែកកីឡាការិនីអាមេរិក Colbey Northcut ជាអ្នកប្រយុទ្ធចាស់វស្សាម្នាក់ដែរ តែមានបទពិសោធនៅសង្វៀន ONE ប្រហាក់ប្រហែលនឹង ឯម សុវណ្ណារី ដែរ។ កីឡាការិនីមានអាយុ ២៧ ឆ្នាំរូបនេះ ធ្លាប់ប្រកួតបាន ៧ ដង ឈ្នះ ៥ និងចាញ់ ២ ដង ហើយការប្រកួតចុងក្រោយ Northcut បានយកឈ្នះកីឡាការិនីឥណ្ឌូនេស៊ី Putri Padmi ដោយពិន្ទុ។
នៅពេលសួរពីបញ្ហាកូវីដ ១៩ ដែលអាចបង្កជាបញ្ហា ឬឆ្លង នៅពេលធ្វើដំណើរមកប្រកួតនៅក្នុងតំបន់អាស៊ី ឬពេលហ្វឹកហាត់នោះ កីឡាការិនី ឯម សុវណ្ណារី បានប្រាប់ថា៖ «ការធ្វើដំណើរ និងការហ្វឹកហាត់ គឺគេ (ONE) ធ្វើបានល្អ ដោយដាក់ឱ្យខ្ញុំ នៅដាច់ដោយឡែកក្នុងបន្ទប់ ឬហាត់ក្នុងកន្លែងមួយ សម្រាប់តែខ្ញុំម្នាក់ និងគ្រូបង្វឹកម្នាក់ ដែលមើលការខុសត្រូវរួម និងក្រោមការពិនិត្យតាមដានពីគ្រូពេទ្យជាប្រចាំ។ ការធ្វើអ៊ីចឹង គឺចាប់ផ្តើម ៤ សប្តាហ៍ រហូតដល់យប់ថ្ងៃប្រកួតតែម្តង ហើយដៃគូប្រកួតរបស់ខ្ញុំ ក៏ធ្វើបែបនេះដូចគ្នា ដើម្បីការពារកូវីដ ១៩ ឱ្យបាន និងមានប្រសិទ្ធភាព»៕