ភ្នំពេញៈ កីឡាករ សូត្រ ប៊ុនធី បានធ្វើឲ្យការប្រជែងឱកាសចុងក្រោយរបស់ខ្លួនជាមួយជនរួមជាតិ ចាន់ សំអាត ដើម្បីរកអ្នកមានប្រៀបបានឡើងទៅកាន់ការប្រកួតវគ្គពាក់កណ្តាលផ្តាច់ព្រ័ត្រខ្សែក្រវាត់ខារ៉ាបាវរដូវកាលទី ៩ នៅសង្វៀន SEATV នារសៀលថ្ងៃសៅរ៍នេះបានរលាយបាត់ទាំងស្រុង ខណៈរូបគេត្រូវកំណត់ឲ្យចាញ់ដោយស្វ័យប្រវត្តិ ព្រោះតែរក្សាទម្ងន់ខ្លួនឯងមិនបាន តាមការកំណត់នោះ។
ការរក្សាទម្ងន់មិនបាននេះ បានធ្វើឲ្យការប្រកួតចុងក្រោយរបស់ សូត្រ ប៊ុនធី ជាមួយថៃ KhanThep នៅថ្ងៃសៅរ៍នេះក្លាយជាការប្រកួតដែលមិនបានផល គឺបានត្រឹមបង្គ្រប់កិច្ចតែប៉ុណ្ណោះ។ ផ្ទុយពីនេះ ចាន់ សំអាត នឹងទទួលបានលេខ ២ ប្រចាំពូលកម្ពុជា បន្ទាប់ពី សុខ សាវិន ដោយស្វ័យប្រវត្តិ បើទោះបីជាការប្រកួតលើកនេះរូបគេចាញ់ថៃ Phut Phat Noy ក៏ដោយ ព្រោះ ៣ ប្រកួតកន្លងមកនេះ សំអាត បានឈ្នះ ២ និងចាញ់ ១ ខណៈ ៣ ប្រកួតរបស់ សូត្រ ប៊ុនធី បានឈ្នះ ១ និងចាញ់ ២ ដងរួចទៅហើយ។
កីឡាករ សូត្រ ប៊ុនធី ដែលធ្លាប់ជាជើងខ្លាំងមួយរូបនោះបានប្រាប់ពីការប្រកួតធ្លាក់ចុះរបស់ខ្លួនថា៖ «មូលហេតុប្រកួតធ្លាក់ចុះដោយបញ្ហាបញ្ចុះសម្រកទម្ងន់ ព្រោះទម្ងន់ពិតរបស់ខ្ញុំឥឡូវឡើងដល់ ៦៤ គីឡូក្រាម ហើយត្រូវរត់មកចុះត្រឹម ៦០ គីឡូក្រាមគឺខ្សោយកម្លាំង ឆាប់អស់ណាស់។ ហេតុនេះក្រោយបញ្ចប់ខ្សែក្រវាត់នេះ ខ្ញុំនឹងសុំឲ្យគណៈកម្មការចាប់គូវ៉ៃទម្ងន់ចាប់ពី ៦៣,៥ គីឡូក្រាមទើបបាន ព្រោះសម្រកទម្ងន់គឺប្រឈមទៅនឹងការចាញ់ភាគច្រើន»។
ចំណែកលោក ថៃ អ៊ូ អ្នកនាំកីឡាករថៃមកប្រកួតបានប្រាប់ថា៖ «កីឡាករ KhanThep លំបាកឈ្នះ សូត្រ ប៊ុនធី ណាស់ ទោះបីជា ប៊ុនធី សម្រកទម្ងន់ច្រើនក៏ដោយ។ សូត្រ ប៊ុនធី នឹងអាចនៅវ៉ៃបានល្អ ៣ ទឹកដែរ ហើយជង្គង់ និងកែងរបស់គេអាចផ្តួលកីឡាករថៃក៏ថាបានដែរ»។
ទាក់ទងនឹងការប្រកួតបង្គ្រប់កិច្ចនេះលោក រាជ សុផែន ស្នងការប្រកួតប្រចាំនៅសង្វៀន SEATV បាននិយាយថា៖ «សម្រាប់គូប្រកួតបង្គ្រប់កិច្ចតាមរូបមន្ត បើវ៉ៃមិនអស់ពីសមត្ថភាពគឺបណ្តេញចុះ មិនប្រកាសលទ្ធផល ហើយក៏មិនឲ្យប្រាក់តម្លៃខ្លួនដែរ និងអាចទទួលជាប់ពិន័យប្រសិនបើរកឃើញកំហុស»។
ដោយឡែក ចាន់ សំអាត ដែលត្រូវជួប Phut Phatnoy ដែល ៣ ប្រកួតកន្លងមកបានឈ្នះ ២ និងចាញ់ ១ ដងដូចគ្នានោះគឺអាចនឹងមានភាពស្វិតស្វាញខ្លាំង ព្រោះ Phut Phatnoy ត្រូវការឈ្នះដាច់ខាត ដើម្បីបានឡើងទៅវគ្គបន្ត តំណាងឲ្យពូលថៃដែរ ដ្បិតអីការចាញ់នឹងធ្វើឲ្យរូបគេធ្លាក់ចេញពីការប្រកួតនេះ។
យ៉ាងណាក៏ដោយ ចាន់ សំអាត ប្រាប់ថា៖ «ខ្ញុំហាត់បានល្អ និងធានាវ៉ៃអស់ពីសមត្ថភាពគឺមានទំនុកចិត្តឈ្នះ ៨០ ភាគរយ។ បើទោះបីជាខ្ញុំត្រូវធ្វើដំណើរពីខេត្តឆ្ងាយ ប៉ុន្តែខ្ញុំបានមកស្នាក់នៅភ្នំពេញដោយទទួលបានការយកចិត្តទុកដាក់ពីអ្នកគ្រូ សុខុម ជួយឧបត្ថម្ភគាំទ្រ»៕