ភ្នំពេញ: កីឡាករសូត្រ ប៊ុនធី បានបន្តឈ្នះកីឡាករថៃ Phat Ngenthon ដោយពិន្ទុ ដើម្បីទទួលបាន ៣ ពិន្ទុបន្ថែម និងដើម្បីឈរក្នុងលំដាប់កំពូលតារាងបណ្តោះអាសន្ន នៅខាងពូលកីឡាករកម្ពុជា ក្នុងការប្រកួតជម្រុះវគ្គសន្សំពិន្ទុខ្សែក្រវាត់ខារ៉ាបាវទម្ងន់ ៦០ គីឡូក្រាម កាលពីថ្ងៃសៅរ៍។ ជាមួយគ្នានេះ កីឡាករកម្ពុជាម្នាក់ទៀតដែលលេងក្នុងខ្សែក្រវាត់នេះដែរ លី ភា មកពីក្លិបសំរោងកោងខេត្តបាត់ដំបង បានបោះបង់ការប្រកួតត្រឹមទឹកទី ៣ ក្រោយកីឡាករថៃ Phat Maha បានទាត់ឲ្យខូចជើងក្រោមក្នុងការប្រកួតនៅលើសង្វៀនអាស៊ីអាគ្នេយ៍។
នៅសង្វៀនប្រដាល់ជាមួយគ្នានេះដែរ ក្នុងវគ្គជម្រុះចុងក្រោយនៃពានរង្វាន់មួយទៀតគឺ Ganzberg ទម្ងន់ ៦៥ គីឡូក្រាមកាលពីយប់សៅរ៍ ដើម្បីដណ្តើមកៅអីវគ្គផ្តាច់ព្រ័ត្ររវាងកីឡាករជាមិត្តជិតស្និទ្ធនឹងគ្នា អ៊ុំ វណ្ណេត មកពីក្លិបព្រែកឯងកីឡា និងកីឡាករមាស សុជាតិ មកពីក្លិបឃ្លាំងមឿងខេត្តពោធិ៍សាត់ បានវាយគ្នាអស់ពីសមត្ថភាព ហើយលទ្ធផលបានលើ វណ្ណេត ជាអ្នកឈ្នះ និងបានសិទ្ធិទៅប្រកួតវគ្គផ្តាច់ព្រ័ត្រដណ្តើមយកទឹកប្រាក់ ២៥០០ ដុល្លារ។
ការប្រកួតរបស់សូត្រ ប៊ុនធី មកពីបក្សីស្លាបដែកលើកនេះជាមួយកីឡាករថៃ Phat Ngenthon មានលក្ខណៈតឹងតែង និងស្វិតស្វាញបំផុត។
ការតស៊ូដណ្តើមពិន្ទុគ្នាក្នុងរយៈពេលត្រឹម៣ទឹកដំបូង គេមិនទាន់មើលឃើញពីខាងណាមានប្រៀបពិន្ទុនាំមុខនៅឡើយ ស្របពេលដែលក្បាច់ប្រយុទ្ធរបស់អ្នកប្រដាល់ទាំង ២ មានគ្រប់ស្នៀត និងល្បិចកលដូចគ្នា ទាំងស្នៀត កែង ជង្គង់ និងទាត់គ្រប់ទម្រង់ ដែលធ្វើឲ្យអ្នកទស្សនាពេញចិត្តបំផុត។
លុះការប្រកួតបានឈានចូលដល់ទឹកទី ៤ និងទឹកទី ៥ ទើបគេមើលឃើញថា កីឡាករសូត្រ ប៊ុនធី មានប្រៀបនាំមុខច្រើនជាង។ ចប់ការប្រកួតចំនួន ៥ ទឹកពេញ គណៈវិនិច្ឆ័យបានប្រកាសពិន្ទុពីសំណាក់ចៅក្រមចំនួន ៥ នាក់ ដើម្បីផ្តល់ពិន្ទុឲ្យសូត្រ ប៊ុនធី ឈ្នះជាឯកច្ឆន្ទ ពោលគឺ ៥ ទល់ ០។
គូប្រដាល់ខ្សែក្រវាត់មួយគូទៀត កីឡាករលី ភា បានចាញ់កីឡាករថៃ Phat Maha ត្រឹមទឹកទី ៣ ប៉ុណ្ណោះ ដោយគ្មានលទ្ធភាពតដៃ ស្របពេលដែលកីឡាករថៃទាត់សន្ធាប់ ដែលបង្ខំឲ្យមានបញ្ហាជើងក្រោម ហើយអាជ្ញាកណ្តាលបញ្ឈប់តែម្តង។ ក្រោយពីការប្រកួតនេះ ក្នុងពូលកីឡាករកម្ពុជា សូត្រ ប៊ុនធី បានឈ្នះ ២ ប្រកួត មាន ៦ ពិន្ទុ ឈរក្នុងលំដាប់លេខ ១ ជាបណ្តោះអាសន្ន ចំណែកកីឡាករថៃចំនួន ៤ នាក់ដែលប្រកួត ៣ សប្តាហ៍កន្លងមក ទើបតែមានកីឡាករ Phat Maha ប៉ុណ្ណោះ ដែលបានឈ្នះម្តង ខណៈមិត្តរួមជាតិថៃដូចគ្នាចាញ់ទាំងអស់។ ក្នុងការប្រកួតគូមិត្តភាព ១ គូទៀត កីឡាករជើងថ្មីឯម ឡេងលី មកពីក្លិបថ្មគោលពោធិ៍សែនជ័យ បានយកឈ្នះកីឡាករជើងខ្លាំង Super Chhai ម្ចាស់ខ្សែក្រវាត់ទៅវិញ៕