.jpg)
កីឡាករសូត្រ ប៊ុនធី ឈានទៅប្រកួតវគ្គផ្តាច់ព្រ័ត្រ ក្រោយយកឈ្នះលើកីឡាករថៃ Chhayakphoum។ យឺន ពន្លក
ភ្នំពេញ: ការប្រកួតជម្រុះសន្សំពិន្ទុខ្សែក្រវាត់ខារ៉ាបាវទម្ងន់ ៦០ គីឡូក្រាមរបស់សង្វៀនអាស៊ីអាគ្នេយ៍ បានរកឃើញជើងខ្លាំង ២ នាក់ ដែលមានពិន្ទុខ្ពស់ជាងគេ ក្រោយពីសូត្រ ប៊ុនធី និងកីឡាករ Phat Thana បានបញ្ចប់ដោយឈរលេខ ១ ក្នុងពូលកីឡាករកម្ពុជា និងថៃរៀងៗខ្លួន ដើម្បីទទួលបានឱកាសទៅប្រកួតផ្តាច់ព្រ័ត្រដណ្តើមខ្សែក្រវាត់ និងទឹកប្រាក់ចំនួន ៥០០០ ដុល្លារ ដែលគ្រោងធ្វើនៅថ្ងៃទី ១៧ ខែវិច្ឆិកា ឆ្នាំ ២០១៨ ខាងមុខ។
សូត្រ ប៊ុនធី មកពីក្លិបបក្សីស្លាបដែកនៃសមាគមប្រដាល់ក្រសួងមហាផ្ទៃ មួយរយៈនេះប្រកួតបានល្អ ដោយឈ្នះជានិច្ច។ ក្នុងអំឡុងប្រកួតវគ្គជម្រុះចំនួន ៤ ប្រកួតជាមួយកីឡាករថៃ ៤ នាក់ សូត្រ ប៊ុនធី ធ្វើបានល្អ ពោលគឺឈ្នះពិន្ទុកីឡាករថៃ ២ នាក់ និងផ្តួលឲ្យសន្លប់ត្រឹមទឹកទី ១ ចំនួន ២ នាក់ ក្រោយពីបានផ្តួលកីឡាករថៃ Phat Chhayakphoum កាលពីល្ងាចថ្ងៃសៅរ៍ ទី ៣ ខែវិច្ឆិកា ឆ្នាំ ២០១៨។
ជ័យជម្នះរបស់កីឡាករសូត្រ ប៊ុនធី ចំនួន ៤ ប្រកួតក្នុងវគ្គជម្រុះនេះ ជួយឲ្យគេមាន ១២ ពិន្ទុពេញ និងគ្រប់គ្រាន់បានទៅប្រកួតវគ្គផ្តាច់ព្រ័ត្រ ខណៈដែលកីឡាករសុខ សាវិន មកពីក្លិបឆ្មាសសែនជ័យ បានធ្លាក់ចេញដោយសារតែ ៤ ប្រកួតជាមួយថៃដូចគ្នាឈ្នះ ៣ លើក និងចាញ់ ១ លើកមានតែ ១០ ពិន្ទុប៉ុណ្ណោះ។
កីឡាករថៃចំនួន ៤ នាក់ក្នុងពូល B មានតែកីឡាករ PhatThana ម្នាក់ប៉ុណ្ណោះដែលមាន ១០ ពិន្ទុ តាមរយៈការឈ្នះ ៣ និងចាញ់ ១ លើក ដើម្បីឡើងទៅវគ្គផ្តាច់ព្រ័ត្រជាមួយកីឡាករកម្ពុជាប៊ុនធី និងដើម្បីដណ្តើមយកខ្សែក្រវាត់ ក៏ដូចជាទឹកប្រាក់ ៥០០០ ដុល្លារអាមេរិក។
សូត្រ ប៊ុនធី បាននិយាយក្រោយប្រកួតថា៖ «ការផ្តួលឲ្យថៃសន្លប់យ៉ាងលឿននេះ ខ្ញុំក៏ប៉ាន់ស្មានមិនដឹងដែរ ដោយក្នុងឱកាសដែលចាប់បានឡើងជង្គង់នោះ ខ្ញុំបានកាច់បួងឡើងជង្គង់ស្តាំចូលចំក្តោងច្រមុះបណ្តាលឲ្យថៃសន្លប់ធំតែម្តងទៅ»។
ប៊ុនធី បានបន្តថា៖ «ខ្ញុំបានគិតថា នៅសល់ការប្រកួតផ្តាច់ព្រ័ត្រ ១ លើកទៀតទើបដឹងថា ខ្សែក្រវាត់ និងប្រាក់ចំនួន ៥០០០ ដុល្លាជារបស់គេ ឬខ្ញុំ»។
ទោះជាយ៉ាងណា ប៊ុនធី បានបង្ហាញពីការសង្ឃឹមច្បាស់ថា៖ «ខ្ញុំមានទំនុកចិត្តឈ្នះខ្សែក្រវាត់នេះ ៨០ ភាគរយ»។
លោកសួន ប៊ុនសូត្រ ជាគ្រូបង្វឹក និងជាឪពុកបង្កើត បាននិយាយថា៖ «ខ្ញុំនឹងប្រឹងបង្វឹក និងថែទាំសុខភាពប៊ុនធី ឲ្យបានល្អដើម្បីត្រៀមការប្រកួតនេះឲ្យបានល្អ ឈានទៅយកខ្សែក្រវាត់ក្នុងទម្ងន់ ៦០ គីឡូក្រាមនេះឲ្យបាន»។
លោកគ្រូបង្វឹកសួន ប៊ុនសូត្រ បានបន្ថែមថា៖ «យើងមិនអាចធ្វេសប្រហែសបានទេពីព្រោះជាឱកាសមាស ហើយជីវភាពក្នុងគ្រួសារទាំងមូលគឺពឹងផ្អែកលើមុខរបរប្រដាល់ទាំងអស់»។
សូត្រ ប៊ុនធី មានប្រវត្តិប្រកួតបានចំនួន ១១៥ លើក ឈ្នះ ៩១ លើក ចាញ់ ២០ លើក និងស្មើ ៤ លើក ក្នុងនោះផ្តួលដៃគូឲ្យសន្លប់បានចំនួន ២៥ លើក៕
