.jpg)
អ្នកប្រដាល់ត្រកូល «សូត្រ» រួមមាន សូត្រ ប៊ុនធី (ឆ្វេង) សូត្រ វាសនា, សូត្រ សុខឃីម និង សូត្រ ខេវិន។ សហការី
ភ្នំពេញ៖ ក្លិបប្រដាល់គុនខ្មែរមួយចំនួន ត្រូវបានផ្អាកជាបណ្តោះអាសន្ន ដើម្បីរក្សាការពារបញ្ហាជំងឺឆ្លងកូវីដ ១៩ និងបន្ថយការជួបជុំគ្នាច្រើន ក្នុងការហ្វឹកហាត់ ប៉ុន្តែចំពោះក្លិបបក្សីស្លាបដែករបស់លោកគ្រូបង្វឹក សួន ប៊ុនសូត្រ មិនអាចបិទបានទេ ព្រោះការហ្វឹកហាត់ពេលនេះ គ្មានកីឡាករណាក្រៅពីកូនបង្កើតរបស់លោកទាំង ៤ នោះទេ ពោលគឺការហ្វឹកហាត់ហូបចុក ស្នាក់នៅ ក្នុងដំបូលផ្ទះតែមួយ គ្មានអ្នកដទៃឡើយ ហើយអ្វីដែលកាន់តែពិសេស គឺនៅសប្តាហ៍នេះ កូនរបស់គាត់ទាំង ៤ នាក់ សុទ្ធតែត្រូវឡើងប្រកួតនៅលើសង្វៀន CNC ដូចគ្នា។
លោក សួន ប៊ុនសូត្រ ជាគ្រូបង្វឹក និងជាម្ចាស់ក្លិបបក្សីស្លាបដែកផ្ទាល់ ដោយមានប្រពន្ធ និងកូនទាំងអស់ ជាអ្នកហាត់ និងឡើងប្រដាល់ជាមុខរបរតែ ១ គត់ ដើម្បីទ្រទ្រង់ជីវភាពប្រចាំថ្ងៃ ហើយគិតមកដល់បច្ចុប្បន្ននេះ ក្លិបរបស់លោកគ្មានកីឡាករណាម្នាក់នៅហ្វឹកហាត់ ក្រៅពីកូនទាំង ៤ នាក់របស់គាត់នោះឡើយ ខណៈដែលទីផ្សារប្រកួតរបស់កូនគាត់ទាំង ៤ នាក់នេះ កំពុងពេញនិយមខ្លាំង ព្រោះសមត្ថភាព និងក្បាច់គុនរបស់ពួកគេ សុទ្ធតែស្ថិតនៅក្នុងលំដាប់ជួរមុខទាំងអស់។
អតីតកាលរបស់លោក សួន ប៊ុនសូត្រ មិនធ្លាប់មានបទពិសោធជាកីឡាករល្អឆ្នើម ដែលមានឈ្មោះល្បីល្បាញនោះឡើយ ប៉ុន្តែគាត់បានបង្វឹកកូនៗទាំង ៤ នាក់ រួមមាន សូត្រ ប៊ុនធី, សូត្រ ខេវិន, សូត្រ វាសនា និង សូត្រ សុខឃីម ឱ្យក្លាយជាកីឡាករមានសមត្ថភាពល្អលំដាប់ជួរមុខ ព្រមទាំងអាចរកបានប្រាក់ចំណូលពីប្រកួតនេះ ច្រើនគួរសម គឺអាចទ្រទ្រង់ជីវភាពបានយ៉ាងល្អប្រសើរ និងមានផ្ទះសំបែងផ្ទាល់ខ្លួនទៀតផង។
លោក សួន ប៊ុនសូត្រ បានប្រាប់ ភ្នំពេញ ប៉ុស្តិ៍ ថា៖ «ខ្ញុំមិនធ្លាប់ជាកីឡាករឆ្នើមនោះទេ គឺក្នុង ១ ជីវិតរបស់ខ្ញុំ ធ្លាប់បានប្រកួតប្រដាល់សកលត្រឹម ៣ លើក ដោយឈ្នះ ១ និងចាញ់ ២ ដង ប៉ុន្តែខ្ញុំភាគច្រើនដើរជាមួយអ្នកប្រដាល់ល្បីៗមួយចំនួន។ សម្រាប់បញ្ហាកូវីដ ១៩ កំពុងរាតត្បាតក៏ខ្ញុំមិនអាចបិទក្លិបបានដែរ ព្រោះក្នុងក្លិបទាំងមូលមានតែកូន ប្រពន្ធ និងខ្ញុំផ្ទាល់ប៉ុណ្ណឹង គ្មានអ្នកណាក្រៅ មកហាត់ទៀតឡើយ»។
លោកបានបន្តថា៖ «កូនៗរបស់ខ្ញុំ មានសេវាប្រកួតជាប្រចាំ គឺមិនលំបាកស្វែងរកសង្វៀនប្រកួតនោះទេ ព្រោះពួកគេមានសមត្ថភាពល្អ ហ្វឹកហាត់ល្អ ជាប្រចាំ ហើយប្រាក់ចំណូលបានមកពីតម្លៃខ្លួនប្រកួតវិញ គឺកាន់តែប្រសើរអាចគ្រប់គ្រងជីវភាពបានល្អសមរម្យ។ កូនដែលល្អជាងគេក្នុងកម្រិតគូឯកគឺ សូត្រ ប៊ុនធី ទម្ងន់ ៦៣,៥ គីឡូក្រាម ធ្លាប់ឈ្នះខ្សែក្រវាត់ ២ ស្ថាប័ន និងទទួលបានក្របខ័ណ្ឌប៉ូលិសយូរហើយ ឯកូនទី២ សូត្រ ខេវិន លំដាប់ល្អបន្ទាប់ ដោយធ្លាប់ទទួលបានត្រឹមជើងឯករងក្នុងទម្ងន់ ៦៣,៥ គីឡូក្រាម ចំណែកកូនទី៣ សូត្រ វាសនា មានទម្ងន់ ៦០ គីឡូក្រាម និងកូនទី៤ ជាកូនពៅ សូត្រ សុខឃីម មានទម្ងន់ ៥៤ គីឡូក្រាម ធ្លាប់ជាប់ជាជម្រើសជាតិថ្នាលចំនួន ២ ឆ្នាំ»។
លោក សួន ប៊ុនសូត្រ បានបញ្ជាក់ថា៖ «ការគ្រប់គ្រងហ្វឹកហាត់បានល្អ និងធ្វើឱ្យកូនៗមានសមត្ថភាពល្អបែបនេះ គឺខ្ញុំ និងប្រពន្ធ គ្រប់គ្រងផ្ទាល់ ដាក់វិន័យតឹងតែង ខណៈដែលមុខរបរនេះ គឺរួមគ្នាជួយគ្នាទាំងអស់ គ្មានមុខរបរក្រៅពីនេះឡើយ។ នៅសប្តាហ៍នេះ ពួកគេចេញប្រកួតទាំង ៤ នាក់ គឺ សូត្រ ប៊ុនធី ត្រូវប្រកួតសងសឹកជាមួយ លន បញ្ញា រីឯ សូត្រ ខេវិន ត្រូវជួប សេក គឹមរួន ខណៈ សូត្រ វាសនា ប៉ះ ពុទ្ធ ពិឃាត (ទេស ជីវ៉ា) ហើយ សូត្រ សុខឃីម ប្រកួតនឹង សេក ពិសិដ្ឋ»៕
