.jpg)
រឿង សោភ័ណ្ឌ ពេលមកដល់ព្រលានយន្តហោះអន្តរជាតិភ្នំពេញកាលពីយប់ថ្ងៃអាទិត្យ។ រូបថត យឺន ពន្លក
ភ្នំពេញៈ អ្នកលេងកណ្តាប់ដៃ រឿង សោភ័ណ្ឌ ក្លិបមកុដរាជសីហ៍នៃក្រសួងមហាផ្ទៃបានវិលពីប្រទេសបារាំងមកដល់កម្ពុជាវិញកាលពីយប់ថ្ងៃអាទិត្យ ដោយស្ពាយខ្សែក្រវាត់ ២ និងពាន ១ ព្រមទាំងបានប្រាក់ពីការប្រកួតច្រើនគួរសម បន្ទាប់ពីឈ្នះ ៣ ប្រកួតជាប់ៗគ្នា។
ទោះយ៉ាងណា រឿង សោភ័ណ្ឌ មិនសង្ឃឹមទៅលើប្រាក់ឧបត្ថម្ភចំនួន ១៥០០ ដុល្លារពីប្រធានគណបក្សយុវជនកម្ពុជាគឺ លោក ពេជ្រ ស្រស់ ដែលបានបង្ហោះតាមបណ្តាញសង្គមហ្វេសប៊ុកថានឹងផ្តល់ឲ្យរូបគេពេលត្រឡប់មកដល់កម្ពុជាវិញនោះទេ។
សោភ័ណ្ឌ បាននិយាយថា៖ «ខ្ញុំមិនរំពឹង ឬផ្តោតអារម្មណ៍ខ្លាំងទៅលើលុយរបស់ប្រធានគណបក្សដែលប្រកាសតាមហ្វេសប៊ុកនោះទេ ព្រោះមិនដឹងថាគាត់ឲ្យដោយស្មោះសម្រាប់ទ្រទ្រង់កីឡា ឬជាប់ពាក់ព័ន្ធទៅនឹងនយោបាយអ្វីមួយដែលខ្ញុំមិនទាន់បានទទួលដំណឹងផ្លូវការនៅឡើយទេ»។
«មកដល់ពេលនេះខ្ញុំមិនទាន់មានអ្នកណាហៅ ឬកំណត់ឲ្យទៅយកលុយនៅឡើយទេ បើទោះបីជា មិត្តភក្តិ ឬបណ្តាញហ្វេសប៊ុកនាំគ្នាផ្អើលថា ខ្ញុំទទួលបានលុយ ១ ៥០០ ដុល្លារភ្លាមៗ ក្រោយពេលខ្ញុំជាន់ដីស្រុកខ្មែរក៏ដោយ គឺតាមពិត ខ្ញុំមិនទាន់បានទេ»។
រឿង សោភ័ណ្ឌ បានបញ្ជាក់ពីជំហររបស់ខ្លួនថា៖ «ប្រសិនបើការផ្តល់ប្រាក់រង្វាន់ ១៥០០ ដុល្លារនោះជាការលើកទឹកចិត្តសម្រាប់ខ្ញុំ ជាកីឡាករគឺខ្ញុំសូមអរគុណ និងទទួលយកដោយរីករាយ ប៉ុន្តែក្នុងករណីគេតម្រូវឲ្យខ្ញុំយកលុយជាថ្នូរទៅនឹងការធ្វើ ឬបម្រើនយោបាយណាមួយដែលមិនបម្រើឆន្ទៈរបស់ខ្ញុំគឺខ្ញុំមិនហ៊ានទទួលទេ ព្រោះខ្លាចខុសពីច្បាប់ ដោយសារកីឡាមិនបម្រើនយោបាយទេ»។
ចំណែកលោក តែម ម៉ឺន ប្រធានសហព័ន្ធកីឡាប្រដាល់គុនខ្មែរបានថ្លែងថា៖ «បញ្ហាប្រធានគណបក្សណាមួយឧបត្ថម្ភកីឡាករណាម្នាក់ជាសិទ្ធិរបស់គេ ហើយយើងអបអរសាទរព្រោះកីឡាករយើងទទួលបាន ប៉ុន្តែការផ្តល់លុយ ដើម្បីអូសទាញកីឡាករ ទិញទឹកចិត្តបង្ខំឲ្យធ្វើតាមអ្វីមួយដែលផ្ទុយពីច្បាប់កីឡា ឬយកកីឡា ដើម្បីជាឈ្នាន់នយោបាយឃោសនា បោកប្រាស់ គឺមិនគាំទ្រទេ ហើយកីឡាករមិនគួរនឹងទទួលយកដែរ»។
លោកបន្ថែមថា៖ «ជាង ២០ ឆ្នាំមកហើយដែលវិស័យកីឡាប្រដាល់គុនខ្មែរ មានការគាំទ្រពីវិស័យឯកជន ធ្វើឲ្យមានភាពរីកចម្រើន មានទីផ្សារប្រកួតបានប្រាក់តម្លៃខ្លួនសមរម្យ ដោយមិនទាន់ដែលឃើញគណបក្សណាជួយកីឡាករទេ ប៉ុន្តែពេលជិតបោះឆ្នោតតំណាងរាស្ត្រឆ្នាំ ២០១៨ នេះស្រាប់តែលេចដំណឹងព្រោងព្រាតតាមហ្វេសប៊ុកឧបត្ថម្ភដល់កីឡាករមួយចំនួនគួរឲ្យចាប់អារម្មណ៍ តែក្នុងគោលបំណងអ្វីឲ្យពិតប្រាកដនោះ យើងមិនទាន់ដឹងទេ។ បើឧបត្ថម្ភក្នុងនាមលើកស្ទួយវិស័យកីឡាគឺល្អ ប៉ុន្តែបើរឿងផ្សេងទៅជានយោបាយ ខ្ញុំមិនគាំទ្រទេ»។
ជាមួយគ្នានេះលោក វ៉ាត់ ចំរើន អគ្គលេខាធិការ NOCC បានថ្លែងដែរថា៖ «ការឧបត្ថម្ភគាំទ្រកីឡាគឺយើងគាំទ្រ ប៉ុន្តែបើយកប្រិយភាពរបស់កីឡាករណាម្នាក់ ទៅឃោសនាផ្សព្វផ្សាយ បញ្ហាគណបក្សគឺមិនស្របច្បាប់ទេ។ ហេតុនេះខ្ញុំមានសង្ឃឹម និងជឿជាក់ថាអ្នកឧបត្ថម្ភប្រាក់ទៅកីឡាករ គេមិនប្រើប្រាស់វេទិកាកីឡានេះ បម្រើនយោបាយនោះឡើយ»។
គួររំឭកថាសម្រាប់ការចេញទៅប្រកួតនៅបារាំងជិត ៣ ខែនេះ រឿង សោភ័ណ្ឌ បានប្រកួត ៣ លើកដោយឈ្នះទាំងអស់ ហើយទទួលបានខ្សែក្រវាត់ ២ និងពាន ១ ព្រមទាំងទទួលបានប្រាក់ជាង ៣០០០ ដុល្លារ។ ការឈ្នះខ្សែក្រវាត់ ២ បន្ថែមទៀតនេះធ្វើឲ្យ រឿង សោភ័ណ្ឌ មានខ្សែក្រវាត់សរុបចំនួន ៨ និងពាន ៣ ក្នុងអាជីពជាអ្នកប្រដាល់របស់គេជាង ១០ ឆ្នាំនេះ៕
