.jpg)
អ្នកប្រដាល់ រឿង សោភ័ណ្ឌ បានអះអាងថា រូបគេនឹងមិនបន្ធូរដៃឲ្យ ឡុង សុវណ្ណឌឿន ឡើយ។ ភ្នំពេញប៉ុស្តិ៍
ភ្នំពេញ៖ កីឡាករជាពិធីករប្រដាល់ ឡុង សុវណ្ណឌឿន នឹងត្រូវប្រឈមជាមួយអ្នកលេងកណ្តាប់ដៃឆ្វេង រឿង សោភ័ណ្ឌ នៅក្នុងការប្រកួតដណ្តើមប្រាក់លាន ប្រភេទទម្ងន់ ៧១ គីឡូក្រាម នៅលើសង្វៀន CNC នាព្រឹកថ្ងៃសៅរ៍ ប៉ុន្តែអ្នកទស្សនាភាគច្រើន ហ៊ានទស្សន៍ទាយមុនថា ឡុងសុវណ្ណឌឿន ទំនងត្រឹមឡើងកំដរប៉ុណ្ណោះ ព្រោះមិនដឹងថា មានក្បាច់អីទៅប្រកួតឈ្នះ រឿង សោភ័ណ្ឌ នោះទេ។
តាមប្រវត្តិប្រកួតកន្លងមក ឡុង សុវណ្ណឌឿន ធ្លាប់ចាញ់ រឿង សោភ័ណ្ឌ នៅសង្វៀន CNC នេះ ក្នុងការប្រកួតដណ្តើមខ្សែក្រវាត់វគ្គពាក់កណ្តាលផ្តាច់ព័ត្រយ៉ាងគ្រាំគ្រា ដោយបានប្តូរកណ្តាប់ដៃគ្នាបានយ៉ាងល្អ ហើយបន្ទាប់មកពួកគេបានរាប់អានគ្នាជាបងប្អូនធម៌ នៅក្រៅសង្វៀន។ ហេតុនេះ ការវិលមកជួបគ្នារបស់អ្នកទាំង ២ ត្រូវបានគេដាក់ការសង្ស័យថា អាចវ៉ៃគ្នាមិនអស់ពីសមត្ថភាព ឬអាចបន្ធូរដៃឲ្យគ្នា។
ទោះបីជាយ៉ាងណា រឿង សោភ័ណ្ឌ បានអះអាងថា៖ «ការប្រកួតនេះ ខ្ញុំមិនបន្ធូរដៃទេ គឺវ៉ៃអស់ពីសមត្ថភាព ព្រោះគេឲ្យយើងឡើងវ៉ៃគ្នា បានលុយ មិនមែនឡើងរាំទេ ហើយខ្ញុំសង្ឃឹមឈ្នះ ៩០ ភាគរយ ប៉ុន្តែលំបាកចូលវ៉ៃដែរ ព្រោះ ឡុង សវណ្ណឌឿន ខ្ពស់ជាង និងមានក្បាច់ជង្គង់ល្អ ជាអំណោយផល»។
សិស្សគណក្លិបមកុដរាជសីហ៍រូបនេះ បានបន្ថែមថា៖ «ខ្ញុំក៏មិនសូវបានហាត់ខ្លាំងនោះដែរ ព្រោះគ្មានដៃគូហ្វឹកហាត់សមកម្លាំង គឺហាត់បានបន្តិចបន្តួចប៉ុណ្ណោះ។ ខ្ញុំរាប់អានគាត់ជាបងប្អូនធម៌ ប៉ុន្តែអាជីពលើសង្វៀន មិនអាចបន្ធូរបន្ថយកណ្តាប់ដៃទេ ព្រោះជាមុខរបរយើងទៅហើយ»។
បន្ថែមលើនេះ លោក គង់ ចាន់ធីណា គ្រូបង្វឹក រឿង សោភ័ណ្ឌ បាននិយាយថា៖ «សោភ័ណ្ឌ វ៉ៃមិនដែលចេះបន្ធូរដៃឲ្យគេទេ បើវាផ្តាច់បាន មិនចំណាយពេលយូរឡើយ។ សោភ័ណ្ឌ ហាត់បានតិចតួច ដោយគ្មានគូឡាំជាមួយ ព្រោះខ្លាចឆ្លងវីរុសគ្នា។ ខ្ញុំគិតថា បើវ៉ៃគ្នាអស់ពីលទ្ធភាព រឿង សោភ័ណ្ឌ មិនមែនស៊ីផុយទេ ព្រោះ ឡុង សុវណ្ណឌឿន ល្អក្បាច់ជង្គង់ និងមានកម្ពស់ខ្ពស់ល្អសម្រាប់ធាក់ទប់ និងឱបឡើងជង្គង់»។
ចំណែកលោក ឡុង សាលវ័ន្ត គ្រូបង្វឹក សុវណ្ណឌឿន បានទទួលស្គាល់ថា៖ «កណ្តាប់ដៃរបស់ រឿង សោភ័ណ្ឌ ធ្ងន់ៗ ហើយ សុវណ្ណឌឿន ទំនងគ្មានឱកាសឈ្នះនោះទេ។ ទោះយ៉ាងណា សុវណ្ណឌឿន ឡើងប្រកួតមិនដែលលាក់ពុតទេ គឺវ៉ៃអស់ពីសមត្ថភាព និងមានកម្ពស់ល្អ អាចមានលទ្ធភាពវ៉ៃជង្គង់បានប្រសើរជាង»។
លោក សាលវ័ន្ត បានបន្ថែមថា៖ «ពេលជាប់ឱបឡើងជង្គង់ ឡុង សុវណ្ណឌឿន មានប្រៀបជាង ប៉ុន្តែខ្លាចចាប់ សោភ័ណ្ឌ ឱបឡើងជង្គង់មិនបាន គឺចាញ់ក្រោមកណ្តាប់ដៃហើយ។ គ្រូបង្វឹកជម្រើសជាតិ ឡុង សាលវ័ន្ត បានបង្ហើបថា៖ «ឡុង សុវណ្ណឌឿន មិនសូវបានហ្វឹកហាត់ទេ ព្រោះជាប់រវល់ការងារច្រើន ហើយខ្ញុំរំពឹងឈ្នះតិចណាស់»។
ដោយឡែកជើងខ្លាំងវ័យក្មេង ឡៅ ចិត្ត្រា ដែលត្រូវដាក់ឲ្យប្រកួតដណ្តើមប្រាក់លានជាមួយ មឿន សុខហ៊ុច នៅថ្ងៃសៅរ៍នោះដែរ ត្រូវបានលុបចោលវិញហើយ ព្រោះអតីតអ្នកប្រដាល់ជើងខ្លាំង ឡៅ ស៊ីណាត ដែលជាបងប្រុសបានប្រាប់កាលពីម្សិលមិញថា៖ «ចិត្ត្រា មិនបានប្រកួតទេ ព្រោះគេជាប់បំពេញភារកិច្ចក្នុងនាមជាទាហានម្នាក់ ដែលគ្មានពេលហ្វឹកហាត់ ហេតុនេះយើងមិនអាចដាក់ឲ្យគេប្រកួតបានឡើយ»៕
