.jpg)
ភួង ពិសិដ្ឋ និង តក់ សោភ័ណ្ឌ (រូបទី១ និងទី២ ខាងឆ្វេង) ត្រូវប៉ះ ទូច ដេវីត និង លួន សុខខេង។
ភ្នំពេញ៖ កីឡាករ តក់ សោភ័ណ្ឌ បានវិលមកកាន់សង្វៀនជាថ្មីនៅរសៀលថ្ងៃសៅរ៍ បន្ទាប់ពីរូបគេបានជួបបរាជ័យក្នុងការងាកទៅចាប់របរលក់ត្រី នៅស្រុកកំណើត ខេត្តព្រៃវែងនោះ ហើយការវិលមកប្រកួតនៅលើសង្វៀន SEATV លើកនេះ រូបគេត្រូវប៉ះកីឡាករជើងចាស់ លួន សុខខេង ក្នុងទម្ងន់ ៧១ គីឡូក្រាម។
តក់ សោភ័ណ្ឌ បានប្រាប់កាលពីថ្ងៃពុធថា៖ «ការឃ្លាតពីសង្វៀនប្រដាល់ជាង ២ ឆ្នាំនេះ ខ្ញុំទៅលក់ត្រី នៅឯស្រុកកំណើត ក្នុងភូមិចាក់ខ្លាញ់ ឃុំពាមរក៍ ស្រុកពាមរក៍ ខេត្តព្រៃវែង ប៉ុន្តែក្នុងរដូវការរាលដាលនៃជំងឺកូវីដ ១៩ នេះ បានធ្វើឲ្យមុខរបរលក់ត្រីនេះបាត់បង់ ហើយដោយសារមានជីវភាពលំបាកពេក ទើបខ្ញុំសុំគ្រូមកប្រកួតវិញ ដើម្បីបានលុយខ្លះសម្រាប់ជីវភាព»។
កីឡាកររូបនេះ បន្តថា៖ «ខ្ញុំទើបតែមកដល់ភ្នំពេញ និងហ្វឹកហាត់បានត្រឹមមួយព្រឹកប៉ុណ្ណោះ ហើយខ្ញុំក៏មិនធ្លាប់ជួប លួន សុខខេង នោះដែរ។ ហេតុនេះ ខ្ញុំមិនអាចនិយាយពីលទ្ធផលទុកមុនបានទេ ព្រោះខកខានប្រកួតចំនួន ២ ឆ្នាំមកហើយ ប៉ុន្តែខ្ញុំនឹងប្រឹងអស់ពីលទ្ធភាពដើម្បីទទួលបានការប្រកួតលើកក្រោយ ដោយសារខ្ញុំគ្មានមុខរបរអ្វីទេ អ៊ីចឹងហើយខ្ញុំតាំងចិត្តយកឈ្នះឲ្យបាន គឺសង្ឃឹម ៨០ ភាគរយ»។
ចំពោះសមត្ថភាពប្រកួតរបស់ លួន សុខខេង ក៏មិនជាអស្ចារ្យនោះដែរ ហើយមិនធ្លាប់ឈ្នះបានខ្សែក្រវាត់ដូច តក់ សោភ័ណ្ឌ នោះទេ។ បន្ថែមលើនេះ ក្រោយក្លិបចាស់អាស៊ីកីឡា បានបិទកម្រិតវិជ្ជាគុនរបស់ សុខខេង បានធ្លាក់ចុះ ហើយបានមកនៅក្លិបពុទ្ធសេរីវង្សកីឡា។
លោក ណន រិទ្ធ ដែលជាគ្រូបង្វឹកបាននិយាយថា៖ «លួន សុខខេង ជើងចាស់ មិនសូវខ្លាំង និងលេចធ្លោប៉ុន្មានទេ ប៉ុន្តែសមត្ថភាពប្រហែល តក់ សោភ័ណ្ឌ គឺមានលទ្ធភាពតិចតួចណាស់ ដែលអាចឈ្នះ សុខខេង បាន។ លួន សុខខេង មានប្រៀបឈ្នះ ៩០ ភាគរយ លើ តក់សោភ័ណ្ឌ»។
ចំណែកលោក ញាន សុធី អ្នកគ្រប់គ្រងកម្មវិធីប្រដាល់នៅ SEATV បាននិយាយថា៖ «ខ្ញុំនៅតែផ្តល់ឱកាសឲ្យកីឡាករជើងចាស់បានប្រកួត ដើម្បីជួយគ្នាឲ្យមានជីវភាពល្អ ព្រោះពួកគាត់ បើគ្មានការប្រកួតប្រដាល់ទេ គេជួបបញ្ហាលំបាកខ្លាំងណាស់»។
ដោយឡែក កីឡាករ ភួង ពិសិដ្ឋ ត្រូវប្រកួតជាមួយអ្នកប្រដាល់ជំនាញកណ្តាប់ដៃ ទូច ដេវីត ខណៈពួកគេសុទ្ធតែជើងខ្លាំងជំនាន់ក្រោយ។ លោក អាត សំរិទ្ធ គ្រូបង្វឹក ទូច ដាវីត បាននិយាយថា៖ «ទូច ដាវីត មានប្រៀបឈ្នះ ៩០ ភាគរយ គឺមានចំណុចខ្សោយបន្តិចទេ ដែលអាចចាញ់ប្រៀប ភួង ពិសិដ្ឋ ផ្នែកក្បាច់ជង្គង់ ពេលឱបគ្នា។ ទោះជាយ៉ាងណា កូនសិស្សខ្ញុំ គឺសង្ឃឹមឈ្នះតែម្តង លើកលែងតែករណីលេងក្បាច់ជង្គង់ប៉ុណ្ណោះ ជាឧបសគ្គដែលគេចមិនផុត»៕
