.jpg)
ផល សោភ័ណ្ឌ ត្រូវជួបអ្នកចំណូលថ្មីរបស់ថៃ Vakai Thap ថ្ងៃសៅរ៍។ រូប សហការី
ភ្នំពេញ៖ ជើងខ្លាំង ផល សោភ័ណ្ឌ ត្រូវបានដាក់ឲ្យជួបជាមួយកីឡាករថៃចំណូលថ្មី Vakai Thap ក្នុងទម្ងន់ ៦៣,៥ គីឡូក្រាម ជាគូឯកអមការប្រកួតជម្រុះដណ្តើមពាន TV5 Boxing Knock Out Serie នៅថ្ងៃសៅរ៍នេះ ក្នុងវគ្គ ១៦ នាក់ចុងក្រោយ ដើម្បីរកអ្នកឈ្នះឡើងទៅប្រកួតបន្តនៅវគ្គ ៨ នាក់ ឬវគ្គទី ៣។
បើទោះបីជា Vakai Thap ជាអ្នកប្រដាល់ចំណូលថ្មីមកពីថៃ ហើយ ផល សោភ័ណ្ឌ ជាជើងខ្លាំងមួយរបស់កម្ពុជា ប៉ុន្តែបើតាមគណៈកម្មការផ្គូផ្គងប្រចាំសង្វៀនប៉ុស្តិ៍លេខ ៥ បានអះអាងថា បើថៃខ្សោយ គេមិនដាក់ឲ្យប៉ះ ផល សោភ័ណ្ឌ នោះឡើយ។
លោក ម៉ាក់ សាខន គ្រូបង្វឹក ផល សោភ័ណ្ឌ បានប្រាប់ថា៖ «សោភ័ណ្ឌ ហ្វឹកហាត់ត្រៀមប្រកួតល្អ ប៉ុន្តែមិនទាន់ដឹងថាកីឡាករថៃជាដៃគូនោះ មានសមត្ថភាពប៉ុនណានោះឡើយ។ យ៉ាងណា សោភ័ណ្ឌ វ៉ៃឆ្លាត និងចង់ឈ្នះ ដើម្បីរក្សាភាពល្បីល្បាញ ដោយមិនដែលធ្វេសប្រហែសក្នុងការហ្វឹកហាត់ និងឡើងប្រកួតនោះឡើយ»។
លោកបន្ថែមថា៖ «ខ្ញុំមានទំនុកចិត្តឈ្នះ ៩០ ភាគរយ ប៉ុន្តែបើថៃម្នាក់នេះ មានសមត្ថភាពខ្លាំង ឬល្អជាង សោភ័ណ្ឌ គឺខ្ញុំមិនទាន់ជឿទេ ព្រោះលំដាប់លេខ ១ របស់ថៃ មិនមកប្រកួតស្រុកខ្មែរទេ ដោយសារតម្លៃខ្លួនស្រុកគេ ច្រើនជាងយើងណាស់»។
ដោយឡែក សម្រាប់ប្រកួតគូដណ្តើមពានថ្ងៃដំបូងនៃវគ្គជម្រុះជុំទី ២ នេះ អ្នកប្រដាល់ជើងថ្មី អៀប លីឆា ត្រូវតស៊ូទល់ជាមួយអ្នកប្រដាល់ជើងថ្មីដូចគ្នា ខាំ សាបាន ចំណែក រិន សារ័ត្ន ប្រកួតជាមួយ អ៊ុង កំសត់ ដើម្បីប្រជែងគ្នាឡើងទៅវគ្គបន្ត ខណៈការប្រកួតជម្រុះនៅជុំទី ១ អៀប លីឆា ឈ្នះ ចិត្រ សុភី (ជម្រើសជាតិថ្នាល) ដោយពិន្ទុ ឯ ខាំ សាបាន បានឈ្នះអ្នកប្រដាល់ ពុទ្ធ អ៊ុំអូន ដោយពិន្ទុដែរ។
អ្នកប្រដាល់ទាំង ២ រូបនេះ សុទ្ធតែជើងថ្មី ប៉ុន្តែប្រជែងយកឈ្នះជើងចាស់មួយចំនួនមកហើយ។ គូដណ្តើមពានវគ្គទី ២ រវាងជើងថ្មីដូចគ្នានេះ អៀប លីឆា និង ខាំ សាបាន គឺគ្រូបង្វឹក សុទ្ធតែអះអាងថា មានសមត្ថភាពប៉ុនគ្នា ហើយការចាញ់ និងឈ្នះ គឺតឹងតែងណាស់។
លោក បឺត សំខាន់ គ្រូបង្វឹក ខាំ សាបាន និយាយថា៖ «យើងសង្ឃឹមឈ្នះ ៥០ ភាគរយ ព្រោះអ្នកទាំង ២ មានបទពិសោធខ្ចីវស្សាដូចគ្នា តែធ្លាប់ឈ្នះជើងចាស់ដូចគ្នា»។ ចំណែកលោកគ្រូ ប្រាក់ យ៉ា គ្រូបង្វឹក អៀប លីឆា និយាយថា៖ «ខ្ញុំមានទំនុកចិត្តឈ្នះ ៨០ ភាគរយ លើកូនសិស្សខ្ញុំ»។
ចំណែក រិន សារ័ត្ន កាលពីជំនួបជុំទី ១ បានឈ្នះ សល់ ពិសិដ្ឋ (ខុម ពិសិដ្ឋ) ដោយស្វ័យប្រវត្តិ ដោយសារ ពិសិដ្ឋ រក្សាទម្ងន់មិនបាន រីឯ អ៊ុង កំសត់ វិញបានប្រកួតឈ្នះ នូវ ដារ៉ូ។ រវាងអ្នកទាំង ២ នេះ សារ័ត្ន ដែលធ្លាប់ឆ្លងកាត់ការប្រកួតជាមួយអ្នកប្រដាល់បរទេស និងធ្លាប់ចូលរួមប្រកួតដណ្ដើមខ្សែក្រវាត់ជាច្រើនព្រឹត្តិការណ៍នោះ គេមានភាគរយខ្ពស់ជាងក្នុងការទទួលបានជ័យជម្នះឡើងវគ្គបន្ត៕
