.jpg)
កីឡាករតក់ សោភ័ណ្ឌ (ឆ្វេង) ប្រកួតក្នុងខ្សែក្រវាត់ស្រាបៀរ Black Panther កន្លងមក។ យឺន ពន្លក
ភ្នំពេញ: តក់ សោភ័ណ្ឌ អ្នកប្រដាល់មុខស្រស់ និងរាងសង្ហា ប៉ុន្តែល្បីល្បាញរឿងអាស្រូវខាងគោរពវិន័យមិនបានល្អនោះ បានសុំវិលមកអាជីពប្រដាល់គុនខ្មែរវិញ ក្រោយពីរត់ចោលសង្វៀនរយៈពេល ៣ ឆ្នាំទៅធ្វើកម្មករផ្សារដែកជួបការលំបាកខ្លាំង និងឧបសគ្គច្រើននោះ។
ការវិលមកចាប់មុខរបរប្រដាល់ចាស់វិញលើកនេះ មិនមែនជារឿងថ្មីទេ ពីព្រោះតក់ សោភ័ណ្ឌ ធ្លាប់រត់ចេញ និងវិលមកវិញច្រើនលើកច្រើនសាមកហើយ ប៉ុន្ដែកាលពីម្សិលមិញ កីឡាករ រូបនេះអះអាងថា ការវិលមកលើកនេះលែងប្រែប្រួលទៀតហើយ ដោយរូបគេចង់ក្លាយជាកីឡាករល្បី និងរកប្រាក់តាមរយៈការប្រកួតប្រដាល់លក្ខណៈអន្តរជាតិ ដើម្បីកសាងជីវិតឡើងវិញក្នុងសង្គមកីឡានេះ។
តក់ សោភ័ណ្ឌ ជាអ្នកប្រដាល់ឆ្នើមមួយរូបមានកម្ពស់ ១,៦៨ ម៉ែត្រ មានស្រុកកំណើត នៅភូមិចាក់ខ្លាញ់ ឃុំពាមរក៍ ស្រុកពាមរក៍ ខេត្តព្រៃវែង មានបងប្អូនចំនួន ១២ នាក់ ហើយរូបគេជាកូនពៅ និងជាកីឡាករប្រដាល់តែម្នាក់ឯង។
រូបគេមានប្រវត្តិប្រកួតបានចំនួន ៩៨ លើក ឈ្នះ ៨៦ លើក ចាញ់ ១២ លើក និងធ្លាប់ឈ្នះត្រឹមជើងឯករង ខ្សែក្រវាត់ Black Panther ទម្ងន់ ៦៣,៥ ក្រោយពីចាញ់កីឡាករឈិន ក្វាន់ង៉ុយ កាលពីឆ្នាំ ២០១៣។
ជាមួយគ្នានោះ តក់ សោភ័ណ្ឌ ធ្លាប់ប្រកួតលក្ខណៈអន្តរជាតិចំនួន ១០ លើក ឈ្នះ ៦ លើក ចាញ់ ៤ លើក និងធ្លាប់ឆ្លងកាត់ការហ្វឹកហាត់ និងប្រកួតក្បាច់គុនចម្រុះ (MMA) ក្នុងប្រទេស និងក្រៅប្រទេស ដោយធ្លាប់ឈ្នះកីឡាករសុខ ចិន្តា កីឡាករសុខ ចាន់ និងសូយ ភារម្យ ជាដើម មិនតែប៉ុណ្ណោះរូបគេធ្លាប់ចេញទៅប្រកួត MMA ចាញ់ម្ចាស់ផ្ទះនៅប្រទេសម៉ាឡេស៊ីផងដែរ។
ការចាប់អាជីពប្រដាល់លើកដំបូងរបស់តក់ សោភ័ណ្ឌ បានកើតឡើងនៅក្លិបអេភូថងជាមួយគ្រូបង្វឹកអេ ភូថង បន្ទាប់មកបានផ្លាស់ទៅនៅក្លិបមកុដរាជសីហ៍នៃសមាគមប្រដាល់ក្រសួងមហាផ្ទៃ ក្នុងឆ្នាំ ២០១៤ ក្រោមការគ្រប់គ្រងរបស់លោកគង់ ចាន់ធីណា ជាប្រធានក្លិប។
ប៉ុន្តែការហ្វឹកហាត់ និងឡើងប្រកួតមិនទៀងទាត់ និងមិនសូវបានល្អដែលនាំប្រធានក្លិបអះអាងថា កីឡាកររូបនេះខ្សោយវិន័យ និងភាគច្រើនដើរលេងសេរីអត់ច្បាប់។
តក់ សោភ័ណ្ឌ បានផ្តល់សម្ភាសឲ្យភ្នំពេញ ប៉ុស្តិ៍ កាលពីថ្ងៃពុធថា៖ «ខ្ញុំចង់វិលមកកាន់អាជីពប្រដាល់វិញហើយប្តេជ្ញាគោរពវិន័យនិងកែខ្លួនឲ្យបានល្អហ្វឹកហាត់ដើម្បីឡើងប្រកួតឲ្យបានល្អ និងឈានទៅប្រកួតលក្ខណៈអន្តរជាតិ ដើម្បីរកប្រាក់តាមរយៈកីឡាប្រដាល់វិញ»។
កីឡាកររូបនេះបានបន្តថា៖ «ជីវភាពជាកម្មករសំណង់ ផ្សារដែកលំបាករកលុយណាស់ ការងារលំបាក ប្រាក់ចំណូលតិចបានតែ ៥ ដុល្លារក្នុង ១ ថ្ងៃ ខ្ញុំមិនអាចរ៉ាប់រងជីវភាពបានឡើយ»។
តក់ សោភ័ណ្ឌ បានបញ្ជាក់ថា៖ «ខ្ញុំឃ្លាតពីសង្វៀនប្រដាល់ក្រោយប្រកួតចាញ់កីឡាកររឿង សារ័ត្ន ដោយរងរបួសសន្លាក់ជើងស្តាំកាលពី ៣ ឆ្នាំមុននៅសង្វៀនអាស៊ីអាគ្នេយ៍។ ទោះជាទៅធ្វើការងារអ្វីក៏ខ្ញុំនៅតែមានចិត្តចង់ឡើងប្រដាល់ជានិច្ច ពិសេសដេកស្រមៃចង់ប្រកួតសងសឹកជាមួយរឿង សារ័ត្ន ឡើងវិញដើម្បីស្តារមុខមាត់ក្នុងពិភពប្រដាល់»។
លោកគង់ ចាន់ធីណា ប្រធានគ្រប់គ្រងក្លិប បាននិយាយថា៖ «ការវិលមកកាន់សង្វៀនប្រដាល់វិញរបស់តក់ សោភ័ណ្ឌ ខ្ញុំទទួលយកដោយមិនរើសអើងទេឲ្យតែចេះកែខ្លួន និងអភិវឌ្ឍខ្លួនឲ្យបានជាកីឡាករល្អ ពីព្រោះប្រាក់ចំណូលបានមកពីប្រកួតក៏ច្រើនសមរម្យដែរ។ ប៉ុន្តែ ត្រូវគោរពវិន័យឲ្យបានល្អ បើមិនអ៊ីចឹងទេ នឹងរងពិន័យទៅតាមច្បាប់របស់ក្លិប»៕
