.jpg)
សោម វិឆ័យ (ឆ្វេង) បានព្យាយាមបិទ ការម៉ាត់របស់ ពុយ វណ្ណៈ ក្នុងការប្រកួតវគ្គ ១/២ ផ្តាច់ព្រ័ត្រ។ រូប ពន្លក
ភ្នំពេញ៖ កីឡាករ សោម វិឆ័យ និង រិន សារ័ត្ន បានក្លាយជាបេក្ខភាព ដែលត្រូវឡើងទៅជួបគ្នានៅវគ្គផ្តាច់ព្រ័ត្រ នៃការប្រកួតពានរង្វាន់ TV5 Boxing Knock Out Series ក្នុងទម្ងន់ ៦៣,៥ គីឡូក្រាម បន្ទាប់ពីអ្នកទាំង ២ បានរកឃើញជ័យជម្នះដោយលំបាក និងតានតឹងក្នុងការប្រកួតវគ្គពាក់កណ្តាលផ្តាច់ព្រ័ត្រកាលពីថ្ងៃសៅរ៍។
តាមរយៈការប្រកួត ដែលមានត្រឹម ៣ ទឹកនោះ សោម វិឆ័យ មកពីក្លិបវិបុលខណ្ឌពោធិ៍សែនជ័យបានយកឈ្នះកីឡាករ ពុយ វណ្ណៈ ហើយ រិន សារ័ត្ន បានទម្លាក់អ្នកប្រដាល់ វ៉ែន ហុងជីវ៉ុង ដើម្បីឡើងទៅជួបគ្នាវគ្គផ្តាច់ព្រ័ត្រ ដែលគ្រោងធ្វើនៅថ្ងៃទី ២៣ ខែ ឧសភា ឆ្នាំ ២០២០ ចំណែក វ៉ែន ហុងជីវ៉ុង និង ពុយ វណ្ណៈ ក៏ត្រូវប្រកួតគ្នា ដណ្តើមយកលេខ ៣ និងលេខ ៤ នៅថ្ងៃនោះផងដែរ។
នៅក្រោយប្រកាសលទ្ធផលដោយសុក្រឹត យុត្តិធម៌ ព្រោះគ្មានភាគីចាញ់ណាតវ៉ា គឺចេញពីសមត្ថភាពរបស់កីឡាករពិតៗនោះ សោម វិឆ័យ បានអះអាងថា រូបគេនឹងបន្តយកឈ្នះ រិន សារ័ត្ន នៅវគ្គផ្តាច់ព្រ័ត្រ ដើម្បីក្លាយជាម្ចាស់ប្រាក់រង្វាន់ចំនួន ៤ ០០០ ដុល្លារ សម្រាប់ការប្រកួតលើកនេះ។
សោម វិឆ័យ បាននិយាយថា៖ «ពុយ វណ្ណៈ គាត់ល្អ និងរឹងមាំ ហើយធ្លាប់ជាម្ចាស់ពានរង្វាន់នេះកាលពីវគ្គមុន ប៉ុន្តែការប្រកួតរបស់ខ្ញុំ គឺប្រយ័ត្នប្រយែងបំផុត និងខំប្រឹងខ្លាំង ទើបទទួលបានលទ្ធផលល្អបែបនេះ។ ជាមួយជ័យជម្នះនេះ ខ្ញុំគិតថា ប្រាក់រង្វាន់ចំនួន ៤ ០០០ ដុល្លារ នឹងបានមករូបខ្ញុំ ព្រោះ រិន សារ័ត្ន មិនមែនជាឧបសគ្គធំសម្រាប់ខ្ញុំក្នុងវគ្គផ្តាច់ព្រ័ត្រនោះទេ»។
កីឡាកររូបនេះបានបន្ថែមថា៖ «បើ វ៉ែន ហុងជីវ៉ុង បានឡើងមកវិញ ខ្ញុំកាន់តែអស់ក្តីបារម្ភ គឺសង្ឃឹមឈ្នះដោយស៊ីផុយតែម្តង ព្រោះធ្លាប់ឈ្នះគាត់ ព្រមទាំងដឹងពីចំណុចខ្សោយរបស់គាត់។ យ៉ាងណាក៏ដោយ ខ្ញុំក៏មិនអាចធ្វេសប្រហែស ក្នុងការបន្តខិតខំហ្វឹកហាត់ដែរ ព្រោះមកដល់ចំណុចនេះ កិត្តិយសធំ និងលុយច្រើនថែមទៀត ហើយក្រោយពេលខ្ញុំឈ្នះពាននេះ វានឹងធ្វើឲ្យតម្លៃខ្លួនប្រកួតរបស់ខ្ញុំបានខ្ពស់»។
ចំណែក លោក ឡុង វិបុល គ្រូបង្វឹករបស់ សោម វិឆ័យ បានប្រាប់ថា៖ «សោម វិឆ័យ មានភាគរយខ្ពស់ក្នុងការដណ្តើមយកពាន និងប្រាក់រង្វាន់អមចំនួន ៤ ០០០ ដុល្លារ ប៉ុន្តែខ្ញុំមិននិយាយពីលទ្ធផលមុនប្រកួតទេ កុំឲ្យគេថា យើងអួត។ ទោះបីជាយ៉ាងណា ការខិតខំហ្វឹកហាត់ឲ្យល្អ ថែទាំសុខភាពល្អ ប្រកួតល្អ គឺពាននេះ នឹងបានមក សោម វិឆ័យ ក្នុងក្តីសង្ឃឹមខ្ពស់ ព្រោះតាមខ្ញុំព្យាករឧបសគ្គក្នុងការដណ្តើមពាននេះមិនធំទេ»។
ជាមួយគ្នានេះ រិន សារ័ត្ន បាននិយាយថា៖ «ខ្ញុំសប្បាយចិត្ត ដែលបានឡើងប្រកួតវគ្គផ្តាច់ព្រ័ត្រជាមួយ សោម វិឆ័យ ប៉ុន្តែអ្វីដែលខ្ញុំគិត គឺប្រឹងហាត់ឲ្យបានខ្លាំង ព្រោះការប្រកួត ដែលនឹងបានលទ្ធផលល្អ វាអាស្រ័យលើកម្លាំង និងបច្ចេកទេសបានមកពីហាត់»។
សម្រាប់ការប្រកួតដណ្តើមយកចំណាត់ថ្នាក់លេខ ៣ រវាង វ៉ែន ហុងជីវ៉ុង និង ពុយ វណ្ណៈ ដែលគ្រោងធ្វើនៅថ្ងៃទី ២៣ ខែឧសភា ខាងមុខនោះដែរ គេមានជំនឿថា ពុយ វណ្ណៈ អាចមានប្រៀបជាង ខណៈដែលមួយរយៈនេះ កីឡាករ វ៉ែន ហុងជីវ៉ុង ប្រកួតទំនងធ្លាក់ចុះ និងបានចាញ់ ៣ ប្រកួតជាប់ៗគ្នា ក្នុងរយៈពេលចុងក្រោយនេះ។ រវាងកីឡាករ ពុយ វណ្ណៈ និង វ៉ែន ហុងជីវ៉ុង មិនអាចសុំសម្ភាសបានទេ ព្រោះក្រោយពេលប្រកួតចាញ់ គឺពួកគេបានចេញពីសង្វៀនប្រដាល់យ៉ាងលឿន៕
