.jpg)
ហេង សំរាំង បានប្តូរការម៉ាត់ជាមួយការទាត់របស់កីឡាករថៃ។ រូប ពន្លក
ភ្នំពេញៈ កីឡាករកម្ពុជា ទេស សំខាន់ របស់ក្លិបកងពលលេខ ៧០ បានធ្លាក់ចេញពីកម្មវិធី Boostrong Gold Medal Figter onfire បន្ទាប់ពីរូបគេបានចាញ់កីឡាករអ៊ីរ៉ង់ Gafari យ៉ាងគ្រាំគ្រាខ្លួនក្នុងការប្រកួតជម្រុះលើកដំបូងនៅសង្វៀន SEATV កាលពីថ្ងៃអាទិត្យ។ ចំណែក ហេង សំរាំង ត្រូវបានកីឡាករថៃ Chhouk Namchhai វ៉ៃល្មើសបន្ថែមឲ្យអាជ្ញាកណ្តាលរាប់ដោយមិនបន្តការប្រកួតទៀតបាន ប៉ុន្តែស្នងការប្រកួតបានប្រកាសផ្តល់ជ័យជម្នះឲ្យកីឡាករថៃឈ្នះដោយចោទប្រកាន់ ហេង សំរាំង ថាបានធ្វើពុតចង់ស៊ីឡាក។
នៅក្នុងជំនួបប្រកួតចំនួន ៥ ទឹកពេញ ទេស សំខាន់ បានរងនូវការវាយលុកដោយកណ្តាប់ដៃ ទាត់ និងជង្គង់របស់ Gafari តាំងពីទឹកទី ១។ ទេស សំខាន់ គ្មានក្បាច់អ្វីអាចទប់ទល់ជាមួយគេក្នុងលក្ខណៈប្រហាក់ប្រហែលសងទៅសងមកនោះឡើយ ពិសេសនៅក្នុងទឹកទី ២ Gafari មានម៉ាត់ចូលផ្ទួនៗបង្ខំឲ្យ ទេស សំខាន់ ដួលដេកលើសង្វៀន និងត្រូវអាជ្ញាកណ្តាល ឡុង វិបុល រាប់ភ្លាមៗ តែស្នូរជួងទឹកទី ២ បានបញ្ចប់ ទំនងដូចជួយសង្គ្រោះឲ្យផុតពីការបញ្ឈប់ និងបានឆ្លងទៅប្រកួតនៅទឹកបន្ត។
ទោះបីជាយ៉ាងណា ទេស សំខាន់ ប្រឹងប្រមូលអារម្មណ៍ទប់ទល់ប្រកួតរហូតចប់ទឹកទី ៥ និងទទួលលទ្ធផលចាញ់ត្រឹមពិន្ទុយ៉ាងគ្រាំគ្រា និងអស់ចិត្ត។ អ្នកទស្សនាភាគច្រើនបានលាន់មាត់ថា សមត្ថភាពរបស់ ទេស សំខាន់ គ្មានចំណុចណាយកឈ្នះបានទេ ប៉ុន្តែបើប្តូរយុទ្ធសាស្ត្រចូលឱបឡើងជង្គង់បាន គឺមានប្រៀបល្អអាចមានឱកាសឈ្នះវិញ។
ទេស សំខាន់ បាននិយាយក្រោយការប្រកួតថា៖ «ខ្ញុំចាញ់អស់ចិត្ត ព្រោះការតស៊ូប្រកួតរបស់ខ្ញុំបានចំនួន ៥ ទឹកនេះគឺជាការទ្រាំតស៊ូណាស់ ដោយសារខ្ញុំទទួលរងនូវកណ្តាប់ដៃធ្ងន់ៗ និងចូលមិនចុះ។ ខ្ញុំដឹងពីចំណុចខ្សោយរបស់គេគឺមិនអាចលេងក្បាច់ជង្គង់ជាមួយខ្ញុំបានទេ ប៉ុន្តែខ្ញុំមិនអាចចូលចុះ ដោយកណ្តាប់ដៃ និងក្បាច់ទាត់ការពារគឺធ្ងន់ៗ មិនអាចឲ្យខ្ញុំចូលកៀកបានហើយក្រោយពីការប្រកួតនេះ ខ្ញុំនឹងចូលទៅពិនិត្យសុខភាព ព្រោះខ្ញុំរងរបួសភ្នែកផង និងគ្រាំគ្រាខ្លួនឈឺសឹងគ្រប់កន្លែង»។
ចំណែកគូប្រដាល់ខ្សែក្រវាត់ ហេង សំរាំង និងថៃ Chhouk Namchhai វិញគឺមានបញ្ហាចម្រូងចម្រាស ព្រោះការយល់ឃើញរបស់អ្នកទស្សនាមិនដូចគ្នា។ នៅទឹកទី ១ ពួកគេប្រកួតគ្នាដោយចេញស្នៀតជើងសងគ្នាបានល្អ និងមានលក្ខណប្រហាក់ប្រហែលគ្នា ហើយនៅដើមទឹកទី ២ ហេង សំរាំង មានប្រៀបលើថៃ Chhouk Namchhai ប៉ុន្តែក្នុងពេលដែលជាប់ដៃប្រតាយប្រតប់គ្នាខ្លាំង នៅក្បែរបង្គោលនោះអាជ្ញាកណ្តាល នួន បូរ៉ា បានឃាត់ តែ ChhoukNamchhai បានបន្ថែមមួយជើងចូលទ្រូងរបស់ ហេង សំរាំង បណ្តាលឲ្យដួល ហើយអាជ្ញាកណ្តាលបានរាប់ដល់ ១០ ហេង សំរាំង មិនអាចងើបមកប្រកួតបន្តបានឡើយ។
ទេស សំខាន់ (ឆ្វេង) បានព្យាយាមទប់ការម៉ាត់របស់ Gafari។ រូប ពន្លក
លោក រាជ សុផែន ស្នងការប្រកួតប្រចាំសង្វៀន SEATV បានចេញមុខបកស្រាយបច្ចេកទេសដោយប្រកាសលទ្ធផលឲ្យកីឡាករថៃដែលល្មើសការប្រកួតទទួលជ័យជម្នះ ខណៈដែលកីឡាកររងគ្រោះត្រូវបានប្រកាសឲ្យចាញ់តែម្តង។
លោក រាជ សុផែន បានពន្យល់ថាកីឡាករដែលល្មើសការប្រកួតបែបនេះគឺពិតជាមានកំហុស ប៉ុន្តែកីឡាកររងគ្រោះដែលទទួលរងទម្ងន់ទាត់ប៉ុណ្ណឹង មិនអាចសន្លប់បានទេគឺមានចេតនាស៊ីឡាកចង់កេងចំណេញយកឈ្នះ ដែលគណៈកម្មការពិនិត្យទៅគឺមិនអាចឲ្យឈ្នះបានទេ គឺចេតនាចង់ឈ្នះដោយធ្វើពុត។
ទោះជាយ៉ាងណាកីឡាករ ហេង សំរាំង ក្រោយពេលប្រកួតមិនអាចសុំការសម្ភាសបានទេ ប៉ុន្តែគ្រូប្រដាល់ម្នាក់សុំមិនឲ្យបញ្ចេញឈ្មោះបានប្រាប់ថា យើងលំបាកថាណាស់ ព្រោះការទាត់ចូលទ្រូងជួនកាលមើលឃើញទំនងត្រូវតិចមិនធ្ងន់ តែពេលខ្លះត្រូវខ្លាំងមែន។
ចំណែកលោក ឡុង ស៊ីលីន ចៅក្រមម្នាក់ដែលផ្តល់ពិន្ទុគូនេះបាននិយាយថា៖ «ហេង សំរាំង ធ្វើពុតផ្សំចង់បានស៊ីឡាក ព្រោះត្រូវប៉ុណ្ណឹងគឺតាមខ្ញុំមើល ហេង សំរាំង អាចងើបរួច និងបន្តការប្រកួតបាន ហើយប្រធានស្នងការប្រកួតចេញមុខបកស្រាយប៉ុណ្ណឹងគឺទទួលយកបាន ព្រោះកីឡាករគួរប្រឹងអស់ពីសមត្ថភាព។ រីឯការចាញ់ ឬឈ្នះ គណៈកម្មការគេពិនិត្យត្រឹមត្រូវ៕
