.jpg)
ភ្នំពេញ: កីឡាករទេស សំខាន់ មកពីក្លិបកងពលតូចលេខ ៧០ និងកីឡាករមកពីប្រទេសស៊ុយអែត Alexander Gustav បានប៉ះគ្នាក្នុងប្រភេទទម្ងន់ ៦៩ គីឡូក្រាមកាលពីព្រឹកថ្ងៃអាទិត្យ ទី ៣០ ខែធ្នូ ឆ្នាំ ២០១៨ និងទទួលបានលទ្ធផលស្មើគ្នា ក្រោយការប្រកួតដ៏ស្វិតស្វាញ និងជក់ចិត្តរយៈពេល ៥ ទឹកពេញ នៅសង្វៀនអាស៊ីអាគ្នេយ៍។
គូអន្តរជាតិនេះជាការប្រកួតមិត្តភាពអន្តរជាតិក្នុងកម្មវិធី Boostrong Fighter ប្រចាំសប្តាហ៍ ហើយទេស សំខាន់ ជាកីឡាករជើងចាស់ទើបជាពីរបួស និងបានឡើងទៅប្រកួតដើម្បីសន្សំភាពខ្លាំងឡើងវិញ បន្ទាប់ពីខកខានការប្រកួតជិត ១ ឆ្នាំ។
ការប្រកួតត្រូវបានមហាជនពេញចិត្តយ៉ាងខ្លាំង ហើយគណៈកម្មការក៏ពេញចិត្តចំពោះសមត្ថភាពរបស់អ្នកប្រដាល់ទាំង ២ នេះដែរ។ ពួកគេបានប្តូរស្នៀតកណ្តាប់ដៃ និងស្នៀតកែងតាំងពីទឹកទី ១ ដោយបានវាយចូលគោលដៅបានល្អដូចគ្នា ប៉ុន្ដែ នៅតែអាចតស៊ូបានរហូតចប់ទឹកទី ៥។
នៅទឹកទី៣ ទេស សំខាន់ បានវៃឲ្យ Alexander Gustav ដុនដាបខ្លាំង ហើយអាជ្ញាកណ្តាលលោកណន រិទ្ធ បានរាប់លើកីឡាករស៊ុយអែតរូបនេះ មុននឹងបន្តការប្រកួត។ ដោយភាពក្លាហាន និងក្បាច់គុនល្អ ព្រមទាំងការប្រឹងប្រែងអស់ពីសមត្ថភាពរបស់ Alexander Gustav បានធ្វើឲ្យទេស សំខាន់ ខ្សោយកម្លាំងនៅចុងទឹក ប៉ុន្តែស្នៀតទាត់ឆ្វេងដ៏ល្អរបស់ទេស សំខាន់ បានធ្វើឲ្យ Alexander Gustav ចង់គាំងម្តង។ ចូលដល់ទឹកទី ៥ ទេស សំខាន់ នៅតែមានស្នៀតទាត់ល្អ ប៉ុន្តែ លំបាកទប់ទល់ជាមួយកណ្តាប់ដៃដ៏លឿនរបស់ Alexander Gustav ដែលបានវាយឲ្យទេស សំខាន់ ចង់គាំងម្តងៗវិញដែរ។
ចប់ការប្រកួត គណៈកម្មការបានប្រ-កាសលទ្ធផលឲ្យស្មើគ្នា ហើយចង់ឲ្យពួកគេជួបប្រកួតសងសឹកគ្នានៅឆ្នាំ ២០១៩ ម្តងទៀត។ លោកញាន សុធី បានហៅការផ្តល់លទ្ធផលឲ្យស្មើ ជាលទ្ធផលគួរទទួលយកបានទាំងអស់គ្នា ពីព្រោះបើគិតពីពិន្ទុ ទេស សំខាន់ មានប្រៀបជាង ប៉ុន្តែ ថាមពល ឬស្ថានភាពកម្លាំងនៅចុងទឹក មានលក្ខណៈដុនដាបជាង។
លោកបន្ថែមថា៖ «ការផ្តល់លទ្ធផលឲ្យស្មើគ្នានេះ គឺល្អបំផុតដើម្បីទុកឱកាសឲ្យមានការប្រកួតសងសឹកគ្នាឡើងវិញ ហើយអ្វីដែលកាន់តែល្អនោះគឺថា វាជាការប្រកួតលក្ខណៈមិត្តភាពដកស្រង់បច្ចេកទេសគ្នាប៉ុណ្ណោះ»។
ទេស សំខាន់ បាននិយាយថា៖ «ខ្ញុំគិតថា ខ្ញុំបានឈ្នះ ប៉ុន្តែលទ្ធផលចេញមកអ៊ីចឹង ខ្ញុំទទួលយកបាន ពីព្រោះនៅចុងទឹក ខ្ញុំដកដង្ហើមមិនចង់រួចទេ ហើយក៏មិននឹកស្មានថា អាចឈានដល់ចប់ទឹកទី ៥ ដែរ»។
កីឡាកររូបនេះបានបន្ថែមថា៖ «បើខ្ញុំវាយតាមសម្រួល ក្រោយពីខ្ញុំបានវាយឲ្យអាជ្ញាកណ្តាលរាប់នៅទឹកទី ៣ និងវាយបន្ថែមវិញ ខ្ញុំនឹងមានពិន្ទុឈ្នះ ប៉ុន្តែខ្ញុំចង់វាយឲ្យគេសន្លប់ដើម្បីចង់មានឈ្មោះល្បីឡើងវិញ»៕
