.jpg)
គង់ ហូវ (ក្រហម) បានព្យាយាមទប់ សំ អាន មុនពេលសន្លប់។សហការី
ភ្នំពេញ៖ អ្នកប្រដាល់ជើងថ្មី កំពុងបានសាងភាពល្បីរបស់ក្លិបបញ្ជាការដ្ឋានទ័ពពិសេស សំ អាន បានផ្តួលកីឡាករជើងចាស់ទាំង ២ រូបគឺ សេន កុសល នៅវគ្គជម្រុះ និង គង់ ហូវ ក្នុងវគ្គផ្តាច់ព្រ័ត្រ ដើម្បីយកប្រាក់រង្វាន់ ៣,៤ លានរៀល ពីការប្រកួតដណ្តើមប្រាក់លាននៅសង្វៀនថោន ជាលើកទី២ កាលពីថ្ងៃអាទិត្យ។
ចំពោះការទាត់ឱ្យ សេន កុសល ឡើងគ្រាំគ្រា និងត្រូវបានអាជ្ញាកណ្តាលរាប់រហូតសម្រេចបោះបង់ចោល ក្រោយទឹកទី២ បានបញ្ចប់នៅវគ្គជម្រុះ រួមទាំងការបន្តវាយកែងស្តាំ បណ្តាលឱ្យ គង់ ហូវ សន្លប់ក្នុងទឹកទី២ នៅវគ្គផ្តាច់ព្រ័ត្រ ដើម្បីក្លាយជាម្ចាស់ជើងឯកនេះ ត្រូវបាន សំ អាន អះអាងថា ជាជ័យជម្នះ ដែលទទួលបានដោយការស៊ីផុយ គឺមិនតានតឹងដូចពេលរូបគេឈ្នះប្រាក់លាននេះ កាលប្រកួតលើកទី១ នោះទេ។
សំ អាន បាននិយាយក្រោយការប្រកួតថា៖ «ការប្រកួតលើកនេះ ខ្ញុំស៊ីរាងផុយជាងការប្រកួតមុនៗ ដោយសារខ្ញុំហ្វឹកហាត់បានពេញល្អ។ សម្រាប់ សេន កុសល គាត់រាងធន់ដែរ ប៉ុន្តែគាត់ចូលរបស់ខ្ញុំធ្ងន់ៗពេក ចំណែក គង់ ហូវ នៅទឹកទី១ និងដើមទឹកទី២ គាត់ចាប់ក្បាច់ខ្ញុំបាន ប៉ុន្តែនៅចុងទឹកទី២ ខ្ញុំបានព្យាយាមប្តូរក្បាច់មិនឱ្យគាត់ចាប់ក្បាច់ខ្ញុំបានទៀតទេ ហើយគាត់បានចូលចំចុងកែងស្តាំរបស់ខ្ញុំ បណ្តាលឱ្យសន្លប់តែម្តង»។
ចំណែកជើងខ្លាំងជំនាញស្នៀតទាត់ គង់ ហូវ ដែលបានឈ្នះពិន្ទុ សេក ថាវរី ទាំងវេទនាខ្លួននៅវគ្គជម្រុះនោះ បានទទួលស្គាល់ចំពោះការចាញ់ដោយសន្លប់ក្រោមកែងរបស់ សំ អាន នៅវគ្គផ្តាច់ព្រ័ត្រនេះ។ គង់ ហូវ បាននិយាយថា៖ «ខ្ញុំពិតជាចាញ់ដោយអស់ចិត្ត ព្រោះកម្លាំងវ៉ៃចេញរបស់ សំ អាន នេះ គឺសន្ធាប់ខ្លាំងណាស់ ដែលធ្វើឱ្យខ្ញុំគ្មានឱកាសប្រើស្នៀតទាត់បាន ព្រោះកណ្តាប់ដៃ និងស្នៀតកែងរបស់គាត់ វាយចេញមកលឿនៗពេក លំបាកទប់ ឬគេចណាស់»។
គង់ ហូវ ដែលទទួលបានប្រាក់រង្វាន់ ១,៨ លានរៀលបានបន្ថែមថា៖ «ខ្ញុំទទួលស្គាល់ថា ខ្សោយកម្លាំងតាំងពីវគ្គដំបូង ដែលកីឡាករ សេក ថាវរី ប្តូរកណ្តាប់ដៃជាមួយខ្ញុំ សឹងតែអស់ខ្យល់ និងសន្លប់ម្តងៗទៅហើយ ហើយនេះក៏ជាការចាញ់លើកទី៤ ជាប់ៗគ្នារបស់ខ្ញុំផងដែរ គឺមួយរយៈនេះ ខ្ញុំមិនទាន់មានលទ្ធភាពឈ្នះទេ ប៉ុន្តែខ្ញុំមិនបោះបង់មុខរបរប្រដាល់នេះឡើយ ព្រោះការចាញ់បែបនេះ មកពីខ្ញុំហ្វឹកហាត់មិនបានល្អ ធ្លាក់កម្លាំង ហើយម្យ៉ាង ខ្ញុំក៏បានងាកមកធ្វើការងារក្រៅបន្ថែម ដើម្បីប្រាក់ចំណូលជួយគ្រួសារដែលឪពុកម្តាយចាស់ៗនៅក្នុងបន្ទុកផង»។
ចំណែក សេន កុសល ដែលកន្លងមក មានសមត្ថភាពលំដាប់ខ្លាំងមួយរូបនោះ គឺដូចជាធ្លាក់ចុះមែនទែន ដោយគ្មានសមត្ថភាពតដៃជាមួយ សំ អាន សោះ ហើយប្រភពពីមន្ត្រីសហព័ន្ធប្រដាល់បានប្រាប់ថា៖ «សេន កុសល មានឈ្មោះបម្រុងជាកីឡាករជម្រើសជាតិឃីកបុស៊ិង ប៉ុន្តែតាមរយៈការប្រកួតបែបនេះ គេមិនអាចយកបានទេ»។ សេន កុសល ក្រោយពេលប្រកួតមិនអាចសុំសម្ភាសបានទេ ដោយរូបគេបានត្រឹមដើរគេចចេញ និងគ្រវីក្បាល៕
