ភ្នំពេញ៖ អ្នកប្រដាល់មកពីនាយកដ្ឋានអង្គរក្ស សុខ សាវិន និងគ្រូបង្វឹករបស់គេ លោក ស៊ន អេលីត បានរិះគន់ និងចោទប្រកាន់លោកអាជ្ញាកណ្តាល អ៊ិន ខេមរិន្ទ ថា មានចេតនាជួយដល់កីឡាករ ឡុង ជិន ដើម្បីឱ្យរូបគេគេចផុតពីការសន្លប់ ហើយអាចកែប្រែស្ថានភាពពីគ្រោះទៅជាលាភ ដោយបានក្លាយជាម្ចាស់ប្រាក់លានចំនួន ៤ លានរៀល នៅលើសង្វៀនថោនជាលើកទី២។
តាមរយៈការប្រកួតកាលពីថ្ងៃអាទិត្យ កន្លងមកនេះ សុខ សាវិន បានផ្តួល បាង កាយ៉ាក ឱ្យសន្លប់នៅត្រឹមទឹកទី២ ក្នុងការប្រកួតជម្រុះ ចំណែក ឡុង ជិន បានឈ្នះ ជ័រ ពៅ ដោយពិន្ទុ ហើយជ័យជម្នះនេះបានធ្វើឱ្យអ្នកទាំង ២ ត្រូវឡើងទៅជួបគ្នានៅវគ្គផ្តាច់ព្រ័ត្រ ដែលបានធ្វើឡើងក្នុងថ្ងៃតែ ១ នោះ។
នៅក្នុងការប្រកួតនោះ សុខ សាវិន និង ឡុង ជិន មានលក្ខណៈប្រហាក់ប្រហែលគ្នាលំបាកនឹងវិនិច្ឆ័យថា ខាងណាមានប្រៀបសម្រាប់ការប្រកួតនៅទឹកទី១ ប៉ុន្តែចូលទឹកទី២ ឡុង ជិន បុកជង្គង់ចូលពោះ សុខ សាវិន នាំឱ្យដួល ហើយត្រូវបានអាជ្ញាកណ្តាលលោក អ៊ិន ខេមរិន្ទ រាប់ភ្លាមៗ។
ទោះយ៉ាងណា សម្រាប់ការប្រកួតនៅទឹកទី៣ សុខ សាវិន បានម៉ាត់ចូលផ្ទៃមុខ ឡុង ជិន ពេញបណ្តាលឱ្យវង្វេង នាំឱ្យអាជ្ញាកណ្តាលរាប់ទៅលើ ឡុង ជិន វិញម្តង ប៉ុន្តែកាយវិការរបស់អាជ្ញាកណ្តាល អ៊ិន ខេមរិន្ទ មានសកម្មភាពពន្យារពេល ដោយរាប់បែបយឺតៗដែលភាសាប្រដាល់គេនិយមហៅថា សូវ៉េ ឬអាចថា ជាចេតនាជួយឱ្យ ឡុង ជិន ស្តារភាពវង្វេងវង្វាន់មកវិញព្រោះការម៉ាត់របស់ សុខ សាវិន ធ្វើឱ្យ ឡុង ជិន ស្រុតចុះរកកលនឹងដួល តែត្រូវបានអាជ្ញាកណ្តាលចូលចាប់ភ្លាមៗ។
បន្ថែមលើបញ្ហានេះ គឺនៅក្រោយការប្រកួត ៣ ទឹកនេះ ចៅក្រមបានផ្តល់ពិន្ទុឱ្យ ឡុង ជិន ឈ្នះដាច់តែម្តង ៥ ទល់នឹង ០ នាំឱ្យ សុខ សាវិន មិនពេញចិត្ត ហើយស្នើសុំសងសឹកឡើងវិញ។ ជាមួយគ្នានេះ លោក ស៊ន អេលីត ជាគ្រូបង្វឹកនិយាយថា៖ «ខ្ញុំខ្ជិលនិយាយពីរឿងដាក់ពិន្ទុ ព្រោះគ្មានបានលទ្ធផលអ្វីមកវិញទេ ដោយសារជាសិទ្ធិផ្តាច់មុខរបស់គេ មិនអាចតវ៉ាបានការអីទេ ប៉ុន្តែខ្ញុំមើលឃើញពីសកម្មភាពលោកអាជ្ញាកណ្តាល អ៊ិន ខេមរិន្ទ ទំនងមានចេតនាជួយ ឡុង ជិន គេចផុតពីការសន្លប់ ដោយសារតែ សុខ សាវិន ព្រោះការចាញ់ ឬឈ្នះ វាមានឱកាសមាសតែក្នុងរយៈពេលខ្លី ខណៈដែលកំពុងវង្វេងវង្វាន់នោះហើយ»។
ស៊ន អេលីត បានបន្ថែមថា៖ «ខ្ញុំស្គាល់ចរិតអាជ្ញាកណ្តាលចៅក្រមមួយចំនួន សុទ្ធតែស្អប់ខ្ញុំ ធ្វើបាបកូនសិស្ស ដែលមិនចេះលុតក្រាប និងអែបអបឱ្យពួកគាត់បានផឹកស៊ី។ ខ្ញុំមិនចេះអែបអបខុសរឿងទេ ខ្ញុំជឿលើសមត្ថភាពកីឡាករប្រកួត ដោយឥឡូវក្លិបរបស់ខ្ញុំបានឯកភាពជាមួយមេៗ ដាក់គោលដៅថ្មី បើផ្តួលដៃគូឱ្យសន្លប់ជូន ៥០០ ដុល្លារបន្ថែមទៀត ហើយឈ្នះពិន្ទុជូន ៣០០ ដុល្លារបន្ថែមទៀត ដើម្បីឱ្យសិស្សប្រឹងវ៉ៃ។ ការធ្វើបែបនេះ កុំឱ្យពួកចៅក្រមអាជ្ញាកណ្តាលមួយចំនួន អាចលួចបន្លំ និងលម្អៀងបាន ហើយម៉្យាងទៀតកូនសិស្សមានទឹកចិត្តហាត់ឱ្យខ្លាំងវ៉ៃដៃគូឱ្យដាច់ ឬសន្លប់តែម្តង»។
ចំណែកលោក ជួប វុត្ថា អ្នកសម្របសម្រួលការផ្គូផ្គងប្រចាំនៅសង្វៀនថោនបាននិយាយថា៖ «ខាងសង្វៀន គ្មានសិទ្ធិក្នុងការវិនិច្ឆ័យទេ ប៉ុន្តែសំណើរបស់ សុខ សាវិន សុំសងសឹក គឺទទួលយកដោយដាក់ឱ្យសងសឹកគ្នាម្តងទៀត នៅថ្ងៃទី ១៤ ខែ កម្ភៈ ឆ្នាំ ២០២១»។
ចំពោះ ឡុង ជិន ដែលធ្លាប់ឈ្នះប្រាក់លានពីកម្មវិធីនេះ ២ លើក បានសារភាពថា៖ «ការប្រកួតនេះលំបាកយកឈ្នះមែន ដោយខ្ញុំមិនហ៊ាននិយាយទេ គឺស្រេចលើគណៈកម្មការជាអ្នកឱ្យពិន្ទុប៉ុណ្ណោះ»៕