.jpg)
សិស្សគណក្លិបបញ្ជាការដ្ឋានអង្គរក្ស ស៊ន អេលីត (ស្តាំ) ត្រូវជួប លាភ រដ្ឋា។សហការី
ភ្នំពេញ៖ ក្លិបប្រដាល់នាយកដ្ឋានអង្គរក្សដែលសម្បូរធនធានកីឡាករមានសមត្ថភាពល្អក្នុងលំដាប់ជួរមុខនោះ ត្រូវបានប្រកាសប្រមូលកីឡាករឱ្យចូលហ្វឹកហាត់វិញ ដើម្បីទទួលយកការចាប់គូប្រកួតឡើងវិញ នៅតាមស្ថានីយទូរទស្សន៍មួយចំនួន បន្ទាប់ពីក្លិបនេះ បានផ្អាកប្រមូលផ្តុំហ្វឹកហាត់ និងទទួលការប្រកួតដោយបញ្ហាជំងឺឆ្លងកូវីដ ១៩ អស់រយៈពេលជាង ២ ខែមកនេះ។
ក្លិបប្រដាល់នាយកដ្ឋានអង្គរក្សមិនត្រឹមតែប្រមូលផ្តុំដោយកីឡាករល្អៗ មានសមត្ថភាពខ្ពស់ប៉ុណ្ណោះទេ ប៉ុន្តែក្លិបនេះក៏មានធនធានថវិកាទ្រទ្រង់ល្អ ដែលអាចមានលទ្ធភាពទិញ ឬផ្ទេរយកកីឡាករមកពីក្លិប និងសមាគមប្រដាល់ផ្សេងៗ បានចំនួនច្រើន ព្រោះក្លិបនេះមានថ្នាក់ដឹកនាំ ជានាយនគរបាលជាន់ខ្ពស់ ចាំជួយគាំទ្រដល់ការហូបចុក ស្នាក់នៅ និងផ្តល់រង្វាន់លើកទឹកចិត្តដល់កីឡាករ នៅពេលប្រកួតឈ្នះ ពិសេសផ្តួលដៃគូឱ្យសន្លប់បានដល់ ៥០០ ដុល្លារ ធ្វើឱ្យពួកគេចង់ចូលហាត់។
គិតមកដល់បច្ចុប្បន្ន ក្លិបប្រដាល់នាយកដ្ឋានអង្គរក្ស ដែលមាន លោក ស៊ន អេលីត ជាអ្នកគ្រប់គ្រងផ្ទាល់មានលក្ខណៈរីកចម្រើនខ្លាំង ប៉ុន្តែជំហរបស់ ស៊ន អេលីត ត្រូវបានគេទទួលស្គាល់ថា ពូកែស្វែងរកការផ្គត់ផ្គង់ជូនកីឡាករ ហើយមានភាពឯករាជ្យ មិនចូលចិត្តលុតក្រាប ហេតុនេះលោកមានភាពអល់អែក មិនទាន់ចូលក្នុងសមាគមប្រដាល់ក្រសួងមហាផ្ទៃនៅឡើយ ដោយលោកបានបង្ហើបបន្តិចថា ជារឿងផ្ទៃក្នុងមិនចង់និយាយ ទាក់ទងទៅនឹងផលប្រយោជន៍។
លោក ស៊ន អេលីត បាននិយាយថា៖ «ក្លិបរបស់យើងមានកីឡាករល្អឆ្នើមៗជាង ២០ នាក់ ប៉ុន្តែដោយសារបញ្ហាកូវីដ ១៩ វាយលុកខ្លាំង និងដើម្បីចូលរួមការពារជំងឺឆ្លងផង គឺយើងបានផ្អាកអស់រយៈពេលចំនួន ២ ខែមកហើយ ដោយក្លិបបានរំសាយកីឡាករឱ្យទៅផ្ទះរៀងៗខ្លួន គឺនៅមានកីឡាករត្រឹម ៤ ទៅ ៥ នាក់ប៉ុណ្ណោះ តែមិនហាត់ទេ ហើយក្នុងរយៈពេលផ្អាកនេះ ក្លិបរបស់ខ្ញុំមានជីវភាពធម្មតា មិនមានខ្វះខាតការហូបចុកអ្វីទេ ព្រោះមានការយកចិត្តទុកដាក់ពីមេៗ មានលោកនាយឧត្តមសេនិយ៍ ឆៃ ស៊ីណារិទ្ធ លោកឧត្តមសេនីយ៍ឯក ឌី វិជ្ជា និង លោកឧត្តមសេនីយ៍ យឹម លាង ជាអគ្គស្នងការរងនគរបាលជាតិជួយឧបត្ថម្ភ»។
លោកបន្ថែមថា៖ «ទោះយ៉ាងណា នៅពេលស្ថានភាពជំងឺកូវីដធូរស្រាលបន្តិច ហើយអាជ្ញាធរក៏បានបើកផ្លូវឡើងវិញនោះ គឺពេលនេះ ខ្ញុំប្រកាសឱ្យកូនសិស្សមកហ្វឹកហាត់ឡើងវិញ ដើម្បីចូលរួមប្រកួតតាមសង្វៀនទូរទសន្ស៍មួយចំនួន ដែលត្រូវការកីឡាករយើងប្រកួត ហើយក្លិបខ្ញុំឯករាជ្យមិនចូលក្នុងក្រសួងមហាផ្ទៃទេ ព្រោះខ្ញុំមិនចង់នៅក្រោមសម្ពាធ ឬលក្ខខណ្ឌលំបាក»។
ជាការចាប់ផ្តើមប្រមូលហ្វឹកហាត់ឡើងវិញនេះ ក្លិបប្រដាល់នាយកដ្ឋានអង្គរក្ស ទើបតែទទួលបានកីឡាករចំនួន ២ នាក់ប៉ុណ្ណោះ ត្រូវឡើងប្រកួតក្នុងសប្តាហ៍នេះ គឺកីឡាករ អេលីត សាន់ ត្រូវប្រកួតជាមួយ លាភ រដ្ឋា នៅសង្វៀន CNC និង អេលីត សម្ផស្ស ទៅប្រកួតនៅសង្វៀនថោនដណ្តើមប្រាក់លាន៕
