ភ្នំពេញ៖ បើទោះបីជាកម្មវិធីប្រកួតកីឡាធំៗនៅទូទាំងពិភពលោកត្រូវបានជាប់គាំង ដោយសារវិបត្តិនៃជំងឺកូវីដ ១៩ ប៉ុន្តែប្រទេសវៀតណាម ដែលនឹងត្រូវធ្វើជាម្ចាស់ផ្ទះការប្រកួតស៊ីហ្គេមលើកទី ៣១ ឆ្នាំ ២០២១ នៅតែប្រកាន់ជំហរគ្មានងាករេ ក្នុងការរៀបចំព្រឹត្តិការណ៍ដ៏ធំប្រចាំនៅតំបន់អាស៊ានមួយនេះ ទៅតាមគម្រោង គឺនឹងធ្វើនៅទីក្រុងហាណូយ ពីថ្ងៃទី ២១ វិច្ឆិកា និងបិទនៅថ្ងៃទី ២ ខែ ធ្នូ ឆ្នាំ ២០២១។
ជាមួយគ្នានេះកម្ពុជា ដែលត្រូវធ្វើជាម្ចាស់ផ្ទះការប្រកួតស៊ីហ្គេម ជាប្រវត្តិសាស្រ្តលើកដំបូងនៅឆ្នាំ ២០២៣ បន្ទាប់ពីប្រទេសវៀតណាម នោះ ក៏កំពុងជួបបញ្ហាក្នុងការពង្រឹងសក្តានុពលទាំងទៅលើធនធានកីឡាករ និងមន្រ្តីបច្ចេកទេស ដោយសារវិបត្តិជំងឺកូវីដ ១៩ ផងដែរ ហើយកម្ពុជាក៏មិនអាចយកលទ្ធផល ដែលខ្លួនធ្លាប់ធ្វើបានក្នុងការប្រកួតស៊ីហ្គេមកន្លងមក ដើម្បីធ្វើការវាយតម្លៃ ឬកំណត់គោលដៅឲ្យបានច្បាស់លាស់ សម្រាប់ការឆ្ពោះទៅស៊ីហ្គេម ២០២៣ នោះដែរ។
លោក វ៉ាត់ ចំរើន អគ្គលេខាធិការគណៈកម្មាធិកាការជាតិរៀបចំការប្រកួតស៊ីហ្គេមឆ្នាំ ២០២៣ (CAMSOC) បានថ្លែងប្រាប់ថា៖ «ដោយសារតែពិភពលោក ជួបទៅនឹងបញ្ហាជំងឺកូវីដ ១៩ ហើយកម្ពុជាក៏មានផលប៉ះពាល់ខ្លះដែរនោះ គឺគិតមកដល់បច្ចុប្បន្ន កម្ពុជាមិនទាន់ហ៊ានកំណត់គោលដៅ ឬព្យាករពីសក្តានុពលនៃលទ្ធផលរបស់អត្តពលិកយើងកម្រិតណានៅឡើយ ពោលគឺយើងនឹងពិនិត្យលទ្ធផលក្រោយស៊ីហ្គេមនៅវៀតណាម ឆ្នាំ ២០២១ សិន ទើបច្បាស់លាស់»។
លោក វ៉ាត់ ចំរើន ដែលជាអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) ផងនោះ បានបន្ថែមថា៖ «កាលពីមហាសន្និបាត ដើមឆ្នាំ ២០២០ NOCC បានកំណត់គោលដៅជាបណ្តោះអាសន្ននូវលទ្ធផលព្យាករតាមសហព័ន្ធកីឡាជាតិ ដើម្បីដណ្តើមបានមេដាយ និងចំណាត់ថ្នាក់ ស្ថិតក្នុងចន្លោះពីលេខ ៥ និងលេខ ៦ ប៉ុន្តែបញ្ហាខកខានការហ្វឹកហាត់ និងប្រកួតច្រើននោះ យើងមិនហ៊ានកំណត់ដាក់គោលដៅ ឬធ្វើការព្យាករឲ្យប្រាកដនោះឡើយ»។
អ្នកជំនាញកីឡារូបនេះ បានបញ្ជាក់ថា៖ «កាលពីដំណាក់កាលទី១ យើងធ្វើសន្ទស្សន៍ថា កម្ពុជាយើងនឹងឈរក្នុងលំដាប់ទី៥ ឬទី៦ នៅពេលយើងធ្វើម្ចាស់ផ្ទះ នៅឆ្នាំ ២០២៣ ប៉ុន្តែការវាយតម្លៃតំណាក់កាលចុងក្រោយ គឺលទ្ធផលប្រកួតនៅវៀតណាម ឆ្នាំ ២០២១ ខណៈការប្រកួតនេះ យើងគ្រោងបញ្ជូនកីឡាពី ៣០ ទៅ ៣៥ ប្រភេទឲ្យទៅចូលរួម»។
នៅក្នុងកំណត់ត្រាជាប្រវត្តិសាស្ត្រក្នុងការចូលរួមប្រកួតស៊ីហ្គេមកន្លងមក កម្ពុជាធ្លាប់ដណ្តើមបានចំណាត់ថ្នាក់លេខ ៧ លេខ ៨ និងលេខ ៩ ប៉ុន្តែបើគិតជាមធ្យមភាគ គឺកម្ពុជាមានលទ្ធផលត្រឹមចំណាត់ថ្នាក់លេខ ៨ ក្នុងតំបន់អាស៊ាន ដែលមាន ១១ ប្រតិភូចូលរួម គឺនៅពីលើប្រទេសប៊្រុយណេ ឡាវ និងទីម័រខាងកើត ចំណែកមីយ៉ាន់ម៉ា កំពុងប្រទាញប្រទង់គ្នាជាមួយកម្ពុជា ទៅតាមប្រភេទកីឡា ដែលមានសក្តានុពល។
លោក សុខ អាង ជាអគ្គលេខាធិការសហព័ន្ធកីឡាគុនដាវកម្ពុជា និងជាអ្នកសិក្សាតាមដានព្រឹត្តិការណ៍កីឡា ហើយក៏ធ្លាប់ជាអតីតនាយកបេសកម្មរងរបស់ NOCC ផងដែរនោះ និយាយថា៖ «ក្នុងគោលដៅមហាសន្និបាតអូឡាំពិកកន្លងមក ការដាក់សន្ទស្សន៍ដណ្តើមមេដាយរបស់កម្ពុជា ក្នុងចំណាត់ថ្នាក់លេខ ៥ ឬលេខ ៦ មិនទាន់អាចនិយាយបានទេ ព្រោះបញ្ហាកូវីដ ១៩ ធ្វើឲ្យសកម្មភាពកីឡាខកខានច្រើន»។
លោកបន្តថា៖ «បញ្ហានេះ វាទាក់ទងនឹងប្រភេទកីឡា ដែលម្ចាស់ផ្ទះបានដាក់ ហើយកម្ពុជាមានប្រភេទកីឡាអ្វី ដែលមានសក្តានុពល អាចប្រកួតប្រជែងជាមួយគេ អ៊ីចឹងក្រោយដឹងលទ្ធផលពីស៊ីហ្គេម ឆ្នាំ ២០២១ នៅវៀតណាមទើបការវាយតម្លៃ និងកំណត់គោលដៅ នៅឆ្នាំ ២០២៣ អាចធ្វើទៅបានដោយគួរឲ្យទុកចិត្ត»៕