.jpg)
កីឡាករ-កីឡាការិនីកំពុងចូលរួមហ្វឹកហាត់ក្នុងកីឡាទូកកានូកាលពីថ្ងៃចន្ទនៅក្រុងតាខ្មៅ។ សហការី
កណ្ដាល៖ លោក ស៊ូជីយ៉ា ជនតិមីយ៉ាន់ម៉ាអ្នកជំនាញបង្វឹកកីឡាទូកប្រពៃណីខ្នាតអន្តរជាតិ (ចំណុះ ១២ នាក់) នាព្រឹកថ្ងៃទី ៣០ ខែ កញ្ញា ឆ្នាំ ២០១៩ បានផ្តល់បទពិសោធ និងបច្ចេកទេសដល់ក្រុមកីឡាករជម្រើសជាតិកម្ពុជាទាំងឈុតធំ និងឈុតតូច នៅលើទីលានមាត់ទន្លេក្រុងតាខ្មៅ ខេត្តកណ្តាល។
ពិធីបង្ហាញបច្ចេកទេសនេះ គឺមានការអញ្ជើញចូលរួមពីលោកឧត្តមសេនិយ៍ឯក ជា ប៊ុនហេងអគ្គលេខាធិការនៃសហព័ន្ធកីឡាទូកកានូ និងរ៉ូអ៊ីងកម្ពុជាព្រមទាំងគ្រូជម្រើសជាតិ ដើម្បីទទួលបានបច្ចេកទេសថ្មីៗក្នុងការហ្វឹកហាត់ក្នុងគោលបំណងឈានទៅរកការប្រកួតប្រជែងលក្ខណៈអន្តរជាតិឲ្យទទួលបានលទ្ធផលល្អពិសេស គឺត្រៀមសម្រាប់ព្រឹត្តិការណ៍ស៊ីហ្គេមនាចុងឆ្នាំខាងមុខនេះ នៅប្រទេស ហ្វីលីពីន។
លោក ជា ប៊ុនហេង ដែលចុះដល់ទីលានហ្វឹកហាត់ផ្ទាល់ជាមួយគ្រូបង្វឹកថ្នាក់ជាតិ និងគ្រូជំនាញមកពីបរទេសបានមានប្រសាសន៍ថា៖ «គ្រូបង្វឹកមកជួយហ្វឹកហាត់ផ្នែកបច្ចេកទេសដល់ក្រុមកីឡាករជម្រើសជាតិកម្ពុជាបន្ថែមទៀត គឺដើម្បីត្រៀមខ្លួនចូលរួមក្នុងការប្រកួតនៃព្រឹត្តិការណ៍កីឡា SEAGAMS ២០១៩ លើកទី ៣០ នៅក្នុងប្រទេស ហ្វីលីពីន ដែលប្រព្រឹត្តទៅចាប់ពីថ្ងៃទី ៣០ ខែ វិច្ឆិកា ដល់ថ្ងៃទី ១១ ខែ ធ្នូ ឆ្នាំ ២០១៩។
លោក ជា ប៊ុនហេង បានបន្ថែមថា៖ «កីឡាដែលអាចឈានទៅដណ្តើមជយលាភីបាន គឺការហ្វឹកហាត់ឲ្យត្រូវតាមជំនាញបច្ចេកទេសពិសេសគឺគ្រូល្អដែលមានស្នាដៃ និងបទពិសោធទទួលបានលទ្ធផលល្អហេតុនេះយើងនឹងស្វះស្វែងរកគ្រូ និងអ្នកជំនាញមកបង្វឹក និងផ្តល់បច្ចេកទេសផ្ទាល់ដល់ទីលានតែម្តង។ នៅពេលខាងមុខនឹងសុំគោលការណ៍ស្វែងរកគ្រូបង្វឹកមកពីបរទេស ដើម្បីប្រចាំការហ្វឹកហាត់ផ្ទាល់តែម្តងទើបទទួលបានលទ្ធផលល្អ»។
ទោះជាយ៉ាងណា ជម្រើសជាតិកីឡាទូកប្រពៃណីខ្នាតអន្តរជាតិមានត្រឹម ១៤ នាក់ មិនអាចទៅចូលលេងចំណុះលើសពីវិញ្ញាសា ១២ នាក់ ចម្ងាយ ២០០ ម៉ែត្របានទេពីព្រោះយើងខ្វះកីឡាករ ខណៈដែលក្រសួងអប់រំ យុវជន និងកីឡាផ្តល់ឲ្យប្រមូលផ្តុំឈុតធំបានតែ ១៤ នាក់ និងឈុតតូច ១៤ នាក់។
កញ្ញា មាស តឿ អ្នកសម្របសម្រួលសហព័ន្ធកីឡាទូកកានូ និងរ៉ូអ៊ីងកម្ពុជានិយាយថា៖ «ក្រុមកីឡាករទូកធ្លាប់ចូលរួមការប្រកួតអន្តរជាតិជាច្រើនលើកមកហើយក្នុងនោះយើងទទួលបានផលគួរឲ្យកត់សម្គាល់»។
កន្លងមកការប្រកួតកីឡាទូកអាស៊ានមិត្តភាពចិន-កម្ពុជា ទទួលបានមេដាយប្រាក់ និងសំរឹទ្ធ ការប្រកួតជើងឯកប៉ូលិសពិភពលោកទទួលបានមេដាយមាសនៅប្រទេស ចិន និងការប្រកួត ជើងឯកពិភពលោកទទួលបានមេដាយប្រាក់នៅប្រទេស ថៃ។
ជាមួយគ្នានេះតាមការណែនាំចង្អុលបង្ហាញពីឯកឧត្តម ជា ប៊ុនហេង មានគោលដៅដណ្តើមយកមេដាយពីព្រឹត្តិការណ៍ស៊ីហ្គេមឆ្នាំ ២០១៩ នេះនៅហ្វីលីពីន។
កញ្ញា មាស តឿ បន្ថែមទៀតថា៖ «កាលពីថ្ងៃទី ១៦ ខែ កញ្ញា ឆ្នាំ ២០១៩ ប្រតិភូគ្រូបង្វឹកកីឡាករ-កីឡាការិនីទូកកានូចំនួន ១៧ រូប បានចេញដំណើរទៅចូលរួមធ្វើការហ្វឹកហាត់ ធ្វើទស្សនកិច្ចសិក្សា និងធ្វើការប្រកួតកីឡាទូកកានូជាលក្ខណៈមិត្តភាពជាមួយក្រុមនិស្សិតជប៉ុនដែលបានប្រព្រឹត្តទៅចាប់ពីថ្ងៃទី ១៦ ដល់ថ្ងៃទី ២៥ ខែ កញ្ញា ឆ្នាំ ២០១៩ នៅប្រទេស ជប៉ុន ដើម្បីពង្រឹងសមត្ថភាពថែមទៀត»៕
