ភ្នំពេញៈ ការប្រកួតកីឡាជាតិ លើកទី២ ដែលបានចាប់ផ្តើមតាំងពីថ្ងៃទី២៥ ខែឧសភា នឹងគ្រោងបញ្ចប់ នៅថ្ងៃទី៤ ខែមិថុនា ឆ្នាំ២០១៨នោះ គឺទទួលបានលទ្ធផលជាបណ្តើរៗ ខណៈស្ថាប័នកីឡាចូលរួមចំនួន២៨ គឺមានក្រុមអត្តពលិកតំណាងឲ្យរាជធានីភ្នំពេញ ក្រសួងមហាផ្ទៃ និងក្រសួងការពារជាតិ ប៉ុណ្ណោះ ដែលកំពុងប្រជែងគ្នា ក្នុងនាមជាអ្នកដណ្តើមបានមេដាយមាសច្រើន នៅកំពូលតារាង។
ប្រភពពីមន្ត្រីបច្ចេកទេស តាមសហព័ន្ធកីឡាជាតិនានា ដែលជាគណៈកម្មការប្រកួតសុទ្ធតែមិនហ៊ានផ្តល់ពីលទ្ធផលប្រកួតជាក់ស្តែង ដោយត្រូវរង់ចាំការបំពាក់មេដាយ និងការចុះហត្ថលេខាពីគណៈកម្មការបច្ចេកទេសរបស់កីឡាជាតិ សិនទើបផ្សាយជាផ្លូវការបាន។ ទង្វើនេះ វាបាននិងកំពុងធ្វើឲ្យការប្រកួតកីឡាជាតិ ដែលចំណាយថវិការដ្ឋអស់រាប់រយលានរៀលនោះ នៅតែមានបញ្ហាលើការបង្ហាញលទ្ធផលប្រកួត នៅលើប្រភេទកីឡានីមួយៗ ដូចការប្រកួតកន្លងមកអ៊ីចឹងដែរ។
ទោះជាយ៉ាងណា តាមលទ្ធផលបណ្តោះអាសន្ន ដែលក្រសួងអប់រំ យុវជន និងកីឡាផ្សាយជាផ្លូវការ តែមានលក្ខណៈមហាយឺតយ៉ាវ ដោយគិតត្រឹមថ្ងៃសៅរ៍ ទី២៦ ខែឧសភា នោះ គឺរាជធានីភ្នំពេញ កំពុងនាំមុខគេ ក្នុងនាមជាអ្នកដណ្តើមបានមេដាយច្រើន ដោយពួកគេបានមេដាយមាស ១០ ប្រាក់ ៩ និងសំរឹទ្ធ ៥ ហើយតាមពីក្រោយដោយក្រសួងមហាផ្ទៃ ដែលឈ្នះបានមេដាយមាស៧ ប្រាក់ ៦ និងសំរឹទ្ធ ៥។
ចំណែកខាងក្រសួងការពារជាតិ បានមេដាយមាស ៤ ប្រាក់ ១ និងសំរឹទ្ធ១ ប៉ុន្តែខេត្តចំនួន ៤ មាន រតនគិរី មណ្ឌលគិរី ក្រចេះ និងខេត្តប៉ៃលិន មិនទាន់ដណ្តើមបានមេដាយដូចគ្នា ខណៈខេត្តផ្សេងៗទៀត បានរកឃើញការឈ្នះមេដាយហើយ ក្នុងនោះខេត្តកណ្តាល ខេត្តតាកែវ និងខេត្តត្បូងឃ្មុំ មានភាពលេចធ្លោជាងគេ ដោយបានមេដាយមាស ៣ ដូចគ្នា។
តាមរយៈការសម្ភាសជាមួយ ភ្នំពេញ ប៉ុស្តិ៍ គឺប្រធានប្រតិភូ ជានាយបេសកកម្មមកពីរាជធានីភ្នំពេញ ក្រសួងមហាផ្ទៃ និងក្រសួងការពារជាតិ សុទ្ធតែបានបង្ហាញពីមោទនភាព ចំពោះលទ្ធផល ដែលអត្តពលិករបស់ខ្លួន ដណ្តើមបាននៅពេលនេះ ហើយពួកគាត់សង្ឃឹមឈ្នះលើកំពូលតរាងដូចគ្នា។
លោក ជា ប៊ុនហេង តំណាងឲ្យកីឡាក្រសួងមហាផ្ទៃ បានប្រាប់មុននេះបន្តិចថា៖«ក្រសួងមហាផ្ទៃ ឈរក្នុងលំដាប់លេខ ២ ជាបណ្តោះអាសន្ន ដោយមិនទាន់រាប់បញ្ចូលមេដាយមាស ដែលទើបដណ្តើមបានពីការប្រកួតកីឡាហែលទឹក វាយសី និងចំបាប់ នៅថ្ងៃអាទិត្យនេះ នោះទេ។ ហេតុនេះ លទ្ធផលនឹងមានការប្រែប្រួល ហើយខ្ញុំមានទំនុកចិត្ត ដោយផ្អែកលើផែនការយុទ្ធសាស្ត្របច្ចេកទេស គឺមហាផ្ទៃ នឹងឈ្នះបានចំណាត់ថ្នាក់លេខ ១ វិញ»។
ចំណែកលោក ផេង ស្រេង តំណាងប្រតិភូមកពីរាជធានីភ្នំពេញ បានប្រាប់ភ្នំពេញ ប៉ុស្តិ៍ កាលពីរសៀលថ្ងៃអាទិត្យនេះថា៖ «គិតត្រឹមថ្ងៃនេះ រាជធានីភ្នំពេញឈរ នៅលើកំពូលតារាង ប៉ុន្តែការប្រែប្រួលយ៉ាងណា គឺមិនទាន់ដឹងទេ។ ទោះជាយ៉ាងណា អ្នកដែលអាចប្រជែងឈ្នះរាជធានីភ្នំពេញបាន មានតែមហាផ្ទៃ មួយគត់ ឯក្រសួងការពារជាតិ គ្មានឧបសគ្គនោះទេ គឺអាចនៅក្រោម»។
លោក តែម ម៉ឺន តំណាងឲ្យក្រសួងការពារជាតិ បានថ្លែងប្រាប់មុននេះបន្តិចថា លោកទទួលបានថា ក្រសួងការពារជាតិ បានមេដាយ៩ហើយ ហើយនៅចុងបញ្ចប់ ក្រសួងការពារជាតិ រំពឹងបានចំណាត់ថ្នាក់ល្អ ដើម្បីប្រជែងជាមួយក្រសួងមហាផ្ទៃ និង រាជធានីភ្នំពេញ។
គួររំឭកថា សម្រាប់ការប្រកួតកីឡាជាតិ លើកទី ១ កាលពីឆ្នាំ ២០១៦ រាជធានីភ្នំពេញ ទទួលបានចំណាត់ថ្នាក់លេខ ១ ក្នុងនាមជាអ្នកដណ្តើមបានមេដាយមាសច្រើនជាងគេ ហើយក្រសួងមហាផ្ទៃ បានលេខ ២ និងក្រសួងការពារជាតិ បានលេខ ៣។
ចំណែកការប្រកួតកីឡាជាតិលើកទី ២ ឆ្នាំ ២០១៨ នេះ ក្រសួងមហាផ្ទៃ ដាក់កីឡាចំនួន ២២ ប្រភេទ ក្នុងចំណោម ២៧ ប្រភេទ ចូលរួម ដោយមានអត្តពលិក និងមន្ត្រីបច្ចេកទេសសរុប ២៩៤ នាក់ ឯរាជធានីភ្នំពេញ បានដាក់២២ ប្រភេទកីឡាចូលរួមដែរ មានអត្តពលិក និងប្រតិភូសរុបចំនួន ២៨៥ ប៉ុន្តែក្រសួងការពារជាតិ បានដាក់កីឡាចូលរួមប្រកួតតែ ១៣ ប្រភេទទេ ដោយមានអត្តពលិកនិងប្រតិភូសរុបចំនួន ១៦៤ នាក់៕