.jpg)
លោក ប៊ូ ជុំសេរី និងតំណាងរបស់ស្ថាប័នកីឡាផ្សេងៗទៀត ដែលបានចូលរួម នៅក្នុងកិច្ចប្រជុំ លើសេចក្តីព្រាងច្បាប់ ពីថ្ងៃអង្គារ។ រូប សហការី
ភ្នំពេញ៖ ក្រសួងអប់រំ យុវជន និងកីឡា ដោយមានការចូលរួមពីតំណាងរបស់គណៈកម្មាធិការជាតិអូឡាំពិកកម្ពុជា (NOCC) សហព័ន្ធកីឡាជាតិចំនួន ៤២ ព្រមទាំងសមាគមកីឡាកងយោធពលខេមរភូមិន្ទ និងក្រសួងមហាផ្ទៃ គឺបានបន្តបើកកិច្ចប្រជុំពិភាក្សាលម្អិតលើជំពូកទី១ និងទី២ នៃសេចក្តីព្រាងច្បាប់គ្រប់គ្រងវិស័យអប់រំកាយ និងកីឡា ដើម្បីសម្របសម្រួលឱ្យកីឡានៅកម្ពុជា ស្ថិតនៅក្នុងរបត់មួយ ស្របទៅនឹងធម្មនុញ្ញអូឡាំពិកអន្តរជាតិ។
លោក ប៊ូ ជុំសេរី អនុរដ្ឋលេខាធិការនៃក្រសួងអប់រំ យុវជន និងកីឡា ជាអនុប្រធានអចិន្រៃ្តយ៍គណៈកម្មការរៀបចំតាក់តែង សេចក្ដីព្រាងច្បាប់គ្រប់គ្រង វិស័យអប់រំកាយ និងកីឡានេះ បានថ្លែងនៅក្នុងកិច្ចប្រជុំ កាលពីថ្ងៃអង្គារថា៖ «កិច្ចពិភាក្សានេះ សង្កត់ធ្ងន់ទៅលើការប្រមូលធាតុផ្គុំចូលទិន្នន័យឱ្យបានច្រើន ព្រមទាំងពិភាក្សាលើជំពូកផ្សេងៗ ស្ដីពីការបង្កើតតួនាទីភារកិច្ច និងសិទ្ធិអំណាចរបស់អង្គការ និងស្ថាប័នកីឡា ដែលចែកចេញជា ១០ ផ្នែក ហើយសេចក្ដីព្រាងស្ដីពីការគ្រប់គ្រងលើវិស័យអប់រំកាយ និងកីឡានេះ យើងបានប្រជុំច្រើនលើកមកហើយ ដើម្បីពិភាក្សាលម្អិតទៅលើជំនាញបច្ចេកទេសច្រើនទៀត ដែលក្នុងនោះ អាចនឹងចំណាយពេលច្រើនខែទៀត ប៉ុន្តែយើងនឹងជំរុញឱ្យលឿនបំផុត ដែលអាចនឹងបញ្ចប់ឱ្យទាន់នៅដំណាច់ឆ្នាំ ២០២១ ដើម្បីដាក់ជូនគណៈរដ្ឋមន្ត្រីពិនិត្យ និងបន្តតាមនិតិវិធី»។
លោកបន្ថែមថា ខ្លឹមសារៈសំខាន់មាន ១០ ផ្នែកនោះ ផ្នែកទី១ មាន៧មាត្រា គឺចែងពីរចនាសម្ព័ន្ធចាត់តាំង គ្រប់គ្រងវិស័យអប់រំកាយ និងកីឡា ផ្នែកទី២ ដែលមាន ៤ មាត្រានោះ ចែងពីឋានានុក្រម ចាត់តាំងរចនាសម្ព័ន្ធកីឡា ផ្នែកទី៣ មានចែងពីទំនាក់ទំនងរវាងអង្គការរដ្ឋ និងអង្គការសង្គមកីឡាមាន ១៣ មាត្រា ហើយផ្នែកទី៤ ចែងពីសហព័ន្ធកីឡាជាតិ ដែលមាន ២ មាត្រា។
ចំណែកផ្នែកទី៥ ចែងពីការបង្កើតសហព័ន្ធកីឡាជាតិ មានចំនួន៤មាត្រា ផ្នែកទី៦ មាន ៥ មាត្រា ចែងពីការគ្រប់គ្រងសហព័ន្ធកីឡាជាតិ ផ្នែកទី៦ មាន៥មាត្រា ចែងពីការគ្រប់គ្រងសហព័ន្ធកីឡាជាតិ ផ្នែកទី៧ មាន ៧ មាត្រា ចែងពីក្លិបកីឡាស្ម័គ្រចិត្ត ផ្នែកទី៨ មាន ២ មាត្រា ចែងពីក្លិបកីឡាអាជីពផ្នែកទី៩ មានចំនួន ៦ មាត្រា គឺចែងអំពីកីឡាកងយោធពលខេមរភូមិន្ទ និងផ្នែកទី១០ ចែងពីកីឡានគរបាលជាតិ មានចំនួន ៩ មាត្រា។
លោក វ៉ាត់ ចំរើន អគ្គលេខាធិការ NOCC បានប្រាប់ថា៖ «គម្រោងព្រាងច្បាប់ ស្ដីពីការគ្រប់គ្រងលើវិស័យអប់រំកាយ និងកីឡានេះ គឺយើងសម្របសម្រួលឱ្យកីឡា នៅប្រទេសយើងស្ថិតនៅក្នុងរបត់មួយ ស្របទៅនឹងធម្មនុញ្ញអូឡាំពិក អ៊ីចឹងការពិភាក្សានេះ ដើម្បីរកការឯកភាពជាធ្លុងមួយ ក្នុងគោលបំណង ឱ្យការគ្រប់គ្រងដឹកនាំចាត់ចែងសកម្មភាពកីឡាមានលក្ខណៈរលូន ហើយតាមគោលការណ៍នេះ នឹងមានច្បាប់មួយជាក់លាក់ ដើម្បីឱ្យអង្គការកីឡាតែមួយរបស់ជាតិ មានប្រភពតែមួយពីថ្នាក់ជាតិដល់មូលដ្ឋាន ស្របទៅនឹងភាពជឿនលឿននៃការរីកចម្រើនវិស័យកីឡារបស់ពិភពលោក ដែលផ្តោតកីឡាជាមួយការអប់រំ ដូចទៅនឹងទស្សនៈរបស់គណៈកម្មាធិការអូឡាំពិកអន្តរជាតិ»៕
