ភ្នំពេញ: ព្រឹត្តិការណ៍ប្រកួតបាល់ទាត់ Smart Community Cup 2019 ត្រូវបានបង្កើតឡើងដោយក្រុមហ៊ុន Smart Axiata ក្រោមកិច្ចសហប្រតិបត្តិការជាមួយមូលនិធិបណ្ដុះបណ្ដាលកីឡាបាល់ទាត់អាស៊ី (ASA) សមាគមកាយរិទ្ធបាល់ទាត់អាជីព (PFSA) និងអង្គការក្រៅរាជរដ្ឋាភិបាលចំនួន ៥ ទៀត ដើម្បីផ្តល់ឱកាសឲ្យកុមារមានជីវភាពលំបាកបានលេងបាល់ទាត់ក្រោមការបង្ហាត់បង្ហាញពីគ្រូជំនាញបាល់ទាត់មកពីក្លិប Manchester United និងគ្រូបង្វឹកនៅក្នុងស្រុកមួយចំនួនទៀតផងដែរ។
ក្រុមកីឡាករ និងក្រុមកីឡាការិនីអាយុក្រោម ១៤ ឆ្នាំ និងក្រោម ១៨ ឆ្នាំចំនួន ១៦ ក្រុមមកពីអង្គការ World Vision Cambodia អង្គការស្នាមញញឹមនៃកុមារ (PSE) អង្គការមូលនិធិកុមារកម្ពុជា មូលនិធិ Indochina Starfish Foundation និងអង្គការ Happy Football Cambodia Australia ត្រូវបានដាក់ឲ្យហ្វឹកហាត់ និងប្រកួតប្រជែងគ្នានៅកីឡដ្ឋាន RSN កាលពីថ្ងៃសៅរ៍ និងថ្ងៃអាទិត្យហើយក្រុមទទួលបានជ័យជម្នះក៏ទទួលបានពាន និងការបំពាក់មេដាយផងដែរ។
នាយកប្រតិបត្តិក្រុមហ៊ុន Smart Axiata លោក Thomas Hundt បានថ្លែងថា៖ «Smart Community Cup ត្រូវបានរៀបចំឡើងក្នុងគោលបំណងជំរុញយុវជនឲ្យចូលរួមក្នុងសកម្មភាពវិជ្ជមានជាច្រើន និងផ្តល់ភាពសប្បាយរីករាយឲ្យពួកគេ មិនត្រឹមតែបានជួយឲ្យសុខភាពរាងកាយមាំមួនប៉ុណ្ណោះទេ ប៉ុន្តែក៏បង្កើនក្ដីស្រមៃរបស់ពួកគេក្នុងការលេងបាល់ទាត់ និងបំប៉នជំនាញលេងបាល់ទាត់ឲ្យកាន់តែប្រសើរផងដែរ»។
លោកបន្ថែមថា៖ «យើងមានសេចក្តីសោមនស្សរីករាយដែលកម្មវិធីនេះបានផ្តល់ឱកាសដល់កុមារដែលមានជីវភាពលំបាកមកពីអង្គការដៃគូបានចូលរួមក្នុងការហ្វឹកហាត់ និងសិក្ខាសាលាស្ដីពីកីឡាបាល់ទាត់ដែលមានការចូលរួមពីគ្រូបង្វឹកមកពីសាលាបណ្ដុះបណ្ដាលកីឡាបាល់ទាត់របស់ក្លិប Manchester United។ យើងសង្ឃឹមថាកម្មវិធីនេះនឹងមានឥទ្ធិពលក្នុងការផ្ដល់នូវការលូតលាស់រីកចម្រើនរយៈពេលវែងសម្រាប់សហគមន៍ដែលយើងកំពុងធ្វើប្រតិបត្តិការ»។
មូលនិធិនេះបានផ្តល់កម្មវិធីអប់រំវិស័យកីឡាដល់ប្រជាពលរដ្ឋជាង ២ លាននាក់នៅទូទាំងពិភពលោកដែលមានគោលបំណងពង្រីកប្រជាប្រិយភាពនៃកីឡាបាល់ទាត់ក្នុងចំណោមកុមារី និងកុមារានៅកម្ពុជាតាមរយៈកម្មវិធីបណ្ដុះបណ្ដាលកីឡាថ្នាក់មូលដ្ឋាន ហើយសិស្សវិទ្យាល័យជាង ២០០ នាក់ និងកីឡាករបាល់ទាត់ជាង ២០០ នាក់ក៏បានចូលរួមក្នុងកម្មវិធីកាយរិទ្ធ និងការហ្វឹកហាត់បាល់ទាត់នេះផងដែរ។
លោក Lee Hawkins ស្ថាបនិក និងជាទីប្រឹក្សាបច្ចេកទេសរបស់ ASA បានថ្លែងថា៖ «មូលនិធិ ASA បានរៀបចំកម្មវិធីកីឡាសម្រាប់ការអភិវឌ្ឍនៅក្នុងប្រទេសជាច្រើនចាប់តាំងពីឆ្នាំ ២០០១ មកម្ល៉េះ ហើយ Smart Community Cup ពិតជាបានផ្តល់នូវបទពិសោធនៃការសិក្សាល្អៗដល់យុវជនកម្ពុជា។ យើងសង្ឃឹមថាកម្មវិធីនេះនឹងបន្តកសាងភាពជោគជ័យរបស់ខ្លួន និងលើកកម្ពស់ការអភិវឌ្ឍបំនិនជីវិតក៏ដូចជាសមភាពយេនឌ័រឲ្យកាន់តែទូលំទូលាយថែមទៀតនៅពេលអនាគត»។
ចំណែកឯលោក Dean Whitehouse គ្រូបង្វឹករបស់ PFSA និងជាគ្រូបង្វឹកក្នុងសាលាបណ្ដុះបណ្ដាលកីឡាបាល់ទាត់ក្លិប Manchester United បាននិយាយថា៖ «ការលេងបាល់ទាត់គឺជាឧបករណ៍គរុកោសល្យដ៏មានឥទ្ធិពលក្នុងការបង្កើនការយល់ដឹង ហើយខ្ញុំពិតជារីករាយជាមួយនឹងពេលវេលាដែលបានចំណាយក្នុងប្រទេសកម្ពុជាដោយធ្វើការជាមួយយុវជនដែលមានការចាប់អារម្មណ៍ខ្ពស់ និងគ្រូបង្វឹកដែលមានសក្ដានុពលជាច្រើននាចុងសប្តាហ៍នេះ»៕