ភ្នំពេញៈ កីឡាការិនីរបស់កម្ពុជា នូវ ស្រីពៅ បានបង្ហាញពីក្តីរំភើបខ្លាំងទៅនឹងជ័យជម្នះរបស់ខ្លួនលើកីឡាការិនីម្ចាស់ផ្ទះថៃ Rika “Tinydoll” Ishige ក្នុងការប្រកួតទម្ងន់ ៥២,២ គីឡូក្រាមនៃព្រឹត្តិការណ៍ ONE: CLASH OF LEGENDS ប៉ុន្តែ ឡៅ ចិត្ត្រា បានត្រឹមទទួលស្គាល់នូវការបរាជ័យរបស់ខ្លួន និងបានចាត់ទុកគូប្រកួត Superlek ជាជើងខ្លាំងទី ១ ដែលរូបគេបានជួប។
បើទោះបីជា Rika មានភាពជឿជាក់ខ្លួនទៅលើសមត្ថភាពខ្លួនឯង ពិសេសជំនាញប្រើក្បាច់ក្លេក្នុងការយកឈ្នះលើ នូវ ស្រីពៅ ដើម្បីបំពេញនូវមហិច្ឆតារបស់ខ្លួនក្នុងការស្វែងរកឱកាសឡើងទៅប្រកួតដណ្តើមខ្សែក្រវាត់ពិភពលោករបស់ ONE នៅឆ្នាំនេះ ប៉ុន្តែតាមរយៈការប្រកួតជាក់ស្តែងកាលពីយប់ថ្ងៃសៅរ៍នោះ Rika គ្មានឱកាសសូម្បីម្តងក្នុងការប្រើក្បាច់ក្លេទៅលើ ស្រីពៅ។
ការដួលចំនួន ២ លើកនៅក្នុងទឹកទី ១ ក្រោមកណ្តាប់ដៃម៉ាត់ ស្រីពៅ បានធ្វើឲ្យ Rika លែងហ៊ានចូលចាប់ និងប្តូររបៀបជាការប្រកួតបែបសេរីវិញ ប៉ុន្តែថៃរូបនេះនៅតែស្ថិតក្នុងការចាញ់ប្រៀប ស្រីពៅ ដដែល ខណៈនាងបានបន្តដួលនៅទឹកទី ២ និងទឹកទី ៣ ចុងក្រោយនោះ។
ផ្ទៃមុខរបស់ Rika ពោរពេញទៅដោយស្នាមពក និងហើមដែលបន្សល់ទុកដោយការម៉ាត់ចូលធ្ងន់ៗរបស់ ស្រីពៅ ហើយការចាញ់ប្រៀបដាច់ទាំង ៣ ទឹកនេះបានធ្វើឲ្យ Rika បានត្រឹមលើកដៃសំពះដើម្បីបង្ហាញពីការសុំទោសទៅដល់ជនរួមជាតិ ខណៈរូបគេត្រូវបានប្រកាសឲ្យចាញ់ពិន្ទុ នូវ ស្រីពៅ នោះ។
ជាមួយនឹងជ័យជម្នះនេះ នូវ ស្រីពៅ បាននិយាយថា៖ «ខ្ញុំពិតជារំភើប និងសប្បាយចិត្តខ្លាំងមែនទែន ដែលខ្ញុំធ្វើបាន។ ដំបូងឡើងខ្ញុំគិតថា ខ្ញុំមិនអាចធ្វើបានទេ ដោយសារខ្ញុំមានការបារម្ភលើការក្លេរបស់គេ ប៉ុន្តែលោកគ្រូបានប្រាប់ខ្ញុំថា កុំបារម្ភខ្លាំងពេក ព្រោះរេញនេះមិនមែនវ៉ៃក្នុងទ្រុងទេ គឺរេញដូចយើងវ៉ៃលក្ខណៈសេរីដែរ អ៊ីចឹងយើងកុំគិតថា គេក្លេគឺយើងវ៉ៃដូចសេរីទៅ»។
ជាមួយបណ្តាំពីគ្រូបង្វឹកនេះបានធ្វើឲ្យ នូវ ស្រីពៅ បានបង្ហាញការប្រកួតយ៉ាងមានទំនុកចិត្ត ប៉ុន្តែនាងមិនបានចូលទៅចាប់ក្លេ Rika ដែលបានដួលចំនួន ៥ លើកក្រោមកណ្តាប់ដៃរបស់ខ្លួននោះទេ។ ស្រីពៅ បានបញ្ជាក់ថា៖ «លោកគ្រូប្រាប់ថា បើយើងមិនសូវចេះក្លេអ៊ីចឹង យើងមិនអាចចូលជិតគេបានទេ ព្រោះបើយើងប្រហែសតែ ១ វិនាទីគឺយើងអាចជាប់ក្លេរបស់គេបាន»។
ឡៅ ចិត្ត្រា ចង់សងសឹកនឹង Superlek ម្តងទៀតក្រោយចាញ់ពិន្ទុ ៣ ទឹកដាច់ផ្ទុយពីនេះកីឡាករជើងខ្លាំងរបស់កម្ពុជា ឡៅ ចិត្ត្រា ដែលដាក់ឲ្យប្រកួតសេរីជាមួយជើងខ្លាំងរបស់ថៃ Superlek នៅយប់ថ្ងៃសៅរ៍នោះដែរបានទទួលរងការវ៉ៃប្រហារយ៉ាងចាស់ដៃពីកីឡាករជាម្ចាស់ផ្ទះ។ ក្បាច់វ៉ៃចេញដ៏សម្បូរបែបរបស់ ចិត្ត្រា បានជាប់គាំងក្រោមការទាត់លឿនៗ និងផ្ទួនៗរបស់ Superlek ហើយដៃឆ្វេងរបស់ ចិត្ត្រា ក៏មានបញ្ហាក្រោមទម្ងន់ជើងរបស់ថៃម្នាក់នេះផងដែរ ខណៈការប្រកួត ៣ ទឹកពេញ Superlek បានទាត់ទៅលើ ចិត្ត្រា ជាង ៣០ ជើង។
Superlek បានយកប្រៀបខ្លាំងទៅលើ ឡៅ ចិត្ត្រា នៅរាល់ដើមទឹកនីមួយៗ ហើយអ្វីដែលពិសេសនោះគឺគេបានទាត់សន្ធាប់ផ្ទួនៗទៅលើ ចិត្ត្រា រហូតដល់ ១០ ជើងនៅដើមទឹកទី ២។ យ៉ាងណាក៏ដោយការជម្នះចូលវាយកែង និងបុកកែងនៅទឹកទី ៣ របស់ ចិត្ត្រា ក៏ធ្វើឲ្យកីឡាករម្ចាស់ផ្ទះរូបនេះមានការថមថយ និងខំរំដោះខ្លួនទាំងអារម្មណ៍ជ្រួលច្របល់ផងដែរមុនពេលប្រកាសឲ្យឈ្នះពិន្ទុជាឯកច្ឆន្ទលើ ឡៅ ចិត្ត្រា។
ទាក់ទងទៅនឹងការប្រកួតនេះ ឡៅ ចិត្ត្រា បាននិយាយក្រោយការប្រកួតថា៖ «ខ្ញុំគាំងមែនទែន! មុនចាប់ផ្តើម ខ្ញុំគិតថា ខ្ញុំនឹងធ្វើបានល្អ ប៉ុន្តែពេលប្រកួតខ្ញុំចាញ់ក្បាច់គេតែម្តង ព្រោះគេរហ័សល្អ ហើយយើងញាក់អីក៏គេដឹងដែរ។ នេះជាលើកទី ១ ហើយដែលខ្ញុំបានជួបកីឡាករល្អបែបនេះ ហើយដៃរបស់ខ្ញុំឈឺ ព្រោះគេទាត់ធ្ងន់ តែខ្ញុំទ្រាំ និងចង់ចូលវ៉ៃគេឲ្យសន្លប់ ប៉ុន្តែធ្វើអត់បាន»។
យ៉ាងណាក៏ដោយ ឡៅ ចិត្ត្រា ចង់ប្រកួតសងសឹក Superlek ម្តងទៀត។ គេបាននិយាយថា៖ «បើសិនជាអាចជួបគ្នាលើកក្រោយមែន ខ្ញុំអត់ខ្លាចគេនោះទេ គឺខ្ញុំចង់សាកម្តងទៀត ហើយខ្ញុំអត់ចង់ធ្វើដូចថ្ងៃនេះទេ! ខ្ញុំចង់ធ្វើឲ្យសមត្ថភាពខ្ញុំឡើងជាងនេះ ហើយទោះចាញ់ ឬឈ្នះគឺធ្វើម៉េចឲ្យល្អជាងហ្នឹង»៕