ភ្នំពេញ៖ ក្រុមម្ចាស់ជើងឯកព្រះខ័នរាជស្វាយរៀង មិនអាចរក្សាកំណត់ត្រាដ៏ល្អរបស់ខ្លួនបាននោះទេ ខណៈពួកគេបានជួបការបរាជ័យជាលើកដំបូង ក្រោមស្នាដៃអតីតក្រុមម្ចាស់ជើងឯក ណាហ្គាវើល ២-១ ក្នុងការប្រកួតបញ្ចប់រដូវកាលលីកកំពូលកម្ពុជា ឆ្នាំ ២០១៩ កាលពីថ្ងៃសៅរ៍ ចំណែកក្រុមបាតតារាងចំនួន ២ អាចនឹងត្រូវកាត់ចោលសម្រាប់ការប្រកួតលីកកំពូល រដូវកាលថ្មី ឆ្នាំ ២០២០។
ជំនួបរវាងក្រុមទើបលើកពាន ព្រះខ័នរាជស្វាយរៀង និងអតីតក្រុមម្ចាស់ជើងឯក ឆ្នាំ ២០១៨ នៅកីឡដ្ឋានស្តាតចាស់ កាលពីថ្ងៃសៅរ៍នោះ គឺក្រុមទាំង ២ បានប្រកួតប្រជែងគ្នាយ៉ាងស្វិតស្វាញបំផុត ប៉ុន្តែប្រធានក្រុម សឿយ វិសាល បានជួយឲ្យក្រុមស្វាយរៀងនាំមុខ ១-០ នៅតង់ទី ១ ខណៈរូបគេបានទាត់បាល់ហ្វ្រ៊ីឃីកបញ្ចូលទីបានយ៉ាងស្អាតនៅនាទីទី ១៨ នោះ។
យ៉ាងណាក៏ដោយ ការធ្វើឲ្យដៃទៅប៉ះបាល់របស់ Campbell នៅនាទីទី ៦៨ ធ្វើឲ្យអាជ្ញាកណ្តាលផ្តល់បាល់ពិន័យ ១១ ម៉ែត្រ ឲ្យណាហ្គាវើល ហើយខ្សែប្រយុទ្ធ Kipson ជាអ្នកស៊ុតបានសម្រេច។ បន្ថែមលើនេះ Esho Omogba បានតែតបាល់បញ្ចូលទី រកគ្រាប់បាល់ជ័យជម្នះឲ្យណាហ្គាវើល នៅនាទីទី ៧៤ មុនពេល Campbell ត្រូវបានបណ្តេញចេញ នៅចុងម៉ោង ក្រោយទទួលបានកាតលឿងជាលើកទី ២។
លោក មាស ចាន់ណា គ្រូបង្វឹកក្រុមណាហ្គាវើល មានការពេញចិត្តខ្លាំងទៅលើការឈ្នះបាន ៣ ពិន្ទុពីក្រុមស្វាយរៀង ក្នុងជំជួបបិទរដូវកាលនេះ។ បើទោះបីជា ជ័យជម្នះនេះ វាមិនអាចជួយឲ្យណាហ្គាវើល ដណ្តើមបានលេខ ២ ពីក្រុមវិសាខា ដោយសារ វិសាខាបានយកឈ្នះក្រុមនគរបាលជាតិ ៣-០ ក្ដី ប៉ុន្តែការឈ្នះនេះ វាបានលុបចោលនូវកំណត់ត្រាមិនធ្លាប់ចាញ់សោះរបស់ក្រុមស្វាយរៀង។
លោក ជូ សារឿន គ្រូបង្វឹកក្រុមស្វាយរៀង បានប្រាប់ភ្នំពេញប៉ុស្តិ៍ កាលពីថ្ងៃអាទិត្យថា៖ «យើងដាក់កីឡាករពេញជើង លេងជាមួយក្រុមណាហ្គាវើល ព្រោះយើងចង់ឈ្នះ ដើម្បីរក្សាកំណត់ត្រាប្រវត្តិសាស្រ្តដ៏ល្អរបស់យើង ប៉ុន្តែយើងមិនអាចធ្វើបាន។ ទោះយ៉ាងណា យើងមិនមានការខកចិត្តអ្វីទេ ព្រោះយើងបានខំប្រឹងប្រែងអស់ពីសមត្ថភាពហើយ តែធ្វើម៉េចសំណាងយើងមិនដល់ ទើបជួបការចាញ់លើកចុងក្រោយនេះ»។
តាមរយៈការចាញ់ណាហ្គាវើល ក្នុងការប្រកួតបិទរដូវកាលឆ្នាំ ២០១៩ នេះ បានធ្វើឲ្យ ២៦ ប្រកួត របស់ក្រុមស្វាយរៀង គឺឈ្នះ ២០ ស្មើ ៥ និងចាញ់១ ហើយបានក្លាយជាម្ចាស់ជើងឯក ជាមួយការមាន ៦៥ ពិន្ទុ ដាច់ឆ្ងាយពីក្រុមលេខ ២ វិសាខាដែលមាន ៥៨ពិន្ទុ ខណៈក្រុមឈរចំណាត់ថ្នាក់លេខ ៣ ណាហ្គាវើល មាន ៥៥ ពិន្ទុ។
ចំណែកក្រុមបឹងកេត បានយកឈ្នះក្រុមគិរីវង់សុខសែនជ័យ ២-០ ដើម្បីទទួលបានចំណាត់ថ្នាក់លេខ ៤ ដោយមាន ៥២ ពិន្ទុ ហើយក្រុមអង្គរថាយហ្គឺរ បានយកឈ្នះក្រុមអគ្គិសនីកម្ពុជា ២-១ ដើម្បីរក្សាការឈ្នះតំណែងលេខ ៥ ពីការប្រជែងរបស់ភ្នំពេញក្រោន ដែលបានលត់ក្រុមខេត្តកំពង់ចាម ៩-០ ធ្វើឲ្យពួកគេមាន ៤៩ ពិន្ទុ លើសភ្នំពេញក្រោន ១ ពិន្ទុដដែល។
ចំពោះក្រុមក្រសួងការពារជាតិ បើទោះបីជាចាញ់ក្រុមអាស៊ីអឺរ៉ុប ២-១ ក៏ពួកគេនៅតែលេខ ៧ ដោយមាន ៣៨ ពិន្ទុ តាមពីក្រោយដោយក្រុមសូលទីឡូអង្គរ មាន ៣៥ ពិន្ទុ គិរីវង់ មាន ៣៤ ពិន្ទុ អាស៊ីអឺរ៉ុប មាន ៣៤ ពិន្ទុ នគរបាលជាតិ មាន ២៨ ពិន្ទុ អគ្គិសនីកម្ពុជា មាន ១៦ ពិន្ទុ ខេត្តកំពង់ចាម មាន ៦ ពិន្ទុ និងក្រុមបាតតារាង សាលាបាល់ទាត់បាទីអាយុក្រុម ១៨ ឆ្នាំ មាន ៤ ពិន្ទុ។
ជាមួយគ្នានេះ ចំពោះក្រុមដែលត្រូវកាត់ចេញពីលីកកំពូលនារដូវកាលក្រោយ គឺគណៈកម្មការរៀបចំការប្រកួតបាល់ទាត់ជាតិកម្ពុជា (CNCC) នៅមិនទាន់បានប្រកាសផ្លូវការនៅឡើយទេ។ ប៉ុន្តែបើតាមប្រភពច្បាស់ការណ៍ បានប្រាប់ភ្នំពេញប៉ុស្តិ៍ កាលពីម្សិលមិញថា ក្រុមឈរនៅលេខរៀងចុងក្រោយចំនួន ២ គឺខេត្តកំពង់ចាម និងក្រុមសាលបាល់ទាត់បាទីអាយុក្រុម ១៨ ឆ្នាំ នឹងត្រូវកាត់ចោល ហើយការប្រជុំសម្រេចចុងក្រោយ នឹងត្រូវធ្វើឡើង ក្នុងពេលឆាប់ៗនេះ៕