.jpg)
សកម្មភាលើកពានជាបណ្ដោះអាសន្នរបស់ក្រុមស្វាយរៀង ក្រោយពួកគេឈ្នះទ័ព សប្ដាហ៍មុន។ រូបថត CNCC
ភ្នំពេញ៖ ក្រុមព្រះខ័នរាជស្វាយរៀងនៅមិនទាន់បញ្ចប់មហិច្ឆតារបស់ខ្លួននោះទេ បើទោះបីជាពួកគេបានឈ្នះពានលីកកំពូលកម្ពុជាឆ្នាំ ២០១៩ ដោយស្វ័យប្រវត្តិរួចហើយក្តី ព្រោះក្រុមមានមូលដ្ឋាននៅខេត្តស្វាយរៀងមួយនេះចង់បន្តឈ្នះក្រុមអាស៊ីអឺរ៉ុប ដើម្បីអបអរថ្ងៃលើកពានរបស់ពួកគេ នាយប់ថ្ងៃអាទិត្យនេះ ហើយណាហ្គាវើល និងវិសាខាក៏ត្រូវវិលមកជួបគ្នា ដើម្បីដណ្តើមយកចំណាត់ថ្នាក់លេខ ២ ផងដែរ។
ការបន្តយកឈ្នះក្រុមក្រសួងការពារជាតិ (ទ័ព) ៤-២ កាលពីសប្តាហ៍មុន ជួយឲ្យស្វាយរៀង ឈ្នះពានលីកកំពូលដោយស្វ័យប្រវត្តិ ទោះសល់ ២ ប្រកួតក្នុងដៃទៀត ប៉ុន្តែយោងតាមការឯកភាពក្នុងអង្គប្រជុំកន្លងមកនេះ គណៈកម្មការប្រកួតបាល់ទាត់ជាតិកម្ពុជាបានសម្រេចយកជំនួបនឹងក្រុមអាស៊ីអឺរ៉ុបនាល្ងាចថ្ងៃអាទិត្យនេះ ជាពេលដែលក្រុមស្វាយរៀងត្រូវលើកពាន។
លោក ជូ សារឿន គ្រូជំនួយក្រុមស្វាយរៀង បានប្រាប់ភ្នំពេញប៉ុស្តិ៍ កាលពីល្ងាចម្សិលមិញថា៖ «យើងពិតជាចង់ឈ្នះអាស៊ីអឺរ៉ុប ដើម្បីរក្សាកំណត់ត្រាដ៏ល្អរបស់យើង ហើយក៏ដើម្បីធ្វើឲ្យពិធីលើកពានរបស់យើង កាន់តែមានអត្ថន័យ និងពោរពេញទៅដោយភាពសប្បាយរីករាយផងដែរ»។
ការប្រកួត ២៤ លើកកន្លងមកនេះ ក្រុមស្វាយរៀងបានឈ្នះ ១៩ ស្មើ ៥ និងមាន ៦២ ពិន្ទុ ដាច់ឆ្ងាយពីក្រុមផ្សេងៗទៀត ហើយពួកគេក៏ធ្លាប់បានយកឈ្នះក្រុមអាស៊ីអឺរ៉ុប ២-០ កាលពីជើងទី ១ ផងដែរ។ យ៉ាងណាក៏ដោយ ក្រុមស្វាយរៀង នៅមិនទាន់សម្រេចនៅឡើយទេថា តើពួកគេ ត្រូវដាក់កម្លាំងពេញពេលលេងជាមួយអាស៊ីអឺរ៉ុប ឬក៏ដាក់យុវជនឲ្យលេងភាគច្រើន ដើម្បីទុកកម្លាំងខ្លះ ត្រៀមការប្រកួតផ្តាច់ព្រ័ត្រពានរង្វាន់សម្តេច ហ៊ុន សែន ជាមួយក្រុមបឹងកេត នៅថ្ងៃទី ៦ ខែវិច្ឆិកា។
លោក សារឿន បង្ហើបថា៖ «យើងមិនទាន់សម្រេចថា នឹងដាក់កម្លាំងឲ្យលេងពេញជាមួយអាស៊ីអឺរ៉ុប ឬដាក់យុវជនឲ្យចូលលេងច្រើននោះទេ គឺវាអាស្រ័យទៅលើគ្រូបង្គោលសម្រេចនៅមុនការប្រកួតចាប់ផ្តើម ព្រោះយើងនៅមានការប្រកួតផ្តាច់ព្រ័ត្រពានសម្តេច ជាមួយក្រុមបឹងកេតទៀត។ ប៉ុន្តែបើយើងដាក់យុវជនឲ្យលេងច្រើន ក៏ពិបាកយកឈ្នះអាស៊ីអឺរ៉ុបដែរ»។
យ៉ាងណាក៏ដោយ លោក Conor Nestor គ្រូបង្គោលក្រុមស្វាយរៀង បានប្រាប់ប្រព័ន្ធផ្សព្វផ្សាយ ក្រោយយកឈ្នះក្រុមទ័ពថា៖ «យើងមិនឈប់ត្រឹមហ្នឹងទេ។ ការលេងជាមួយក្រុមទ័ព បានជំរុញឲ្យយើងប្រឹងយ៉ាងខ្លាំង ហេតុនេះយើងសង្ឃឹមថា នឹងអាចបន្ត ហើយយើងនឹងបង្ហាញឲ្យឃើញសម្រាប់ការប្រកួតបន្ទាប់ទៀត»។
ដោយឡែកការវិលមកជួបគ្នារវាងក្រុមវិសាខា និងណាហ្គាវើល វាបានក្លាយជាការប្រកួតដ៏តានតឹង ដើម្បីដណ្តើមយកលេខ ២។ បើទោះបីជាវិសាខា បានឈ្នះណាហ្គាវើល ៣-២ កាលជើងទី ១ ប៉ុន្តែបើសិនជាពួកគេចាញ់លើកនេះ នឹងធ្លាក់ចេញពីលេខ ២ ភ្លាម ព្រោះពេលនេះ វិសាខា មាន ៥៤ ពិន្ទុ ខណៈណាហ្គាវើល មាន ៥១ ពិន្ទុ និងមានគ្រាប់បាល់ចំណេញច្រើនជាង។
ចំណែកក្រុមមាន ៤៦ ពិន្ទុ បឹងកេត ក៏ត្រូវសងសឹកសូលទីឡូអង្គរ ចំពោះការចាញ់ ៥-៤ កាលជើងទី ១ ផងដែរ ហើយការឈ្នះ ៣ ពិន្ទុ ពិតជាសំខាន់ខ្លាំងណាស់ចំពោះបឹងកេត ក្នុងការរក្សាទីតាំងលេខ ៤ របស់គេពីការប្រជែងរកក្រុមមាន ៤៥ ពិន្ទុ អង្គរថាយហ្គឺរ និងភ្នំពេញក្រោន ដែលមាន ៤៤ ពិន្ទុ៕
កម្មវិធីប្រកួតនៅថ្ងៃសៅរ៍
-អង្គរថាយហ្គឺរ v ភ្នំពេញក្រោន កីឡដ្ឋានសៀមរាប ៣:៣០
-ទ័ព v អគ្គិសនីកម្ពុជា កីឡដ្ឋានស្តាតចាស់ ៦:០០
-វិសាខា v ណាហ្គាវើល កីឡដ្ឋានវិសាខា ៦:០០
៤ ប្រកួតនៅថ្ងៃអាទិត្យ
-យុវជនបាទី.១៨ ឆ្នាំ v ប៉ូលិស សាលាបាល់ទាត់បាទី ៣:៣០
-ខេត្តកំពង់ចាម v គិរីវង់ កីឡដ្ឋានស្តាតចាស់ ៣:៣០
-បឹងកេត v សូលទីឡូអង្គរ កីឡដ្ឋានខេមបូឌាអ៊ែរវ៉េ ៣:៣០
-ស្វាយរៀង v អាស៊ីអឺរ៉ុប កីឡដ្ឋានស្វាយរៀង ៦:៣០
