ភ្នំពេញៈ ក្រុមព្រះខ័នរាជស្វាយរៀង និងបឹងកេត បានបង្ហាញពីទំនុកចិត្តខ្ពស់រៀងៗខ្លួនថា ពួកគេនៅតែមានប្រៀបទៅលើក្រុមមានមូលដ្ឋាននៅខេត្តសៀមរាប គឺអង្គរថាយហ្គឺរ និងសូលទីឡូអង្គរ សម្រាប់ការវិលមកជួបគ្នា ក្នុងការប្រកួតកាត់សេចក្តីជើងទី២ វគ្គ ៨ ក្រុម ពានរង្វាន់សម្តេច ហ៊ុន សែន លើកទី១៣ ឆ្នាំ ២០១៩ នៅថ្ងៃពុធនេះ។
សម្រាប់ការប្រកួតជើងទី១ កាលពីថ្ងៃទី ១៤ ខែ សីហា កន្លងមកនេះ ក្រុមបឹងកេត បានយកឈ្នះក្រុមសូលទីឡូអង្គរ ២-០ នៅលើទឹកដីខ្លួនឯង ហើយការធ្វើដំណើរដោយការជិះយន្តហោះទៅជួប សូលទីឡូអង្គរ នៅកីឡដ្ឋានខេត្តសៀមរាប នារសៀលម៉ោង ៣:៣០ ថ្ងៃពុធនេះ លោក ហៅ សុជាតិ ក៏មានការបារម្ភទៅលើទីលានផងដែរ ប៉ុន្តែលោកនៅតែមានការជឿជាក់ថា បឹងកេត នឹងទទួលបានជ័យជម្នះ។
លោក ហៅ សុជាតិ គ្រូបង្វឹកក្រុមបឹងកេត បានប្រាប់ភ្នំពេញប៉ុស្តិ៍ កាលពីថ្ងៃអង្គារថា៖ «បើទោះបីជាយើង បាននាំមុខគេ ២-០ នៅជើងទី១ ប៉ុន្តែយើងនៅមិនទាន់អាចប្រហែសបានទេ គឺយើងត្រូវតែប្រុងប្រយ័ត្ន ដោយសារយើងនៅសល់ ៩០ នាទីទៀត អ៊ីចឹងយើងត្រូវរៀបចំ ធ្វើម៉េចឲ្យបានល្អជាងជើងទី១»។
លោកបានបន្ថែមថា៖ «យើងមិនបារម្ភទៅលើកម្រិតលេងរបស់ក្រុមគេនោះទេ ប៉ុន្តែបញ្ហាដែលសំខាន់ គឺទីលាន ព្រោះយើងធ្លាប់បានចាញ់ក្រុមសូលទីឡូអង្គរ ៥-៤ ក្នុងលីកកំពូល នៅទីលាននេះ អ៊ីចឹងយើងមិនអាចមើលស្រាលគេបាននោះទេ។ ម្យ៉ាងទៀតការចាញ់ក្រុមស្វាយរៀង ២-១ ក្នុងលីកកំពូលកម្ពុជា កាលពីថ្ងៃសៅរ៍ ក៏ធ្វើឲ្យកីឡាកររបស់យើងមួយចំនួន មានអារម្មណ៍មិនទាន់ល្អផងដែរ តែទោះបីជាយ៉ាងណា យើងនៅតែមានសង្ឃឹមច្រើន ក្នុងការទទួលបានជ័យជម្នះ»។
យ៉ាងណាក៏ដោយ លោក ជា ម៉េងលី អ្នកចាត់ការទូទៅក្រុមសូលទីឡូអង្គរ នៅតែមានការជឿជាក់ថា ក្រុមរបស់លោកអាចវាយបកយកឈ្នះក្រុមបឹងកេត វិញ។
លោកបាននិយាយថា៖ «ការចាញ់កាលជើងទី១ ដោយសារយើងខ្វះកម្លាំងលេង ព្រោះកីឡាកររបស់យើង មានរបួសច្រើន ប៉ុន្តែពេលនេះពួកគេបានជាសះស្បើយអស់ហើយ ហើយនេះជាការប្រកួតនៅលើទឹកដីរបស់យើងទៀត អ៊ីចឹងយើងរាងមានសង្ឃឹមច្រើនដែរ។ ម្យ៉ាងទៀត យើងក៏ធ្លាប់ឈ្នះបឹងកេត នៅលើទឹកដីយើងដែរ ហេតុនេះយើងសង្ឃឹមថា យើងនឹងបន្តធ្វើបានល្អទៀត»។
ដោយឡែកក្រុមមានមូលដ្ឋាននៅខេត្តសៀមរាប អង្គរថាយហ្គឺរ ត្រូវធ្វើដំណើរទៅកាន់កីឡដ្ឋានខេត្តស្វាយរៀង ដើម្បីប្រកួតកាត់សេចក្តីជាមួយក្រុមព្រះខ័នរាជស្វាយរៀង នៅល្ងាចម៉ោង ៦ ថ្ងៃពុធនេះដែរ ខណៈការប្រកួតជើងទី១ អង្គរថាយហ្គឺរ បានចាញ់ក្រុមភ្ញៀវ ព្រះខ័នរាជស្វាយរៀង ក្នុងលទ្ធផល ២-០។
ទាក់ទងទៅនឹងការប្រកួតនេះ លោក ជូ សារឿន គ្រូបង្វឹកក្រុមព្រះខ័នរាជស្វាយរៀង បានប្រាប់កាលពីម្សិលមិញថា៖ «ដោយសារយើងបានឈ្នះ ២-០ នៅជើងទី១ អ៊ីចឹងការប្រកួតនេះ យើងមិនសូវជាមានការបារម្ភអ្វីទេ ព្រោះគុណភាពកីឡាកររបស់យើងមានតែមលើគេ ហើយការប្រកួតនេះក៏ធ្វើនៅលើទឹកដីរបស់យើងដែរ ហេតុនេះយើងមិនចាំបាច់លេងបែបទប់នោះទេ គឺលេងទៅតាមធម្មតា ព្រោះត្រឹមលទ្ធផលស្មើ ក៏យើងបានឡើងទៅវគ្គបន្តដែរ»៕