.jpg)
ខ្សែការពារសញ្ជាតិក្រិក Kostas Tsimikas (ឆ្វេង) កាលនៅលេងអោយក្រុម Olympiakos។ រូបថត សហការី
ឡុងដ៍៖ ជើងឯកក្របខ័ណ្ឌ Premier League អង់គ្លេសក្រុម Liverpool កាលពីថ្ងៃចន្ទ បានម្រេចចុះហត្ថលេខាយកខ្សែការពារសញ្ជាតិក្រិក Kostas Tsimikas (Kostas) ពីក្រុម Olympiakos ក្នុងតម្លៃដែលរាយការណ៍ឲ្យដឹង ១១,៧ លានផោន ($១៥ លាន)។
កីឡាករ Tsimikas យល់ព្រមចុះកុងត្រាជាមួយ Liverpool ៥ ឆ្នាំ ហើយត្រូវបានរំពឹងថា ត្រៀមសម្រាប់ផ្ដល់ការគាំទ្រដល់ខ្សែការពារឆ្វេងជម្រើសដំបូង Andy Robertson នៅទឹកដី Anfield ខណៈការផ្ទេរកីឡាករវ័យ ២៤ ឆ្នាំនេះ កើតឡើង ក្រោយគ្រូបង្វឹករបស់ក្រុម លោក Jurgen Klopp សម្រេចមិនចំណាយតាមការទាមទាររបស់ក្រុមរួមលីក Norwich City សម្រាប់តម្លៃខ្លួនខ្សែការពារ Jamal Lewis។
ក្រោយក្លាយជាសមាជិកថ្មីដំបូងគេរបស់ក្រុមយក្សនៅអង់គ្លេសនេះ Tsimikas ប្រាប់វេបសាយរបស់ក្លិបថា៖ «ខ្ញុំសប្បាយចិត្ត និងមានមោទនភាពមែនទែន ដែលបានមកកាន់ទីនេះ។ សម្រាប់ខ្ញុំ នេះគឺក្លិបដ៏ធំបំផុតក្នុងលោក។ ខ្ញុំចូលចិត្តលីកនេះខ្លាំងណាស់។ ខ្ញុំបានមើលការប្រកួតរបស់លីកតាមទូរទស្សន៍ ហើយតែងតែមានសុបិនជានិច្ច តាំងពីក្មេងចង់មកលេងនៅលីកកំពូលនេះ»។
Tsimikas ដែលបានបង្ហាញវត្តមានជាមួយក្រុមជម្រើសជាតិក្រិក ៣ ដងដែរនោះ បានបន្ថែមថា៖ «ខ្ញុំចង់រួមចំណែកសម្រេចគោលដៅរបស់ក្លិប។ ចង់ឈ្នះពានលីកម្ដងទៀត ហើយក៏ឈ្នះពាន Champions League ផងដែរ»។
តាំងពីឆ្នាំ ២០១៥ មក ក្នុងនាមជាអ្នកលេងរបស់ក្រុម Olympiakos កីឡាករ Tsimikas បង្ហាញខ្លួនលើបាន ៨៦ លើក នៅគ្រប់ការប្រកួតក្នុងនោះធ្លាប់ចំណាយពេលផងដែរជាមួយក្រុមនៅដាណឺម៉ាក Esbjerg និងក្រុម Willem II របស់ហូឡង់ក្នុងលក្ខខណ្ឌខ្ចីជើង។ រដូវកាលដែលបញ្ចប់ទៅថ្មីៗនេះ គេចូលលេងបាន ២៧ ប្រកួត សម្រាប់លីកកំពូល ហើយឈ្នះពានធំជាលើកដំបូងក្នុងអាជីពរបស់ខ្លួនពេលក្រុម Olympiakos ក្លាយជាជើងឯកក្របខ័ណ្ឌទី ១ របស់ប្រទេសក្រិក។
ចំណែកលោកគ្រូបង្វឹក Klopp និយាយពាក់ព័ន្ធនឹងកីឡាករថ្មីរបស់ខ្លួនថា៖ «យើងបានតាមមើលកីឡាករ Tsimikas ជាយូរមកហើយ ហើយពិតជារីករាយណាស់ ដែលគេចូលរួមជាមួយយើង។ វាជាដំណឹងដ៏ល្អឥតខ្ចោះ មុនពេលយើងចាប់ផ្ដើមត្រឡប់ទៅធ្វើការប្រកួតជាមួយគ្នាឆាប់ៗនេះ»៕ AFP/VN
