ឡុងដ៍៖ អាចមិនគួរឱ្យជឿ តែវាបានកើតឡើងហើយ សម្រាប់ក្របខ័ណ្ឌ Premier League កាលពីយប់ថ្ងៃអាទិត្យ ដោយក្រុមយក្ស ២ នៅអង់គ្លេសចាញ់ក្រុមគូបដិបក្ខក្នុងលទ្ធផលគួរឱ្យភ្ញាក់ផ្អើល ក្នុងនោះក្រុមហង្សក្រហម Liverpool ងើបមុខមិនរួចដោយសារក្រុមម្ចាស់ផ្ទះ Aston Villa (Villa) ខណៈបិសាចក្រហម Manchester United ស្ងាត់មាត់ដោយសារ Tottenham Hotspur។
ហង្សក្រហមក្លាយជាក្រុមជើងឯកលីគកំពូលអង់គ្លេសដំបូងគេ ដែលរបូតគ្រាប់បាល់ដល់ទៅ ៧ គ្រាប់ សម្រាប់ប្រកួតក្នុងលីគ គិតតាំងពីឆ្នាំ ១៩៥៣ ក្រោយចាញ់ក្រុម Villa ដែលស្ទើរតែធ្លាក់ទៅលីគកម្រិតទី២ នារដូវកាលមុន ជាមួយនឹងពិន្ទុ ៧-២ ហើយលទ្ធផលនេះ បានធ្វើឱ្យគ្រូបង្វឹកលោក Jurgen Klopp ស្រឡាំងកាំងរកនិយាយអ្វីមិនត្រូវ។
លោក Klopp បាននិយាយថា៖ «ជារឿងនឹកស្មានមិនដល់តែវាបានកើតឡើងហើយនៅយប់នេះ។ យើងបានបង្កើតរឿងឥតប្រយោជន៍ និងកំហុសគ្រប់យ៉ាងនៅក្នុងប្រកួត ១ នេះ។ សង្ឃឹមថា យើងនឹងមិនជួបរឿងហ្នឹងម្ដងទៀតទេ ហើយយើងនឹងចាប់ប្រសើរឡើងវិញឆាប់ៗ»។
៧ គ្រាប់ របស់ក្រុម Villa បានមកដោយសារខ្សែប្រយុទ្ធ Ollie Watkins ចំនួន ៣ គ្រាប់ ខ្សែបម្រើ ២ រូប គឺ John McGinn និង Ross Barkley ម្នាក់ ១ គ្រាប់ ព្រមទាំងខ្សែបម្រើ Jack Grealish ២ គ្រាប់ ខណៈកីឡាករ Mohamed Salah ជាអ្នកស៊ុតបញ្ចូលទីម្នាក់ឯងសម្រាប់ ២ គ្រាប់របស់ក្រុមភ្ញៀវ។
ពាក់ព័ន្ធនឹងគ្រាប់បាល់ដំបូង ដែលបានកើតឡើងដោយសារកំហុសរបស់អ្នកចាំទី Adrian លោក Klopp បន្ថែមថា៖ «គ្រាប់បាល់ទី១ នោះ មិនគួរកើតឡើងសោះ។ Adrian បានបង្កើតកំហុស តែយើងធ្លាប់របូតគ្រាប់បាល់បែបហ្នឹងដែរ កាលពីមុន។ ក្រោយពីនោះ យើងបាត់បង់ប្រព័ន្ធលេងអស់»។
ដូចគ្នាដែរ Man Utd បានរងនូវបរាជ័យដ៏សែនអាម៉ាស់ម្ដងទៀត រយៈពេល ៩ ឆ្នាំ ក្រោយត្រូវក្រុម Spurs លត់ ៦-១ ខណៈលទ្ធផលនេះ ធ្វើឱ្យក្រុមបិសាចក្រហមធ្លាក់ចូលទៅក្នុងវិបត្តិដដែលៗ ដែលលោក Ole Gunnar Solskjaer ព្យាយាមដោះស្រាយចាប់តាំងពីចូលមកដឹកនាំនៅចុងឆ្នាំ ២០១៨។
ទោះជាខ្សែបម្រើ Bruno Fernandes បានស៊ុតបាល់ប៉េណាល់ទីសម្រេចជួយឱ្យក្រុមម្ចាស់ផ្ទះនាំមុខយ៉ាងលឿននៅនាទីទី២ ក៏ដោយ ក៏មិនអាចជួយឱ្យក្រុម Man Utd មានប្រៀបបានដែរ ពិសេសពេលត្រូវក្រុមរបស់អតីតគ្រូបង្វឹក លោក Jose Mourinho បំប៉ោងសំណាញ់ទី ២ គ្រាប់ផ្ទួនៗ នៅ ៥ នាទីបន្ទាប់ ដោយ Tanguy Ndombele និង Heung-Min Son ស្ថានការណ៍ហាក់ចាប់ផ្ដើមយ៉ាប់ទៅៗ។
កាន់តែអាក្រក់ទៀតនោះ ពេលខ្សែប្រយុទ្ធ Anthony Martial ត្រូវបណ្ដេញចេញ នៅនាទីទី២៨ ខណៈ Spurs ក៏មិនបណ្ដោយឱ្យឱកាស ដែលខ្លួនមានសមាជិកលើសនេះកន្លងទៅដោយអសារបង់ឡើយ។ Harry Kane បានបន្ថែមការនាំមុខ ៣-១ មុននឹង Son រកឃើញគ្រាប់ទី ២ ហើយ Serge Aurier រួមចំណែក ១ គ្រាប់ ហើយចុងក្រោយ Kane ធ្វើបានសម្រេចគ្រាប់ទី ២ ដោយបាល់ប៉េណាល់ទី ដូច្នេះលទ្ធផលផ្លូវការ ក្រុម Man Utd ចាញ់ Spurs ៦-១។
Man Utd មិនបានកា្លយជាក្រុមប្រជែងពានតាំងពីអតីតគ្រូបង្វឹកឆ្នើមលោក Alex Ferguson ចូលនិវត្តន៍ក្នុងឆ្នាំ ២០១៣ ហើយក្រោយទទួលបាននូវលទ្ធផលនេះបង្ហាញថា ក្រុមនេះក៏នៅមិនទាន់មានលទ្ធភាពគ្រប់គ្រាន់ ដើម្បីប្រកួតប្រជែងជាមួយក្រុមលំដាប់កំពូលៗ ដូចជា Liverpool និង Manchester City ដដែល។
រីឯក្រុម Leicester ក៏ភ្លាត់ស្នៀតចាញ់ក្រុមភ្ញៀវ West Ham ៣-០ ដែរ ដែលនេះមានន័យថា នៅលីគកំពូលអង់គ្លេសត្រឹមសប្ដាហ៍ទី៤ នេះ មានតែក្រុម Everton ដែលកំពុងឈរទីកំពូលតារាង និងក្រុមលេខ ២ Villa ប៉ុណ្ណោះ ដែលមិនទាន់ប្រកួតចាញ់៕ AFP/VN