ភ្នំពេញ: សហព័ន្ធកីឡាខ្មែរកីឡា បានរៀបចំពិធីប្រកាសដំឡើងខ្សែក្រវាត់ដល់កីឡាករកីឡាការិនីដែលបានហ្វឹកហាត់ជាប្រចាំអស់រយៈពេលពី ៣ ខែដល់ ១៤ ខែ កាលពីល្ងាចថ្ងៃអាទិត្យ ទី ១២ ខែវិច្ឆិកា ឆ្នាំ ២០១៨ នៅទីស្នាក់ការបណ្តោះអាសន្នរបស់សហព័ន្ធខ្មែរកីឡាហាប់គីដូ ក្នុងអង្គភាពកីឡាក្រសួងមហាផ្ទៃនៃ ពហុកីឡដ្ឋានជាតិអូឡាំពិកកម្ពុជា។
លោកគង់ ចាន់ធីណា អគ្គលេខាធិការសហព័ន្ធខ្មែរកីឡាហាប់គីដូ បានមានប្រសាសន៍ថា៖ «ការប្រឡងខ្សែក្រវាត់ប្រគល់សញ្ញាបត្រ និងលិខិតបញ្ជាក់លើកនេះមានកីឡាករកីឡាការិនីសរុបចំនួន ២៦ នាក់ ក្នុងនោះមានស្រីចំនួន ៦ នាក់ ដែលយើងបែងចែកជា ៣ កម្រិតគឺខ្សែក្រវាត់ពណ៌សឆ្នូត ចំនួន ៩ នាក់ ក្នុងនោះមានកីឡាការិនីម្នាក់»។
លោកបានប្រាប់បន្តថា៖ «ការប្រគល់ជូនសញ្ញាបត្រដល់កីឡាករកីឡាការិនី ៣ នាក់ ក្នុងនោះមានកីឡាការិនីម្នាក់់ទទួលបានខ្សែក្រវាត់ពណ៌ត្នោត និងទទួលលិខិតបញ្ជាក់ចំនួន ១៤ នាក់ក្នុងនោះមានកីឡាការិនី ៥ នាក់ ដែលជាប្រភេទខ្សែក្រវាត់ពណ៌បៃតង»។
លោកគង់ ចាន់ធីណា បានប្រាប់បន្ថែមថា៖ «ខ្ញុំសូមអបអរសាទរដល់ការយកចិត្តទុកដាក់ព្យាយាមហ្វឹកហាត់របស់កីឡាករកីឡាការនី ទាំងអស់ដែលតែងតែឆ្លៀតពេលពីការសិក្សា ឬការងារដើម្បីហ្វឹកហាត់កីឡា ដើម្បីសុខភាពរាងកាយ និងស្នៀត ឬក្បាច់គុនការពារខ្លួន ហើយក៏ជាឱកាសមួយដែលយុវវ័យត្រូវតែភ្ជាប់ខ្លួនជាមួយកីឡា ដើម្បីអប់រំកាយ និងចំណេះដឹងក្នុងសម័យវិទ្យាសាស្ត្រទំនើបដែលមានកីឡា និងការអប់រំ»។
លោកបានបន្ថែមថា៖ «ចំណោមកីឡាករ និងកីឡាការិនីទាំង ២៦ នាក់នោះមានមកពីក្លិបហាប់គីដូឥន្ទ្រី ក្លិបម៉ាស្ទ័រសេង និងក្លិបអូឡាំពិក»។
ជាមួយគ្នានេះដែរ លោកបានរំឭកពីការលំបាកកន្លងមករបស់កីឡាហាប់គីដូហាត់ នៅទីលានសាធារណៈហាលវាលជាង ១០ ឆ្នាំហើយមុននឹងទទួលបានទីលានហាត់ល្អត្រឹមត្រូវ ក្រោយការបង្កើតបានអង្គភាពកីឡានគរបាលជាតិ ដែលមានលោកជា ប៊ុនហេង ជាប្រធាន បានផ្តល់ឲ្យនូវទីតាំងហ្វឹកហាត់សម្រាប់ហាប់គីដូដូចបច្ចុប្បន្ន និងទទួលបានសិស្សចូលហ្វឹកហាត់ច្រើន និងមានការរីកចម្រើនគួរឲ្យកត់សម្គាល់។
លោកម៉ក់ សំអុល ប្រធានសមាគមកីឡាប្រយុទ្ធក្រសួងមហាផ្ទៃ និងជាប្រធានសហព័ន្ធកីឡាខ្មែរហាប់គីដូផងនោះ មានប្រសាសន៍ថា៖ «សហព័ន្ធកីឡាហាប់គីដូទទួលបានលទ្ធផលសព្វថ្ងៃនោះដោយយើងមានអ្នកគ្រប់គ្រងបន្តវេនដោយមានលោកគង់ ចាន់ធីណា ជាអគ្គលេខាធិការពីលោកគ្រូតាសាន គឹមស៊ាន និងលោកគ្រូសេង ប៊ុនសុង»។
លោកបានបន្ថែមទៀតថា៖ «ខ្ញុំជាប្រធាន ខ្ញុំគ្រាន់តែធ្វើការគ្រប់គ្រងពីលើតែប៉ុណ្ណោះ ប៉ុន្តែ បច្ចេកទេស និងការហ្វឹកហាត់ផ្ទាល់គឺជាតួនាទីរបស់អគ្គលេខាធិការនេះតែម្តង ដែលជាសសរទ្រូងនៃកីឡាហាប់គីដូ»៕