.jpg)
សកម្មភាពប្រកួតកីឡាហុកគីរបស់ក្រុមកីឡាការិនីជម្រើសជាតិកម្ពុជា (ស្តាំ) កន្លងមក ហើយលើកនេះពួកគេ នឹងទៅស៊ីហ្គេម។ សហការី
ភ្នំពេញ៖ គ្រូបង្វឹកជម្រើសជាតិហុកគីកម្ពុជា ដែលមានសញ្ជាតិប៉ាគីស្ថាន លោក ណារ៉ា បានអះអាងថា ការប្រកួតស៊ីហ្គេមនៅប្រទេស ហ្វីលីពីន ចុងខែ វិច្ឆិកា និងដើមខែ ធ្នូ ឆ្នាំ ២០១៩ នេះ កីឡាហុកគីកម្ពុជានឹងបង្កភាពភ្ញាល់ផ្អើល គឺយើងសង្ឃឹម និងធានាមុតមាំថា ក្រុមកីឡាការិនីជម្រើសជាតិកម្ពុជាចំនួន ១២ នាក់ នឹងឈ្នះបានមេដាយណាមួយ ជូនជាតិជាមិនខាន បើទោះបីជាកីឡាហុកគី ទើបតែបានចូលរួមជាថ្មី ក្រោយបានបង្ហាញវត្តមានឯស៊ីហ្គេមតាំងពីឆ្នាំ ២០១៣ នៅប្រទេស មីយ៉ាន់ម៉ា ក៏ដោយ។
លោក ណារ៉ា ដែលបានភ្ជាប់ខ្លួន ជានិច្ចជាមួយកីឡាហុកគីអស់រយៈពេលជាង ១៥ ឆ្នាំ និងធ្លាប់ដឹកនាំកីឡាប្រភេទនេះបានអះអាងថា៖ «កីឡាហុកគីរបស់កម្ពុជាមានកម្រិតប្រកួតប្រជែងជាមួយប្រទេស ថៃ ហ្វីលីពីន និងម៉ាឡេស៊ី ក្នុងលក្ខណៈប្រហាក់ប្រហែល ឬក្រោមគេតែបន្តិចប៉ុណ្ណោះ ហើយក៏មានបច្ចេកទេស មានប្រៀបលើប្រទេស សិង្ហបុរី និងឥណ្ឌូនេស៊ីផងដែរ ប៉ុន្តែលទ្ធផលវាស៊ីសងការហ្វឹកហាត់បន្ថែម និងការប្រឹងប្រែងពេលប្រកួត។ ការហ៊ានអះអាងបែបនេះ ដោយសារយើងធ្លាប់ចូលប្រកួតលក្ខណៈអន្តរជាតិជាច្រើនព្រឹត្តិការណ៍ និងបានដឹងពីសមត្ថភាព ពិសេសយើងត្រៀមហ្វឹកហាត់ល្អនៅប្រទេស ថៃ»។
តាមលោក ណារ៉ា បានឲ្យដឹងថា ការប្រកួតស៊ីហ្គេមលើប្រភេទកីឡាហុកគីនេះ គឺមានតែ ៦ ប្រទេសប៉ុណ្ណោះចូលរួម គឺម៉ាឡេស៊ី ថៃ សិង្ហបុរី ហ្វីលីពីន ឥណ្ឌូនេស៊ី និងកម្ពុជា។ ជាមួយគ្នានេះ លោក វ៉ាត់ ចំរើន ប្រធានសហព័ន្ធកីឡាហុកគីកម្ពុជា ក៏គ្រោងនឹងបញ្ជូនក្រុមកីឡាការិនីជម្រើសជាតិហុកគី ទៅហ្វឹកហាត់នៅ ប្រទេស ថៃ ដើម្បីត្រៀមការប្រកួតស៊ីហ្គេមលើកនេះផងដែរ។
លោក វ៉ាត់ ចំរើន ដែលជាអគ្គលេខាធិការ NOCC ផងនោះ បានថ្លែងប្រាប់ថា៖ ក្រុមកីឡាការិនីជម្រើសជាតិហុកគីកម្ពុជា គ្រោងបោះជំរុំហ្វឹកហាត់រយៈពេលជាង ២ ខែ នៅឯប្រទេស ថៃ ដើម្បីពង្រឹងសមត្ថភាពត្រៀមចូលរួមការប្រកួតស៊ីហ្គេម លើកទី៣០ នៅប្រទេស ហ្វីលីពីន នាចុងឆ្នាំ ២០១៩ ខណៈថ្នាក់ដឹកនាំសហព័ន្ធ និងកីឡាការិនីចំនួន ១២ នាក់បានសម្រួចហ្វឹកហាត់ជាប្រចាំយ៉ាងសកម្មនៅក្នុងស្រុកនាបច្ចុប្បន្ននេះ»។
ប្រធានសហព័ន្ធកីឡាហុកគីកម្ពុជារូបនេះបានបញ្ជាក់ថា៖ «ឆ្នាំ ២០១៩នេះ សហព័ន្ធបានត្រៀមក្រុមកីឡាការិនី ១ ក្រុម សម្រាប់ចូលរួមប្រកួតស៊ីហ្គេម ហើយពួកគេក៏បានត្រៀមខ្លួនយ៉ាងល្អផងដែរ ដើម្បីកំណត់យកមេដាយ ហើយការចេញទៅហ្វឹកហាត់នៅថៃ វានឹងជួយឲ្យបច្ចេកទេសរបស់កីឡាការិនីម្នាក់ៗកាន់តែល្អប្រសើរ។ មិនតែប៉ុណ្ណោះ នៅឆ្នាំនេះ យើងក៏មានការចូលរួមពីកីឡាការិនីកូនខ្មែរនៅក្រៅប្រទេសផងដែរ»។
កញ្ញា ស្រី នីម និងកញ្ញា នីកា ជាសមាជិកក្រុមជម្រើសជាតិហុកគីកម្ពុជាបានបញ្ជាក់ដែរថា៖ «ទោះបីជា កីឡាហុកគី មិនសូវមានការពេញនិយម ឬមានការប្រកួតច្រើនក្នុងស្រុកក៏ពិតមែន ប៉ុន្តែពួកខ្ញុំធ្លាប់ចេញប្រកួតញឹកញាប់នៅថៃ និងបានព្យាយាមហ្វឹកហាត់ជានិច្ច»។
គួរបញ្ជាក់ថា កីឡាហុកគី គឺជាប្រភេទកីឡា ១ ប្រភេទ ក្នុងចំណោមកីឡាចំនួន ៣០ ប្រភេទ ដែលកម្ពុជាត្រៀមបញ្ជូនទៅចូលរួមប្រកួតប្រជែងដណ្តើមមេដាយក្នុងព្រឹត្តិការណ៍កីឡាស៊ីហ្គេមនៅហ្វីលីពីន ដែលនឹងធ្វើឡើងចាប់ពីថ្ងៃទី ៣០ ខែ វិច្ឆិកា រហូតដល់ថ្ងៃទី ១១ ខែ ធ្នូ ឆ្នាំ ២០១៩ ខាងមុខនេះ៕
