ភ្នំពេញ: ដោយមានឈាមជ័រ ជាអ្នកកីឡាករបន្តពីឪពុក និងមានបងប្អូនជាអ្នកកីឡាទាំងអស់ អតីតកីឡាករជម្រើសជាតិបាល់ទាត់ លោក ហុក សុចិត្រា បានហែលឆ្លងការលំបាករាប់មិនអស់ ក្នុងការវិវឌ្ឍខ្លួនពីកីឡាករ មកជាគ្រូបង្វឹក និងបន្តឈានទៅធ្វើជាអ្នកចាត់ការទូទៅ ដោយបានដឹកនាំក្លិបចំណូលថ្មីមួយ ក្នុងលីកកំពូលកម្ពុជា ឆ្នាំ ២០១៨ គឺវិសាខា ឲ្យទទួលបានលេខ ៣ ដ៏គួរឲ្យភ្ញាក់ផ្អើល ប៉ុន្តែទម្រាំរកឃើញភាពជោគជ័យនេះ លោកបានចំណាយពេលជិត ២០ ឆ្នាំឯណោះ។
ក្រៅពីបទពិសោធ ជាកីឡាករឆ្នើមអស់រយៈពេល ១៥ ឆ្នាំ និងជាអ្នកគ្រប់គ្រងក្លិបឯកជន និងក្រុមជម្រើសជាតិកម្ពុជានោះ លោក ហុក សុចិត្រា ក៏ជាមន្ត្រីនគរបាលជាតិ នៅរាជធានីភ្នំពេញផ្នែកព្រហ្មទណ្ឌ ផងដែរ ហើយនៅក្នុងបទពិសោធនោះ លោក សុចិត្រា ធ្លាប់ជួបការលំបាក និងបានដើរចេញពីបាល់ទាត់មួយរយៈហើយ ដោយ ទើបតែវិលមកចូលរួមបង្កើតក្លិបវិសាខា កាលពីឆ្នាំ ២០១៧ ជាមួយប្អូនប្រុសបង្កើតរបស់លោកគឺលោក ហុក សុជីវ័ន ដែលជាគ្រូបង្វឹក។
ជុំវិញអាជីពជាអ្នកចាត់ការទូទៅនៅក្នុងក្លិបវិសាខានេះ លោក ហុក សុចិត្រា បានប្រាប់ភ្នំពេញប៉ុស្តិ៍ថា៖ «ជំនាញ ឬការបណ្តុះបណ្តាលលេងបាល់ទាត់ឲ្យបានជោគជ័យ វាជាការលំបាកខ្លាំងណាស់ ព្រោះទី ១ យើងត្រូវស្គាល់អំពីសុខទុក្ខ និងជីវភាពរបស់កីឡាករក្នុងក្រុម ទី ២ ត្រូវគ្រប់គ្រងអនុវត្តឲ្យម៉ឺងមាត់ ចំពោះវិន័យ បទបញ្ជា ហើយទី ៣ ផ្តល់ជូនការហ្វឹកហាត់តាមលក្ខណៈទំនើប និងអភិវឌ្ឍឲ្យទាន់សម័យព្រមទាំងការប្រមូលផ្តុំ គ្រប់គ្រងផ្ទាល់ឲ្យបានណែនក្នុងដៃ និងផ្តល់តម្លៃការឧបត្ថម្ភប្រចាំខែ ដល់កីឡាករឲ្យបានសមរម្យ ទើបពួកគេមានអារម្មណ៍មូល»។
រចនាសម្ព័ន្ធគ្រប់គ្រង នៅក្នុងក្លិបវិសាខា គឺមានគ្រូបង្វឹក និងគ្រូជំនាញ តាមផ្នែកសរុប ៧ នាក់ ព្រមទាំងមន្ត្រីបច្ចេកទេស និងមន្ត្រីព័ត៌មានមួយចំនួនទៀត។ លោក សុចិត្រា បាននិយាយថា៖ «បច្ចុប្បន្ន ក្លិបវិសាខា មានកីឡាករអាយុក្រោម ១៧ ឆ្នាំ ចំនួន ២៥ នាក់ កំពុងបណ្តុះបណ្តាលជាថ្នាលសម្រាប់អនាគត ហើយក្រុមធំ ចំនួន ២៥ នាក់ ក្នុងនោះមានកីឡាករបរទេស ៥ នាក់ កំពុងហ្វឹកហាត់ជាអចិន្ដ្រៃយ៍ នៅទីលានផ្ទាល់របស់ក្លិប ដែលមានទីតាំងនៅបុរី ហ្រ្គេនភ្នំពេញ។
លោក សុចិត្រា បានបន្តថា៖ «អ្វីដែលធ្វើឲ្យបាល់ទាត់ខ្លាំង និងទទួលបានលទ្ធផលល្អ ក្រៅពីថវិកាទ្រទ្រង់គ្រប់គ្រាន់ គឺយើងត្រូវដឹង និងដោះស្រាយពីសេចក្តីត្រូវការរបស់កីឡាករ ម្នាក់ៗ ដើម្បីធ្វើឲ្យពួកគេមានអារម្មណ៍មូលល្អ គឺផ្តោតទៅលើការហ្វឹកហាត់ និងប្រកួតតាមបច្ចេកទេសតែ ១ មុខ»។
បុរសវ័យ ៤០ ឆ្នាំ និងមានកម្ពស់ ១,៨០ ម៉ែត្រ លោក សុចិត្រា មាននិស្ស័យ និងចំណង់ចំណូលចិត្តលេងបាល់ទាត់ តាំងពីកុមារភាព តាមរយៈឪពុករបស់លោក គឺព្រឹទ្ធាចារ្យមានជំនាញទាំងកីឡាហាប់គីដូ ល្បុក្កតោ វ៉ូវីណាម និងកីឡាចំបាប់ លោក ហុក ឈាងគីម ដែលមានអាយុ ៧៥ ឆ្នាំទៅហើយ ហើយកូនរបស់លោកទាំង ៤ នាក់ សុទ្ធសឹងតែជាអ្នកនិយមចូលចិត្តកីឡា។
លោក ហុក សុចិត្រា បានបន្ថែមថា៖ «គ្រូបង្វឹកបាល់ទាត់ ដែលមានស្តង់ដារអន្តរជាតិ ទៅតាមផ្នែកផ្សេងៗនោះ មានខ្ទង់ ២០ នាក់ ប៉ុន្តែមានលុយច្រើន មិនប្រាកដថា អាចបើកក្លិបបាល់ទាត់ ឲ្យទទួលបានជោគជ័យនោះទេ។ កត្តាសំខាន់ យើងត្រូវស្គាល់ពីតម្រូវការនៃបាល់ទាត់ ស្គាល់ទីផ្សារនៃបាល់ទាត់ និងស្គាល់ពីជំនាញបាល់ទាត់ ទើបធ្វើជាអ្នកចាត់ការទូទៅ មានប្រសិទ្ធភាព»៕