.jpg)
កីឡាករ ហេង ចំណាន បានបង្ហាញពានដែលគេទើបដណ្តើមបាននៅចិន។ សហការី
ភ្នំពេញៈ កីឡាករឆ្នើមរបស់កម្ពុជា ហេង ចំណាន បានឈ្នះតំណែងជើងឯកពីការប្រកួតកីឡាអុកចិននៃព្រឹត្តិការណ៍អន្តរជាតិឈ្មោះថា «the Belt and Road» the Second «Lingyun Baihao Tea Cup» Chess International លើកទី ២ នៅខេត្តក្វាងស៊ី ប្រទេសចិន ហើយរូបគេទើបបានវិលមកដល់មាតុប្រទេសវិញកាលពីម្សិលមិញ ដោយនាំមកនូវជ័យជម្នះជូនជាតិ សហព័ន្ធ និងមោទនភាពរបស់ខ្លួនគេផ្ទាល់។
ហេង ចំណាន បានប្រាប់ភ្នំពេញ-ប៉ុស្តិ៍កាលពីម្សិលមិញថា៖ «ការប្រកួតនេះមាន ៥ ប្រទេសចូលរួមមានម៉ាឡេស៊ី មីយ៉ាន់ម៉ា អាល្លឺម៉ង់ រុស្ស៊ី និងបេឡារុស នៅការប្រកួតជាមួយកីឡាករមកពី ៥ ប្រទេសដោយក្នុង ១ ប្រទេសលេង ២ ក្តារស្មើនឹង ១០ ប្រកួតនោះគឺខ្ញុំឈ្នះចំនួន ៩ ប្រកួត និងចាញ់ ១ ប្រកួត។ សរុបពិន្ទុគឺខ្ញុំទទួលបានចំណាត់ថា្នក់លេខ ១ និងជាជើងឯកប្រចាំព្រឹត្តិការណ៍នោះតែម្តងដែលធ្វើឲ្យខ្ញុំទទួលបានពានអមដោយទឹកប្រាក់ចំនួន ៥០០០ យន់ (លុយចិន) ប្រហែល ៧៤២ ដុល្លារអាមេរិក»។
កីឡាករអុករបស់កម្ពុជារូបនេះបានធ្វើដំណើរទៅចូលរួមការប្រកួតកីឡាអុកចិនអន្តរជាតិលើកទី ២ កាលពីថ្ងៃទី ២៤ ខែមេសាហើយរូបគេបានចូលប្រកួតពីថ្ងៃទី ២៥ រហូតដល់ថ្ងៃទី ២៩ ខែមេសា ឆ្នាំ ២០១៩ និងទើបតែត្រឡប់មកដល់កម្ពុជាវិញកាលពីម្សិលមិញ។ ហេង ចំណាន បានរំឭកថា៖ «កាលប្រកួតលើកទី ១ ខ្ញុំមិនបានចូលរួមទេគឺខ្ញុំទើបតែបានចូលរួមឆ្នាំ ២០១៩ នេះតាមការអញ្ជើញរបស់ប្រទេសចិន ប៉ុន្តែកាលពីឆ្នាំ ២០១៨ ខ្ញុំបានឈ្នះជើងឯកការប្រកួតមួយឈ្មោះថា Champion In Rapid Xianggi International Invitational Tournament»។
ជាមួយការឈ្នះជើងឯកពីការប្រកួតកីឡាអុកចិនទាំង ២ ព្រឹត្តិការណ៍នេះ បានធ្វើឲ្យ ហេង ចំណាន ហាក់មានមោទនភាពចំពោះខ្លួនឯងខ្លាំងដោយបាននិយាយថា៖ «លក្ខណពិសេសនៃការប្រកួតអុកចិនរបស់ខ្ញុំនៅក្នុងតំបន់ ទ្វីបអាស៊ី ឬពិភពលោកពិតជាលំបាកឈ្នះខ្ញុំណាស់ ព្រោះការហ្វឹកហាត់ជាប្រចាំនៅពេលទំនេរពីការងារដោយខ្ញុំមានគ្រូបង្វឹកជាជនជាតិចិន និងហាត់តាមប្រព័ន្ធកុំព្យូទ័រជានិច្ច»។
តាមប្រវត្តិប្រកួតរបស់ ហេង ចំណាន ទទួលបានលទ្ធផលល្អណាស់គឺនៅឆ្នាំ ២០១៧ កីឡាកររូបនេះធ្លាប់ទៅចូលរួមប្រកួតក្នុងចំណោមប្រទេសចំនួន ២០ និងដណ្តើមបានចំណាត់ថ្នាក់លេខ ៣ ហើយការចេញទៅប្រកួតជាលើកទី ២ នៅឆ្នាំ ២០១៨ ហេង ចំណាន ដណ្តើមបានចំណាត់ថ្នាក់លេខ ១។
លោកឧកញ៉ា លី ហួត ប្រធានសហព័ន្ធកីឡាអុកអន្តរជាតិកម្ពុជាបានថ្លែងប្រាប់ភ្នំពេញ ប៉ុស្តិ៍ កាលពីម្សិលមិញថា៖ «ខ្ញុំមានការរំភើបខ្លាំង ខណៈដែលការរំពឹងរបស់ ចំណាន ឈ្នះគឺសម្រេចបំណង។ ខ្ញុំបានយកចិត្តទុកដាក់ជួយបណ្តុះបណ្តាល ចំណាន តាំងពីយូរហើយ ពិសេសគ្រប់ការបញ្ជូនទៅប្រកួត ខ្ញុំជាអ្នករ៉ាប់រងទាំងអស់»។
គួរបញ្ជាក់ថា ហេង ចំណាន កើតក្នុងឆ្នាំ ១៩៨៧ នៅរាជធានីភ្នំពេញ ហើយបច្ចុប្បន្នគេជាមន្ត្រីរាជការនៅអាជ្ញាធរទន្លេសាបផ្នែកស្រាវជ្រាវ ជំនាញភាសាចិន និងអង់គ្លេស។ ចំណាន ចេះលេងអុកនៅឆ្នាំ ២០០២ ហើយឆ្នាំ ២០០៨ គេមានភាពល្បី និងត្រូវបានលោក លី ហួត ហៅមកចូលជម្រើសជាតិដោយអញ្ជើញគ្រូជំនាញកីឡាអុកពីចិន និងរុស្ស៊ីមកបង្វឹក។ ប៉ុន្តែ ចំណាន បានចេញទៅប្រកួតក្នុងក្របខ័ណ្ឌសហព័ន្ធជាលក្ខណៈឯកជនប៉ុណ្ណោះដោយទទួលបានលទ្ធផលល្អ គួរឲ្យកត់សម្គាល់ ហើយកាលពីឆ្នាំ ២០១៤ ហេង ចំណាន បានជាប់ជាអាជ្ញាកណ្តាលអុកចត្រង្គពានរង្វាន់សម្តេច ហ៊ុន សែន នៅអង្គរ និងទទួលបានការលើកទឹកចិត្តនូវថវិកាពីលោក ហ៊ុន សែន ផងដែរ៕
