ភ្នំពេញ៖ ផ្តើមចេញពីត្រកូលជាអ្នកហែលទឹក ហែម ថុនពន្លឺ បានចូលហ្វឹកហាត់កីឡាហែលទឹក តាមលោកឪពុក និងបងៗរបស់ខ្លួន តាំងពីអាយុ ៨ ឆ្នាំហើយតាមរយៈការខិតខំ ដោយមានឈាមជ័រជាអ្នកហែលទឹកស្រាប់នោះ ពន្លឺ បានវិវឌ្ឍខ្លួនយ៉ាងល្អ ដើម្បីជាប់ជាកីឡាករជម្រើសជាតិ និងចេញទៅប្រកួតនៅលើឆាកអន្តរជាតិ ជាបន្តបន្ទាប់ មុននឹងសម្រេចបញ្ចប់អាជីពជាកីឡាករ និងឈានមកធ្វើជាគ្រូបង្វឹករហូតមកដល់ពេលនេះ។
លោក ហែម ថុនពន្លឺ បានក្លាយជាគ្រូបង្វឹកជម្រើសជាតិហែលទឹកតាំងពីឆ្នាំ ២០១៨ បន្ទាប់ពីរូបគេបានជាប់ជាកីឡាករជម្រើសជាតិអស់រយៈពេលជិត ២០ ឆ្នាំ ហើយនៅមុនទទួលបានងារជាគ្រូធំ ប្រចាំក្រុមថ្នាលជម្រើសជាតិក្នុងឆ្នាំ ២០១៨ នោះ ពន្លឺ ឆ្លងកាត់វគ្គ និងការបណ្តុះបណ្តាលជំនាញនេះបានច្រើន ព្រមទាំងជាគ្រូកីឡាប្រចាំអនុវិទ្យាល័យពោធិ៍ចិនតុងផងដែរ។
ហែម ថុនពន្លឺ បានប្រាប់ថា៖ «ខ្ញុំធំដឹងក្តី គឺលោកប៉ា (ព្រឹទ្ធាចារ្យ ហែម ថុន) ឱ្យហាត់កីឡាហែលទឹកនៅត្រឹម ៨ ឆ្នាំ ក្នុងឆ្នាំ ១៩៩៨ ហើយខ្ញុំបានជាប់ជាកីឡាករជម្រើសជាតិក្នុងឆ្នាំ ២០០៦ និងមានឱកាសបានទៅចូលរួមប្រកួតតំណាងឱ្យកម្ពុជាក្នុងព្រឹត្តិការណ៍ស៊ីហ្គេមលើកដំបូងក្នុងឆ្នាំ ២០០៧ នៅបាងកក ប្រទេសថៃហើយក៏បានចេញទៅប្រកួតនៅលើឆាកអន្តរជាតិជាបន្តបន្ទាប់ទៀត រហូតដល់ខ្ញុំឈប់ពីជម្រើសជាតិក្នុងឆ្នាំ ២០១៧»។
ហែម ថុនពន្លឺ បានបន្តថា៖ «អ្វីដែលខ្ញុំចងចាំបាន និងមានមោទនភាព គឺការប្រកួតក្នុងកីឡាអូឡាំពិកនៅប្រទេសចិន ក្នុងឆ្នាំ ២០០៨ និងប្រទេសអង់គ្លេស ក្នុងឆ្នាំ ២០១២។ យ៉ាងណាក៏ដោយ នៅរាល់ការប្រកួតនៅលើឆាកអន្តរជាតិ ទាំងលក្ខណៈហ្គេម ក៏ដូចជាជើងឯក គឺខ្ញុំមិនទទួលបានចំណាត់ថ្នាក់មេដាយ ឬជយលាភីអ្វីនោះទេ ព្រោះសមត្ថភាពអត្តពលិកនៅបរទេស ល្អជាងយើងឆ្ងាយ គឺយើងតាមមិនទាន់ទេ ប៉ុន្តែខ្ញុំធ្លាប់បានចូលដល់វគ្គជម្រុះចុងក្រោយដែរ។ ចំណែកមេដាយក្នុងប្រទេសវិញ ខ្ញុំឈ្នះមេដាយមាសរហូត គឺរាល់ឆ្នាំ និងរាល់ព្រឹត្តិការណ៍ប្រកួតថ្នាក់ជាតិ»។
ទាក់ទងទៅនឹងការសិក្សាចំណេះដឹងទូទៅវិញ ហែម ថុនពន្លឺ បានប្រឡងជាប់បាក់ឌុប ក្នុងឆ្នាំ ២០០៨ និងចេះប្រើប្រាស់ភាសារអង់គ្លេសបានកម្រិតបង្គួរ។ នៅឆ្នាំ ២០០៩ គេបានចូលរៀននៅវិទ្យាស្ថានកីឡាជាគ្រូអប់រំកាយ និងកីឡាហើយទទួលបានក្របខ័ណ្ឌរបស់ក្រសួងអប់រំ យុវជន និងកីឡាចាប់តាំងពីពេលនោះមក ហើយលោកជាគ្រូអប់រំកាយ និងកីឡាប្រចាំឱ្យអនុវិទ្យាល័យពោធិ៍ចិនតុងរាជធានីភ្នំពេញ មុនទទួលបានការងារជាគ្រូជម្រើសជាតិកីឡាហែលទឹកនៅឆ្នាំ ២០១៨។
នៅក្នុងតួនាទីជាគ្រូជម្រើសជាតិហែលទឹក ហែម ថុនពន្លឺ បាននិយាយថា៖ «ខ្ញុំជាអ្នកកាន់កម្មវិធីហ្វឹកហាត់ ដោយក្នុងនោះមានកម្មវិធីហាត់សម្រាប់ ៣ កម្រិតគឺកម្រិត A (អ្នកមានសមត្ថភាពខ្ពស់ជាង) កម្រិត B (កម្រិតមធ្យម) និងកម្រិត C ឬកម្រិតក្រោមមធ្យម»។
គ្រូបង្វឹកវ័យ ៣៥ ឆ្នាំរូបនេះបានបន្ថែមថា៖ «កាលពីឆ្នាំមុន ខ្ញុំជាគ្រូធំនៃក្រុមថ្នាល ប៉ុន្តែឆ្នាំ ២០២១ នេះ គេច្របាច់បញ្ចូលគ្នា ដោយគ្មានក្រុមថ្នាល ឬក្រុមធំជម្រើសជាតិនោះទេ គឺក្រុមជម្រើសជាតិតែមួយ ដោយខ្ញុំជាគ្រូជំនួយ ហើយថ្នាក់ដឹកនាំសហព័ន្ធខ្មែរកីឡាហែលទឹកកំពុងមានផែនការយុទ្ធសាស្ត្រ ដើម្បីស្វែងរកមេដាយឱ្យបានក្នុងការប្រកួតស៊ីហ្គេមក្នុងពេលឆាប់ៗចាប់ពីឆ្នាំ ២០២១ នេះទៅ»។
យ៉ាងណាក៏ដោយ ជាមួយការទទួលបានការងារជាគ្រូជម្រើសជាតិ ទាំងវ័យក្មេងនេះរបស់ ហែម ថុន ពន្លឺ នេះក៏មានការរិះគន់មួយចំនួនផងដែរ ជាពិសេសទៅលើត្រកូល «ហែម» នេះតែម្តង ដោយគេលើកឡើងថា ការទទួលបានតួនាទីជាគ្រូបង្វឹករបស់ ពន្លឺ ដែលបានមកនេះអាចបានតាមរយៈខ្សែ ឬបក្ខពួក គឺមិនមែនឡើងដោយប្រើសមត្ថភាពនោះទេ។
ប៉ុន្តែជុំវិញការរិះគន់នេះ ហែម ថុន ពន្លឺ បានបញ្ជាក់ថា៖ «ការចោទប្រកាន់ ឬការរិះគន់ថា កីឡាហែលទឹកភាគច្រើនសុទ្ធតែត្រកូល ហែម នោះ ខ្ញុំសូមបកស្រាយថា អត្តពលិកក្តី គ្រូបង្វឹកជម្រើសជាតិក្តី ដូចជាខ្ញុំផ្ទាល់ក្តី គឺមានប្រភពចេញមកពីការហ្វឹកហាត់ បណ្តុះបណ្តាលឆ្លងវគ្គ និងជម្រើសប្រកួតប្រជែង ដោយមានសញ្ញាបត្រទទួលស្គាល់ត្រឹមត្រូវ។ ប្រសិនបើបេក្ខភាពណា មកប្រកួតប្រជែង ឬមានសមត្ថភាពល្អជាងនោះ គេរង់ចាំតែទទួល តើខ្ញុំមានបទពិសោធមានលក្ខណសម្បត្តិសមស្របតាមគណៈកម្មការជ្រើសរើស ទើបខ្ញុំជាប់ជាគ្រូជម្រើសជាតិ»។
គួរបញ្ជាក់ថា បងបង្កើតរបស់ ហែម ថុនពន្លឺ ចំនួន ៥ នាក់បានចាប់យកអាជីពកីឡាហែលទឹកចំនួន ៤ នាក់ គឺបងទី ២ ឈ្មោះ ហែម លំផាត់ ជាអតីតគ្រូជម្រើសជាតិ បងទី ៣ ហែម គីរី ជាអគ្គលេខាធិការសហព័ន្ធខ្មែរកីឡាហែលទឹកបងទី ៤ លោក ហែម រស្មី នៅអូស្ត្រាលី និង ហែម ថុនពន្លឺ ជាកូនពៅ។ បន្ថែមលើនេះ សាច់ញាតិ និងក្មួយរបស់ ហែម ថុនពន្លឺ ជាច្រើននាក់ទៀត ក៏សុទ្ធតែជាអ្នកហែលទឹក ដោយពួកគេបានដើរតាមគន្លងរបស់ព្រឹទ្ធាចារ្យ ហែម ថុន ដែលត្រូវបានគេចាត់ទុកថា ជាស្ថាបនិកកំពូលដែលបានលះបង់ស្ទើរពេញជីវិតរបស់លោកក្នុងការលើកកម្ពស់វិស័យកីឡាហែលទឹកកម្ពុជា នៅលើឆាកអន្តរជាតិ នៅមុនពេលលោកបានទទួលមរណភាពកាលពីឆ្នាំ ២០១៥ ៕