សហព័ន្ធខ្មែរកីឡាហែលទឹក បានបង្ហាញវត្តមានក្រុមជម្រើសជាតិប្រចាំឆ្នាំ ២០២១ ដោយមានគ្រូបង្វឹក កីឡាករ និងកីឡាការិនីសរុបចំនួន ២២ នាក់ ជាមួយនឹងគម្រោងប្រមូលផ្តុំរបស់មជ្ឈមណ្ឌលជាតិហ្វឹកហ្វឺនកីឡានៃកម្មវិធីរបស់ក្រសួងអប់រំ យុវជន និងកីឡា។
អត្តពលិកកីឡាហែលទឹកជម្រើសជាតិ ឆ្នាំ ២០២១ ដែលសម្រេចដោយក្រសួងអប់រំ គឺបានតម្រូវឱ្យមជ្ឈមណ្ឌលជាតិហ្វឹកហ្វឺនកីឡា សហការជាមួយសហព័ន្ធ ត្រួតពិនិត្យចាប់ផ្តើមហ្វឹកហាត់តាមរយៈអនឡាញ ដើម្បីត្រៀមខ្លួនចូលរួមព្រឹត្តិការណ៍ការប្រកួតស៊ីហ្គេមលើកទី ៣១ នៅទីក្រុងហាណូយ ប្រទេសវៀតណាម ចុងឆ្នាំ ២០២១ នេះ និងព្រឹត្តិការណ៍អន្តរជាតិនានាផងដែរ ហើយបន្ថែមពីលើនេះ អគ្គលេខាធិការសហព័ន្ធបានអះអាងថា នឹងជំរុញការហ្វឹកហាត់ឱ្យបានទ្វេដង ដើម្បីឆ្លើយតបទៅនឹងព្រឹត្តិការណ៍ប្រកួតជាក់ស្តែង។
លោក ហែម គីរី អគ្គលេខាធិការសហព័ន្ធខ្មែរកីឡាហែលទឹកបានប្រាប់ថាសម្រាប់ឆ្នាំ ២០២១ នេះ សហព័ន្ធត្រូវបានក្រសួងអប់រំអនុញ្ញាតឱ្យប្រមូលផ្តុំជាក្រុមជម្រើសជាតិមានគ្រូបង្វឹក ៥ នាក់ និងក្រុមអត្តពលិក ១៧ នាក់ (ស្រី ៧ នាក់) គឺគ្មានក្រុមថ្នាលដូចបណ្តាឆ្នាំមុនៗទេ ដោយក្នុងនោះ គ្រូបង្វឹកធំលោក នាង សុរិទិ្ធយ៉ា ចំណែកលោក ហែម ថុនពន្លឺ លោក ឆោម ច័ន្ទថុន លោក ចេង ពិរោទ និងលោក ភិន រដ្ឋា ជាគ្រូជំនួយ។
ចំណែកកីឡាករចំនួន ១០ នាក់មានកីឡាករ លឹម កែវឧត្តម, ប៊ាន សុខហ៊ុយ, ហែម ប៉ុច, ឆោម ច័ន្ទថន, ប៊ុនណា ពៅពេជ្ជរ៉ា, អ៊ួង លីហេង, ឌឿន រ៉ាត់ធីឌុន, ឌឿន សុធី, ទួន ទិត្យសត្យា និងកីឡាករ លឹម សុខវឌ្ឍន៍នន្ទ រីឯបេក្ខភាពកីឡាការិនីទាំង ៧ នាក់មាន កាំង មុយនីន, សុខ វរល័ក្ខណ៍, ឆោម ស្រីវល្ល័ក្ខណ៍, ឃឺន ប៊ុនពេជ្រមរកត, អ៊ួង សែននី, វិច ហ្សង់ឆាយ និងកីឡាការិនី ឃឺន ចន្ទចរិយា។
ជាមួយគ្នានេះលោក ហែម គីរី បានតាំងចិត្តថា៖ «នៅក្នុងស្ថានភាពលំបាកដោយសារជំងឺកូវីដ១៩ ឆ្លងរាលដាលគឺការហ្វឹកហាត់ធ្វើតាមអនឡាញ ព្រោះមិនទាន់អាចប្រមូលផ្តុំបាន ប៉ុន្តែតាមការតាមដាន ត្រួតពិនិត្យ និងវាយតម្លៃពីគ្រូបង្វឹក ក៏ដូចជាអនុរក្ស និងមន្ត្រីថ្នាក់ដឹកនាំ សហព័ន្ធ គឺជំរុញឱ្យការហ្វឹកហាត់របស់អត្តពលិកគុណនឹង ២ ដើម្បីឆ្លងតបទៅនឹងតម្រូវការ ឬឆ្លើយតបទៅនឹងព្រឹត្តិការណ៍ប្រកួតអន្តរជាតិនានា ស្របតាមការដឹកនាំគ្រប់គ្រងរបស់ក្រសួងអប់រំ ក៏ដូចជាគណៈកម្មាធិការជាតិអូឡាំពិកកម្ពុជា និង CAMSOC ដែរ»។
យ៉ាងណាក៏ដោយ នៅពេលសួរលទ្ធផលដែលរំពឹងនឹងទទួលបានពីការប្រកួតនៅលើឆាកអន្តរជាតិ លោក ហែម គីរី បានពន្យល់ថា៖ «ប្រភេទកីឡាហែលទឹកពិតជាលំបាកប្រជែងយកមេដាយកម្រិតអន្តរជាតិ ព្រោះភាពជឿនលឿនរបស់ប្រទេសគេមានសក្តានុពលលឿនជាងយើង ប្រសើរជាងយើង ប៉ុន្តែយើងក៏ត្រូវតែរត់ឱ្យទៅជិតគេដែរ»។
កូនប្រុសបង្កើតរបស់ព្រឹទ្ធាចារ្យលោក ហែម ថុន រូបនេះបានបន្ថែមថា៖ «ទោះបីជាយ៉ាងណា ហែលទឹកកម្ពុជាមានភាពរីកចម្រើនឡើងជាបន្តបន្ទាប់ ហើយគោលដៅរបស់យើងនឹងយកមេដាយឱ្យបានក្នុងឆ្នាំ ២០២៣ ដែលកម្ពុជាត្រូវធ្វើជាម្ចាស់ផ្ទះ ស៊ីហ្គេម លើកទី ៣២»៕